Топ небанальных падарункаў на любую нагоду ад беларускіх майстроў
Здаецца, многія хоць раз задаваліся пытаннем, што падарыць сябру ці замежніку, да якога вы сабраліся ў госці, ды так, каб гэта было з беларускім вайбам. Асабліва востра такая праблема можа паўставаць за мяжой, бо ў самой краіне, што ні купі — яно ж па змоўчанні беларускае, будзь тое згушчонка ці шкарпэткі Mark Formelle ды рэчы айчынных дызайнераў. Сабралі для вас топ небанальных прэзентаў, якія вы можаце набыць за мяжой і парадаваць ці блізкіх, ці сябе любімага.
Свечкі з пахам Беларусі
Свечкі дадаюць утульнасці любым памяшканням, асабліва ў халодныя вечары, якія не за гарамі. А калі яны будуць пахнуць роднымі сэрцу мясцінамі? Менавіта такія робіць свечкавар Кацярына, якая стварыла брэнд Dumki candles. Можна выбраць пах парка Горкага, Батанічнага саду ці Камароўкі або той самы, вясковы, які адчуваўся падчас візітаў да бабулі.
Кошт: 20 еўра
Павукі і саламяныя аксэсуары
Саламяныя павукі здаўна былі абярэгам нашых продкаў, закліканыя абараняць дом ад любога зла. А яшчэ гэта выглядае вельмі стылёва ў інтэр’еры, пагадзіцеся? Купіць спецыяльны бокс з інструкцыямі па стварэнні свайго павучка можна ў брэнда Kanva за 35 еўра.
Яны ж ствараюць стылёвыя аксэсуары з саломы — завушніцы, абручы і нават кароны для тых, хто адчувае ў сабе ўладарны дух.
Гарлячкі і керамічныя каралі
Гарлячкі і каралі з адсылкай да тых, якія насілі нашы бабулі, знойдзеце ў праекта «Этыка». Цэны вар’іруюцца ад 30 да 45 еўра, у залежнасці ад складанасці вырабу.
А далікатныя ўпрыгожванні з натхняльнымі надпісамі пра тое, што важна быць сабе самой музай, ці пра тое, што дом там, дзе сэрца, адшукаеце ў майстрыхі-керамісткі, стваральніцы брэнда Atmasfiera.
Цішоткі на любы густ
Чаго-чаго, а недахопу ў цішотках з рознымі беларускімі мемамі ці вобразамі і надпісамі сёння няма. З’яўляецеся фанатам Марка Шагала? Можна замовіць тэматычную майку ад Biel kalaryt. Шмат гумарыстычных прынтоў ёсць у Znivien ці «Птулху», гістарычнай тэматыкі — у «Воблака» ці PRALIŬ. І нават русалак з «monnom» можна насіць на сабе, а яшчэ «фіранкі», дзякуючы Tsuda Project.
Стары добры Symbal.by заўсёды парадуе праверанымі часам прынтамі. Таксама ў іх можна замовіць значкі, кепкі і розныя торбы.
Афлайн-альтэрнатыва з беларускім мерчам у Вільні — крама сям’і Фурманавых «Кропка» ці сувенірка ад «А2 print». З вялікім выбарам худзі, вокладак для пашпарта і нават бялізны можна азнаёміцца на сайце «А2 print».
Беларускія настолкі і мазаікі
Сабраць мазаіку «Бітва пад Воршай», якая складаецца з 1000 пазлаў? Гучыць як выклік. Гэта можа стаць добрай забавай для вечара з сябрамі. Цана пытання — 17 еўра.
Калі вы не фанат дробных дэталяў, добрай альтэрнатывай могуць стаць настолкі — напрыклад, беларуская версія «Я ніколі не». Ці 52 карткі, якія дапамогуць вам даведацца пра кожнага ў кампаніі яшчэ лепш (ці нават пра сябе, бо пытанні ў гульні — добрая нагода для самарэфлексіі).
Пярсцёнак з любым надпісам
Пярсцёнак з надпісам, які натхняе ці проста шмат для вас значыць, — класны падарунак для тых, хто любіць насіць упрыгожанні на пальцах. У майстэрні «Make.sense» ператвораць у жыццё любую фантазію.
Ужо культавыя срэбныя падвескі-контур Беларусі ад ювелірнага брэнда BELARUSKICRY, здаецца, у прэзентацыі не маюць патрэбы. Але калі вы не ведалі, у іх яшчэ ёсць і серыя пярсцёнкаў, прысвечаных беларускім арнаментам.
Цэны — ад 80 даляраў.
Уласны вагон метро ці домік з Асмалоўкі
Стаць уладальнікам нерухомасці можна вельмі проста — пачаць хаця б з доміка з Асмалоўкі ў мініяцюры. Іх, а яшчэ панэлькі з дрэва стварае мастак Андрэй Бусел. Адным рухам рукі яны пераўтвараюцца ў лямпы, якія будуць асвятляць вашы дамы цёмнымі вечарамі, дадаючы ўтульнасці з прысмакам настальгіі.
Цэны — ад 70 еўра.
Кніжкі і паштоўкі
Калі вы з тых, хто ўпэўнены, што кніга — найлепшы падарунак па любой нагодзе, то вам да «Кнігаўкі» анлайн ці афлайн. У краме пастаянна дадаюцца беларускамоўныя навінкі. «Валадар пярсцёнкаў» — проста мастхэв для кожнай хатняй бібліятэкі.
Цікавыя сучасныя выданні таксама прадаюцца ў варшаўскім «Доме буслоў» — напрыклад, «Мое баба — діректор морга» пра жыццё на Палессі.
У Вільні кнігі можна знайсці ў Беларускім доме, а таксама ў краме «Гартайка».
Класным кампліментам-сувенірам можа стаць набор стыкераў ці паштоўкі. Як вам, напрыклад, стыкерпак, прысвечаны беларускаму транспарту?
Ці менавіта жывыя, не надрукаваныя паштоўкі ад мастачкі Таццяны Калач?
Посуд для самых смачных прыёмаў ежы
Раней мы ўжо пісалі пра сястру палітвязня Максіма Знака — Ірыну Козікаву, якая пайшла з адвакатуры і цяпер займаецца керамікай. Натхняльныя надпісы па-беларуску, адсылкі да нашай прыроды і вобразаў — галоўныя фішкі яе посуду.
Агулам за мяжой працуе шмат беларускіх майстроў, так што кожны знойдзе нешта сабе па душы: напрыклад, кубкі-тварыкі ад Uliclay ці трэндавыя формы і колеры ў Naranovich Ceramics.
Ежа
Калі падарунак не трэба везці задалёка і перажываць, што ён сапсуецца, то смачняхі да кавы і гарбаты ніколі не будуць лішнімі. Тым больш, чаго толькі не робяць беларусы сваімі рукамі. Напрыклад, смятаннікі і пірожныя-бульбачкі, глазураваныя сыркі ці торты на любы смак, трубачкі і арэшкі са згушчонкай, і тэматычную каву ў дрыпах «Дух радзімы».
Як камбінаваць рэчы з нацыянальнымі матывамі з сучаснымі? Ідэі ад модных беларусак і беларусаў
Што будзе з беларускімі сэкандамі пасля забароны Еўрасаюза на ўвоз адзення? Спыталі ў іх
«Мое баба — діректор морга». Як паляшучка палюбіла пахавальныя традыцыі, пераехала ў Новую Зеландыю і напісала пра іх кнігу
Пасля даносу Бондаравай раптоўна адмянілі выставу ў музеі Янкі Купалы. Цяпер яна патрабуе на музеі шыльды па-руску29
Каментары