Гэта Жанна Кальман. Жанчына нарадзілася ў 1875 годзе і пражыла на гэтым свеце 122 з паловай гады, сканаўшы ў 1997-м.
Французская доўгажыхарка з’яўляецца найстарэйшай з людзей, якія калі-небудзь жылі на Зямлі і чые даты нараджэння і смерці дакументальна засведчаныя. Кальман не вяла здаровы лад жыцця: на працягу 95 гадоў яна курыла, кінуўшы толькі ў 117-гадовым веку пасля аперацыі. Па яе словах, яна кінула курыць, бо праз амаль поўную страту зроку не магла прыкурыць самастойна, а прасіць кагосьці іншага ёй было няёмка.
122 гады — шмат для людзей. Але для некаторых іншых зямных істот гэта толькі палова ці нават чвэрць жыцця. Прапануем вам рэйтынг самых вядомых істот-доўгажыхароў.
Азёрны асетр — 152
Асятры дасягаюць даўжыні 2,8 метра. Сустракаюцца ў Паўночнай Амерыцы — у басейне ракі Місісіпі, а таксама ў возеры Вініпег і Вялікіх азёрах.
Грэнландскі кіт — 210
Жыве ў палярных раёнах Паўночнага паўшар'я. Дасягае даўжыні 22 метраў! Паколькі жывуць кіты ў суровых умовах, назіраць за імі вельмі складана. Але навукоўцы кажуць, што некаторыя асобіны дажывалі да 200—211 гадоў.
Карп коі — 226
Яскравыя карпы коі — гэта дэкаратыўны від звычайных карпаў. Іх разводзяць у штучных камяністых вадаёмах і дэкаратыўных сажалках. Самым старым карпам коі лічыцца рыба Ханака, якая памерла 7 ліпеня 1977 года ў веку 226 гадоў.
Галапагоская чарапаха — 250
Чарапахі — вядомыя доўгажыхары. Абсалютны рэкорд сярод чарапах па працягласці жыцця ўстанавіла адна з галапагоскіх чарапах, дажыўшы да 250 гадоў.
Малюск Arctica islandica — 507
У 2006 годзе на бераг Ісландыі выкінула малюска, якому навукоўцы потым далі імя Мін. Ягоны век быў вызначаны шляхам падлічэння гадавых кольцаў росту на панцыры. 507 гадоў!
Грэнландская палярная акула — 512
Грэнландская палярная акула прызнаная навукоўцамі самым даўгавечным відам хрыбетных. Біёлагі мяркуюць, што рыба здольная пражыць каля 500 гадоў. У 2010-2013 гадах навукоўцы праводзілі вымярэнні даўжыні тулава і радыевугляродны аналіз крышталіка вока 28 грэнландскіх акул. У выніку аказалася, што найбольшая з іх, пяціметровая, магла з'явіцца на свет 512 гадоў таму.
Каментары