«Толькі калі я гавару па-руску, людзі чамусьці пытаюцца: «Ты з Узбекістана?» Паліглот з Бразіліі далучыў да спіса вывучаных моў беларускую
Элізеу нарадзіўся ў Бразіліі, але ўжо тры гады жыве ў Польшчы. Ён працуе ў IT, гаворыць на больш чым дзесяці мовах, у тым ліку і па-беларуску, і вядзе лінгвістычны падкаст. А яшчэ слухае стэндап Славы Камісаранкі і адну з улюбёных беларускіх спявачак — Паліну, піша «Еўрарадыё».
«Беларусы фаловяць мяне ў інстаграме, а сябра адвёў на дранікі»
Калі Элізеу толькі прыехаў у Польшчу, ён нічога не ведаў пра Беларусь. Нават не ўяўляў дакладна, дзе яна знаходзіцца. А пасля ў яго з’явілася сяброўка з Беларусі. Тады ён шмат даведаўся пра нашу краіну, але вучыць пачаў не беларускую, а рускую мову. Пасля да рускай дадалася ўкраінская.
І толькі гэтай вясной Элізеу вырашыў кінуць сабе выклік: паглядзець, як добра ён зможа авалодаць беларускай мовай. І даў сабе на гэта ўсяго толькі тры месяцы.
«Тое, што пачало адбывацца далей, — фантастычна! Цяпер беларусы фаловяць меня ў інстаграме, яны пытаюцца, ці патрэбная мне дапамога ў вывучэнні мовы, прапаноўваюць пагаварыць са мной па-беларуску. Гэта вельмі міла.
А ўчора мой сябра спытаў: «Ты ўжо еў дранікі?» Я кажу: «Не». Ён: «Добра, адвяду цябе ў Beer Station». Маўляў, там найлепшыя дранікі ў горадзе. І гэта было — ваў. Вельмі смачна. Мне спадабалася.
Гэта фантастычны досвед. Спачатку я вывучаў вашую мову як выклік, як challenge. Але цяпер усё інакш: гэта досвед. Досвед стасункаў з людзьмі, знаёмства з новай кухняй.
«Аднойчы я пачну чытаць кнігі па-беларуску, але пакуль чытаю навіны, напрыклад, «Еўрарадыё». І з навін я даведваюся пра кантэкст жыцця ў Беларусі.
Я гляджу вашыя відэа на ютубе, гляджу і іншыя беларускія медыя. Але таксама мне падабаецца беларускі стэндап: напрыклад, Слава Камісаранка.
З музыкаў мне падабаюцца Iva Sativa і Palina. Проста цяпер у мяне дзве любімыя песні: «Дадому» ад Iva Sativa і «Як ты» ад Паліны. Памятаю, калі я першы раз паслухаў «Як ты».
«Гэта быў важны момант для мяне. Да яго я не ведаў, што магу разумець беларускую мову».
«Беларусь — гэта не толькі «бульба» і «Лукашэнка»
Калі Элізеу гаворыць па-беларуску, людзі думаюць, што ён беларус. Калі ён гаворыць па-ўкраінску, лічаць, што ўкраінец.
«І толькі калі я гавару па-руску, людзі чамусьці пытаюцца: «Ты з Узбекістана?» Цікава», — дзеліцца назіраннямі Элізеу.
Часам беларусы пішуць яму ў інстаграме і прызнаюцца, што бразілец матывуе іх саміх размаўляць на роднай мове. Гэта асаблівая радасць для яго.
«Я нарадзіўся ў Бразіліі і размаўляю па-партугальску. Але партугальская — гэта не мова Бразіліі. Гэта мова каланістаў. У Бразіліі амаль не гавораць на мове карэннага насельніцтва. Але ж вельмі важна пачаць гаварыць на сваёй мове.
Ведаеце, я люблю мовы. І лічу, што нельга распавесці гісторыю краіны на замежнай мове. Так, добра, калі людзі ведаюць ангельскую, ведаюць рускую, але наша родная мова заўсёды найважнейшая.
Я ўпэўнены, што ўсе беларусы ведаюць сваю мову, могуць пачаць размаўляць на ёй, хоць і крыху павольна. Я рэкамендую, каб пачаць больш свабодна гаварыць па-беларуску, трэба пачаць для пачатку чытаць услых.
Да таго ж, упэўнены, у кожнага беларуса ёсць сябар, які можа свабодна гаварыць па-беларуску. Скажыце яму, што хочаце больш практыкі, і пачынайце гаварыць».
Сам Элізеу не проста размаўляе па-беларуску. Ён размаўляе па-беларуску пра Беларусь.
— Я намагаюся расказваць сваім сябрам-замежнікам не толькі пра палітыку. Людзі амаль нічога не ведаюць пра Беларусь, а Беларусь — гэта не толькі «Лукашэнка» і «бульба». Гэта вельмі прыгожая краіна, з прыгожай культурай, з прыгожай мовай. Беларусы, якіх я сустрэў, — фантастычная людзі, артыстычныя людзі.
— Дарэчы, а вашыя сябры цікавяцца ў адказ Бразіліяй? Ці прасілі яны навучыць іх, прынамсі, партугальскай мове?
— Хм. Не памятаю такога. Але калі нехта з беларусаў захоча вывучыць партугальскую — я магу дапамагчы, як цяпер усе беларусы дапамагаюць мне з беларускай.
Я люблю дапамагаць людзям вучыць мовы, бо гэта не так цяжка, як яны думаюць.
Элізеу гаворыць па-партугальску, па-іспанску, па-каталонску, па-італьянску, па-нямецку, па-французску, па-руску, па-польску, па-венгерску і па-ўкраінску. І абяцае, што хутка і па-беларуску загаворыць свабодна. І тады прысвеціць беларускай мове асобны выпуск свайго лінгвістычнага падкаста.
А пакуль можаце паслухаць пра яго досвед вывучэння моў. Раптам і вы адчуеце, што загаварыць на замежных мовах не так і цяжка. Ці, можа, вам захочацца следам за Элізеу загаварыць па-беларуску?
Сам жа паліглот ужо плануе кінуць сябе новы выклік. На свой дзень народзінаў ён плануе пачаць вывучаць кітайскую мову.
Папулярны тыктокер з Расіі тусіць у дарагіх рэстаранах Мінска: «Быццам бамжу падалі. Жарыце, на здароўе»22
Каментары