Журналіста Генадзя Мажэйку асудзілі да 3 гадоў пазбаўлення волі. Матэрыялы аб абразе Лукашэнкі вылучылі ў асобную справу
Сёння Мінскі гарадскі суд вынес прыгавор журналісту «Камсамольскай праўды» Генадзю Мажэйку. Ён асуджаны на тры гады зняволення. Матэрыялы аб абразе Лукашэнкі вылучылі ў асобную справу.
Генадзь Мажэйка быў затрыманы амаль паўтара года таму, 1 кастрычніка 2021 года, у Маскве, калі спрабаваў выехаць у трэцюю краіну.
У дачыненні да Мажэйкі былі прымененыя два артыкулы: ч. 1 арт. 130 (распальванне сацыяльнай варожасці) і ч. 1 арт. 368 КК (абраза Лукашэнкі).
Паводле следства, ён нібыта пісаў у інтэрнэце «негатыўныя, непрыстойныя і недапушчальныя» выказванні ў адрас Лукашэнкі, а на сустрэчы з дэпутатам Варанецкім, «парушаючы агульначалавечую мараль», праводзіў агітацыю супраць дзейнай улады.
Прысуд у тры гады калоніі сёння вынесла суддзя Таццяна Фалькоўская. У асобную крымінальную справу выдзеленыя матэрыялы па эпізодзе нібыта абразы Лукашэнкі ад 3 верасня 2020 года ў ходзе правядзення сустрэчы з дэпутатам Палаты Прадстаўнікоў Нацыянальнага сходу Беларусі Варанецкім у памяшканні Мінскага гарадскога Палаца культуры, паведаміла суддзя.
Каментары