Пра тое, што ў Мінскай вобласці жыве калонія крапчатага сусліка, арнітолаг Сяргей Шакала даведаўся ў інтэрнэце. Рэдкія для Беларусі грызуны вельмі пераборлівыя да ландшафту: селяцца на шырокіх лугах з нізкай травой, піша БелТА
Цікавая для беларускай фаўны знаходка выявілася ў Нясвіжскім раёне: каля 230 норак налічылі на ўчастку ў 250 кв. м. Гэта паселішча самае вялікае ў краіне і, магчыма, адно з самых буйных ва ўсёй Еўропе. У халодную пару года суслікі ўпадаюць у спячку, але з-за неверагодна цёплай восені грызуны прачнуліся і зараз не спяць.
Сяргей растлумачыў: раней суслікаў у краіне было настолькі шмат, што яны лічыліся праблемай для сельскай гаспадаркі. Грызуноў знішчалі, і ў выніку ў большасці раёнаў яны цалкам зніклі. Па папярэдніх падліках, сёння ў Беларусі жыве ўсяго некалькі тысяч асобін. Папуляцыя знаходзіцца на мяжы знікнення і занесена ў Чырвоную кнігу.
Дарэчы, не толькі наўмыснае знішчэнне звяркоў прывяло да скарачэння калоній. Была і застаецца яшчэ адна сур'ёзная праблема: жывёлы масава гінуць падчас ўзворвання невыкарыстаных палёў.
Цікава, што вялікае селішча грызуноў выявілі менавіта ў Нясвіжскім раёне, бо суслікі звязаны з Радзівіламі — былымі уладальнікамі Нясвіжскага замка.
- Іх падарылі Радзівілам ў XVIII стагоддзі. Нейкім чынам яны прабраліся на тэрыторыю і ацалелі. Цяпер распрацоўваем стратэгію для таго, каб арганізаваць экскурсіі і назіранне за гэтай папуляцыяй», — распавёў дырэктар нацыянальнага гісторыка-культурнага музея-запаведніка «Нясвіж» Сяргей Клімаў.
Здаюць у арэнду катэдж загінулага хакеіста Цыплакова ў Драздах. Вось інтэр'еры ФОТЫ19
Каментары