Беларускія турысты выбіраюць Расію? Як змянілася геаграфія паездак беларусаў за мяжу ў 2022 годзе
Расійскія СМІ пішуць, што беларусы праз візавыя і геапалітычныя прычыны павярнуліся ў бок усходняй суседкі. Але не ўсё так адназначна, даведалася выданне BG.Media.
Самым масавым попытам у беларускіх турыстаў карыстаюцца кароткія паездкі ў Санкт-Пецярбург, піша расійскае выданне ratanews.ru. На яго думку, гэты горад замяніў беларусам Львоў, Прагу і іншыя еўрапейскія гарады, куды беларуская экскурсійная плынь была вельмі вялікая, а цяпер гэтыя паездкі немагчымыя ці абмежаваныя.
Турфірмы адпраўляюць людзей у Санкт-Пецярбург і аўтобусамі, і цягнікамі, у фармаце сіці-брэйкаў, ці з дадаткам — аднадзённым турам у Карэлію.
Дарэчы, менавіта беларускія турысты выратавалі ад значнага падзення продажаў тураў у Карэлію, лічыць дырэктар кампаніі «Ратас» Уладзімір Кучарэнка.
«На гэтым тыдні прымаем апошнія групы. У цэлым сезонам задаволеныя, хоць ён адназначна слабейшы за мінулы. Падзенне аб'ёмаў у кампаніі склала 8-10% у параўнанні з мінулым годам. І гэта яшчэ вельмі нядрэнна, таму што па рынку паказчык ніжэйшы.
Не ўпасці мацней у гэтым сезоне нам дапамаглі беларускія турысты, якія актыўна ехалі да нас цэлымі аўтобусамі. Калі б не яны, зніжэнне ў нашай кампаніі склала б не менш за 20-25%», — сказаў дырэктар турфірмы.
Таксама попытам у беларусаў карысталіся туры ў Маскву — цягніком і аўтобусам. Кошт чатырохдзённай паездкі ў Пецярбург або Маскву каля 120 даляраў.
Нароўні з Масквой і Пецярбургам нашы суайчыннікі наведвалі таксама Калінінград, гарады Залатога кальца і курорты Краснадарскага краю — Анапу, Геленджык, Адлер і Сочы.
Звесткі беларускай афіцыйнай статыстыкі
Паводле звестак Белстата, у топ-5 самых папулярных краін у беларускіх турыстаў у 2022 годзе ўвайшлі Турцыя, Расія, Егіпет, ААЭ і Грузія. Выязная турыстычная плынь склала 3,9 млн паездак.
Пры гэтым пакідалі межы Беларусі для арганізаваных падарожжаў у 111 краін свету 348,6 тысячы беларусаў. Сярэдняя працягласць знаходжання за мяжой склала восем дзён.
Самым папулярным кірункам у беларускіх турыстаў стала Турцыя. Туды ў 2022 годзе з'ездзілі 104,2 тысячы чалавек. На другім месцы — Расія (78,2 тысячы). Далей — Егіпет (50,9 тыс.), ААЭ (30,5 тысячы) і Грузія (21,3 тысячы).
Меркаванне прадстаўнікоў беларускага турбізнэсу
Павышаную цікавасць да Расіі эксперты тлумачаць візавымі і геапалітычнымі прычынамі. Таксама гэтаму спрыяюць маркетынгавыя намаганні расійскай турыстычнай адміністрацыі ў супрацоўніцтве з беларускімі калегамі.
Аднак апошнія не спяшаюцца падзяляць энтузіязм сваіх усходніх партнёраў.
«Пакуль не можам сказаць, што папулярнасць гэтых тураў вялікая», — кажа дырэктар беларускага прадстаўніцтва «Пегас Турыстык» Паліна Хадкевіч.
«Я б не назвала турызм у Расію масавым, — згаджаецца з калегай кіраўніца беларускага тураператара «Бел-арыенцір» Ірына Бавенка. — Але беларускі рынак пачынае павольна паварочвацца да Расіі.
Не так даўно мы пачалі прапаноўваць туры ў Пскоў. Гэта звязана са з'яўленнем авіярэйса Мінск — Пскоў. Ляцець недалёка, білет танны. Наогул Расія — гэта велізарная колькасць варыянтаў. Да прыкладу, ты можаш за невялікія грошы прыляцець з Мінска ў Маскву, сесці на цеплаход і апынуцца ў Астрахані».
«Сярод многіх прапаноў па Расіі ў нас ёсць туры на Байкал, — распавядае кіраўнік кампаніі «Экатур-6» Міра Баран. —
Многія пытаюцца, але не многія ляцяць, бо гэта дарагі тур. Па цане параўнальны з адпачынкам у пяцізоркавых гатэлях Турцыі ці Арабскіх Эміратаў».
Заўважана, што беларускія патокі турыстаў у Расію актывізуюцца па тых напрамках, куды ёсць авія— або чыгуначныя зносіны. З Беларусі можна паляцець у Новасібірск, Екацярынбург, Перм, Краснаярск, Казань, Чалябінск, Самару, Калінінград, Санкт-Пецярбург, Маскву, Пскоў, Уфу і іншыя гарады. Гэты спіс пастаянна папаўняецца.
Беларусь не Еўропа? Топ-5 краін, дзе адпачывалі летась беларусы
Што палягчае жыццё турысту? Топ-10 мабільных праграм і сэрвісаў для паходаў і падарожжаў
«Праца ў моры дала зразумець, што ўсё ў гэтым жыцці магчыма». Беларуска працуе на лайнерах і глядзіць свет, а дома ратуе жывёл
Егіпет, Мальдывы, Індыя і не толькі. Куды беларусу паехаць восенню да мора?
Каментары
У нас на фірме падчас Харкаўскага контрнаступу планавалася мерапрыемства з выездам, то людзі прынцыпова вырашылі: у рашку не паедзем. Выбраліся ў адзін з нашых абласных гарадоў, дзе ў найлепшых рэстарацыях уздымалі тосты за вяртанне Балаклеі ды спявалі ў караоке забароненыя песні Казкі, Ляпіса і Бумбокса. Такі вось турызм.