Штраф, дэпартацыя, ІЧУ. Як раней абыходзіліся з тымі, хто спрабаваў прарвацца праз мяжу
Незаконныя спробы перасекчы мяжу здараліся і раней. Толькі беларускія памежнікі дзейнічалі інакш. Згадалі, што пагражала людзям, якія спрабавалі патрапіць у Еўропу ў абыход прапускнога пункта.
У жніўні мінулага года ў Гродзенскім раёне спынілі двух грамадзян Кубы. Яны прыехалі з Масквы ў Мінск, адтуль у Гродна і на таксі дабіраліся да мяжы, каб патрапіць у Польшчу. На мужчын завялі адміністрацыйныя справы за спробу незаконнага перасячэння мяжы і парушэння памежнага рэжыму (артыкулы 23.29 і 23.30 КоАП). Пасля сканчэння разбіральніцтва іх чакала дэпартацыя з Беларусі.
У студзені ў Воранаўскім раёне каля вёскі Драбішуны затрымалі жыхара Ліды, які ішоў да мяжы. Калі ён на просьбу пагранічнікаў адмовіўся спыніцца і стаў уцякаць у лес, тыя зрабілі папярэджвальныя выстралы ў паветра.
Маладога чалавека затрымалі. Распачалі адміністрацыйную справу за спробу незаконнага перасячэння мяжы і непадпарадкаванне.
Падобныя падыходы працавалі яшчэ нядаўна. У маі за тыдзень затрымалі некалькі груп замежнікаў. Так 9 мая на ўчастку заставы «Сямёнаўка» спынілі чатырох грамадзян Гвінеі, якія кіраваліся ў Польшчу. На заставе «Прывалка» ў той жа дзень затрымалі грамадзян Кот-д’Івуара — яны спрабавалі незаконна патрапіць у Літву.
У Браслаўскім раёне 11 мая затрымалі 25 замежнікаў (з Ірака і Туркменістана) на машынах, якія планавалі незаконна трапіць у Літву. З сабой у людзей былі навігатары, мабільныя тэлефоны, прадукты і адзенне.
Як паведамляў дзяржапагранкамітэт, «матывам стаў пошук лепшага жыцця ў Еўрасаюзе».
У адносінах замежнікаў тады пачалі адміністрацыйны працэс. Людзей чакалі буйныя штрафы і дэпартацыя з забаронай уезду ў Беларусь на пяць год.
Тое ж пагражала пяцём грамадзянам Іраку, якіх спынілі ў чэрвені ў Воранаўскім раёне каля заставы «Доцішкі». Да высвятлення абставін мужчын змяшчалі ў ІЧУ Лідскага пагранатраду.
Цяпер, як бачым, супрацоўнікі органаў суправаджалі, а не спынялі натоўп мігрантаў, які кіраваўся ў бок мяжы.
Чытайце таксама:
Больш за 2000 мігрантаў спрабуюць прарвацца праз беларуска-польскую мяжу. Што там адбываецца? АНЛАЙН
Новае абвастрэнне на мяжы: што не так з аргументамі лукашэнкаўцаў?
Як тысячы мігрантаў удалося адначасова дабрацца да мяжы і арганізавацца ў калону? Пытанні па сітуацыі на мяжы, на якія пакуль няма адказу
Выйшла на свабоду Антаніна Канавалава, давераная асоба Ціханоўскай у 2020 годзе1
Каментары