U Biełarusi źjaviŭsia nacyjanalny partał pra zdarovy ład žyćcia
17.05.2017 / 20:50
U Biełarusi pačaŭ pracavać nacyjanalny internet-partał ab zdarovym ładzie žyćcia «Zdarovyja ludzi». Jon raźličany na ludziej roznaha ŭzrostu i roznych patreb. Pradstaŭniki resursu kažuć, što artykuły na partale napisanyja dastupnaj movaj, infarmacyja budzie abnaŭlacca štodnia, pry hetym usie materyjały buduć aŭtarskimi, piša Tut.by.
Ilustracyjnaje fota Siarhieja Hudzilina
Prajekt stvorany Ministerstvam achovy zdaroŭja na bazie vydańnia «Miedycynski vieśnik». Pracujuć nad im žurnalisty, piśmieńniki i daktary.
«Chutčej za ŭsio, našy mietady prapahandy zdarovaha ładu žyćcia nie zaŭsiody dasiahajuć mety. Adna z pryčyn — źmiena struktury infarmacyjnaj prastory na karyść internet-resursaŭ. Hadžety jość praktyčna ŭ kožnaha dziciaci i darosłaha. My trochi mianiajem palityku prasoŭvańnia zdarovaha ładu žyćcia i, viadoma, uličyli, što ŭ Biełarusi bolš za 5 miljonaŭ čałaviek ad 15 da 74 hadoŭ rehularna karystajucca internet-resursami», — zaŭvažyŭ ministr achovy zdaroŭja Valeryj Małaška.
Ministr adznačyŭ, što siarod asnoŭnych pryčyn śmiarotnaści ŭ Biełarusi lidzirujuć sardečna-sasudzistyja i ankałahičnyja zachvorvańni. Heta adbyvajecca z-za raspaŭsiudžanaści siarod nasielnictva faktaraŭ ryzyki: kureńnia, nieracyjanalnaha charčavańnia, niedastatkovaj fizičnaj aktyŭnaści, ałkahalizmu. Siońnia dzieviać ź dziesiaci biełarusaŭ majuć ad adnoj da piaci škodnych zvyčak, kožny druhi biełarus maje zališniuju vahu. Mienavita tamu važna, kab u krainie pracavaŭ nacyjanalny prajekt, nakiravany na prapahandu zdarovaha ładu žyćcia.
«Heta ŭnikalny prajekt, jon rychtavaŭsia daŭno. Ideja pryjšła Vasilu Ivanaviču Žarko (ciapierašni vice-premjer i eks-ministr achovy zdaroŭja) hod tamu. My padyšli vielmi surjozna, niekalki miesiacaŭ źbirałasia kamanda, my analizavali pavodnickija reakcyi ludziej u internecie, zamiežnyja i ajčynnyja sajty z takoj infarmacyjaj i pryjšli da niejkaha bačańnia hetaha prajekta», — zaŭvažyła Volha Śviatlickaja, kiraŭnik 24health.by, kandydat miedycynskich navuk, dacent kafiedry aniestezijałohii i reanimatałohii BiełMAPA.
«Technałohii achovy zdaroŭja takija, što siońnia my absalutna zabiaśpiečvajem rody ŭ žančyn 45 hadoŭ i starejšych. Jakaja žančyna ŭ 55 hadoŭ choča być piensijanierkaj, kali ŭ jaje syn abo dačka 10-letnija. Nie chočuć. Hetyja ludzi chočuć być maładymi», — kaža jana.
Volha Śviatlickaja zaŭvažaje, što pieradačy pra zdaroŭje na telebačańni «siońnia stanoviacca anachranizmam». Pavodle danych instytuta sacyjałohii NAN Biełarusi, siarod ludziej da 30 hadoŭ tolki 51% naohuł uklučaje televizar.
«Budučynia za śpiecyjalizavanymi YouTube-kanałami, jakija taksama buduć u nas», — reziumuje jana.
Na partale siem raździełaŭ: «Budź ščaślivym», «Charčujsia pravilna», «Žyvi aktyŭna», «Raści dziaciej», «Kantraluj zdaroŭje», «Zastavajsia maładym», «Budź niezaležny».
«My budziem havaryć pra ŭsio: jak budavać adnosiny z partniorami, dziećmi, kalehami, načalstvam, pra seks, pra ludziej, jakim patrebna dapamoha. Vielizarnaja kolkaść ludziej nie znachodzić, kudy im źviarnucca. Adna z topavych pazicyj — jak dapamahčy čałavieku pieražyć hora. Mała chto pracuje z hetymi ludźmi. My voźmiem ich pad svaju apieku, raskažam, jak i kudy źviarnucca, spravicca z horam», — zaŭvažaje Volha Śviatlickaja.
Skrynšot z sajta — nn.by
U partała jość viersii na biełaruskaj i ruskaj movach.
«Ja atrymlivaju zadavalnieńnie, čytajučy na biełaruskaj movie, i nam chočacca, kab hety partał čytali na svajoj rodnaj movie», — zaŭvažaje kiraŭnik prajekta.
U partała jość staronki ŭ Facebook, «Ukantakcie», Twitter, «Adnakłaśnikach» i YouTube-kanał. Letam źjavicca mabilnaja viersija. Taksama na sajcie jość forma dla zvarotaŭ, dzie kožny achvotny moža pakinuć zajaŭku pa temie, a žurnalisty napišuć materyjał.
Praca partała finansujecca ź dziaržbiudžetu, adnak płanujecca pryciahvać rekłamadaŭcaŭ. Na pytańnie, kolki vydatkavana srodkaŭ na stvareńnie sajta, ministr achovy zdaroŭja zaŭvažyŭ, što padličyć niemahčyma: kamanda pracavała ŭ asnoŭnym pa viečarach i vychadnych.
«Tut bolš asabistaha altruizmu i adkaznaści ŭ adnosinach da našych hramadzian. Hrašyma nie vymierać», — padsumavaŭ jon.