Коля Лукашэнка выступаў на «Снежным снайперы» з імянной вінтоўкай коштам 3500 даляраў
04.03.2018 / 14:27
Як вынікае з фотавыяў стралковага рубяжа «Раўбічы» падчас правядзення дзіцячых спаборніцтваў «Снежны снайпер», Коля Лукашэнка выступаў на турніры з імянной вінтоўкай «Аншутц» 1827 сістэмы Фортнера, кошт якой пачынаецца з 3500 даляраў.
Гэта элітная мадэль біятлоннай вінтоўкі (яе яшчэ называюць «Трыумф хуткасці»), якой у свой час карысталіся такія зоркі сусветнага біятлона як немцы Рыка Грос, Міхаэль Грайс, Катрын Апель, Андрэа Хенкель, Ушы Дызль, Магдалена Нойнер, нарвежац Уле Эйнар Б'ёрндален, француз Рафаэль Пуарэ.
Вінтоўка «Аншутц» 1827F афіцыйна ўнесена ў каталог узбраенняў арміі Германіі пад пазначэннем G35 у якасці штатнай зброі спартсменаў бундэсвера, якія складаюць аснову нямецкай нацыянальнай зборнай па біятлоне.
Уся iншая зброя без апазнавальных знакаў на мяжы ў «Раўбічах» - гэта малакаліберныя вінтоўкі мадэлі БІ 7-4, вырабленыя на Іжэўскім заводзе «Іжмаш».
Фота: Дар'я Буракіна, TUT.BY