За год машына страціла амаль палову цаны. Уласнікі электрамабіляў скардзяцца, што іх машыны імкліва таннеюць

Tesla таннее на вачах?

Tesla model 3 2020 года выпуску ў снежні 2023 года ў Беларусі ў сярэднім каштавала $32 тысячы. Праз год сярэдні кошт знізіўся да 23 тысяч даляраў.

Павялічыць

Tesla model Х 2020 года за год патаннела з 62 тысяч даляраў (снежань 2023 года) да 52 тысяч даляраў. Але калі браць больш працяглы перыяд, то падзенне будзе яшчэ больш заўважным. 

Павялічыць

Так, напрыклад, чатырохгадовыя (2018 г.в) Tesla model Х у Беларусі ў снежні 2022 года прадаваліся ў сярэднім за 70 тысяч даляраў. Цяпер жа чатырохгадовую (2020 г.в) Tesla model Х аддаюць у сярэднім за 55 тысяч, а машына 2020 года выпуску за два гады патаннела роўна ў 2 разы.

Адметна, што ў папярэднія гады сама Tesla неаднаразова зніжала цэны на новыя аўто, каб рабіць іх больш канкурэнтаздольнымі. Кампанія Ілана Маска магла сабе гэта дазволіць, бо пачатковы працэнт маржы быў даволі высокім. Лічыцца, што маржа Tesla застаецца адной з самых высокіх у аўтамабільнай прамысловасці.

Такія паводзіны амерыканскага аўтавытворцы выклікалі абурэнні пакупнікоў, якія паспелі набыць аўто па старых цэнах, бо гэта аўтаматычна азначала, што іх машыны таксама губляюць у цане дадатковыя пару тысяч даляраў. Не ў захапленні ад рэгулярных дысконтаў ад Tesla таксама лізінгавыя кампаніі і ўласнікі аўтапракатаў, бо астаткавы кошт гэтых машын зніжаецца надта моцна.

«Кітай» таксама не ўтрымаў цэннік

З кітайскімі «электрычкамі» сітуацыя выглядае яшчэ больш драматычна. 

Павялічыць

Напрыклад, нарабіўшы шуму ў аўтамабільным асяроддзі, Zeekr 001 у траўні 2023 года прадаваўся новым за 74-75 тысяч даляраў. Цяпер цэны на новы Zeekr 001 у залежнасці ад камплектацыі вагаюцца ў межах 43-57 тысяч даляраў. 

Павялічыць

Гадавалыя аўто з прабегам цяпер прадаюць па цэнах ад 36 300 да 45 500 даляраў. 

Іншы яскравы прыклад — BYD Song Plus EV. Вясною 2023 года гэтыя электрычныя паркетнікі прадаваліся па цэнах ад 39 да 41 тысячы даляраў. 

Павялічыць

Цяпер новыя BYD Song Plus EV даступныя па цэнах ад 24 500 да 29 500 даляраў.

Павялічыць

Адметна, што патрыманых BYD Song Plus EV амаль няма ў продажы. А цэны на гадавалыя аўто з прабегам пачынаюцца з 20 тысяч даляраў, што крыху больш за 50% ад цаны, якую трэба было заплаціць за гэтае аўто год таму, калі яно было новае.

Усе электрамабілі таннеюць, але не ўсе так хутка

Так, напрыклад, электрычныя Nissan Leaf 2020 года выпуску за год згубілі каля 15%. У снежні 2023 года за такія аўто ў сярэднім прасілі $20 638, а цяпер $17 750.

А што з аўто на традыцыйным паліве?

BMW 5 серыі 2019 года ў снежні 2023 года каштавала ў сярэднім 35 680 даляраў. Праз год цана на не толькі не зменшылася, а нават крыху падрасла. Цяпер сярэдні кошт такіх машын складае 36 162 даляры. 

Павялічыць

BMW X3 2020 года выпуску за год страціла ў цане ўсяго 6%. Летась у сярэднім за гэту машыну прасілі 43 650 даляраў, а цяпер 41 089.

Адметна, што электрычныя BMW i3 губляюць у цане куды больш актыўна, чым аўто той жа маркі з рухавікамі ўнутранага згарання.

Павялічыць

Так, напрыклад, BMW i3 2019 года выпуску страціла за год 14% ад леташняй цаны — 23 600 даляраў супраць 20 322.

Не губляюць у цане такія аўто, як Ford Mustang. Год таму сярэдняя цана на Mustang 2019 года выпуску складала 29 077 даляраў. За год машына пастарэла і вырасла ў цане, цяпер за іх у сярэднім просяць $32 657.

Павялічыць

Што можа спыніць гэты працэс?

Для таго, каб патрыманыя электрамабілі перасталі хутка таннець, як мінімум павінны перастаць зніжацца цэны на новыя аўто ў гэтым сегменце. 

Па-другое, павінен быць добры попыт на такія аўто на другасным рынку, што таксама пад пытаннем, асабліва, калі гаворка ідзе пра машыны кітайскіх брэндаў. Кітайскія аўтавытворцы хуткімі тэмпамі выпускаюць новыя мадэлі і робяць рэстайлінг праз 2-3 гады знаходжання на канвееры. Прычым новая ці абноўленая мадэль, як правіла, пачынае прадавацца танней, чым папярэдняя. Натуральна, што гэта будзе негатыўна адбівацца на кошце патрыманых машын. 

• 18
• 1
• 14
• 8
• 1
• 1
• 0
• 0