Nabyvaje papularnaść novy biznes: damoŭ pryvoziać nabory praduktaŭ i recepty šykoŭnych viačer FOTY
Tydzień u Rebox pačynajecca ŭ čaćvier: pryniać zamovy, padrychtavać pradukty, rasfasavać, pryvieźci-advieźci, 1000 razoŭ usio pierapravieryć, kab u niadzielu i paniadziełak kurjery dastavili zapavietnyja skrynki pa adrasach. Razam z taryfnym płanam «Kamfort+ dla biznesu» ad velcom (čamu varta padklučycca, hladzicie tut) my vyśviatlali, ci jość u Biełarusi popyt na hety servis i ŭvohule — jak usio pracuje.
08.10.2018 / 12:15
Rebox — prajekt kampanii «Restaracyja», jaki prapanuje nabory praduktaŭ z fotareceptami, pa jakich luby moža samastojna pryhatavać chatniuju viačeru jak u restaracyi.
Praduhledžanyja jak zvyčajnyja viačery, tak i śviatočnyja, ramantyčnyja, na vialikuju kampaniju, jość i admysłovaje barbiekiu-mieniu. Standartnyja nabory praduktaŭ Rebox raźličany na 3 i 5 viačeraŭ dla dvaich. Pakiety z fasavanymi inhredyjentami mohuć zachoŭvacca ŭ chaładzilniku ciaham tydnia.
Čamu Rebox?
Varyjantaŭ tłumačeńnia nazvy šmat, raspaviadaje kiraŭnik prajekta Rebox Vital Anaškievič. Samy pieršy i samy łahičny — ad słova «restaracyja». Isnuje i inšaja rasšyfroŭka — «skrynia z receptam».
«U pačatku słova Rebox jość prystaŭka Re — paŭtor. My chočam, kab našy boks prychodziŭ paŭtorna ŭ siamju i zastavaŭsia tam jak maha daŭžej».
Vital akcentuje, što ŭ Rebox prosta niama prava na fijaska.
«Kali našy viačery nie spadabajucca adrazu, klijent da nas dakładna bolš nie pryjdzie. Tamu asnoŭnaja naša zadača siońnia — pastavić viačery «na paŭtor» dla jak maha bolšaj kolkaści karystalnikaŭ».
Hod 2017. «Było składana, cikava i zusim nie tak, jak my płanavali»
Rebox isnuje ŭ miežach bujnoj dynamičnaj kampanii pastaŭščyka praduktaŭ charčavańnia «Restaracyja», jakoj užo bolš za 10 hod.
«Vyrašyŭšy raźvivacca ŭ internet-prastory, my zapuścili adrazu dva prajekty: Rebox.by i re-store.by. Kali Rebox— heta dastaŭka peŭnaha naboru praduktaŭ z receptami, to «Restor» —kłasičnaja dastaŭka praduktaŭ. Ale tych praduktaŭ, jakija ŭ zvyčajnym supiermarkiecie kupiš nie zaŭsiody».
Kiraŭnik prajekta Rebox Vital Anaškievič.
Z dnia zapusku Rebox — 14 lutaha 2017 — prajšło ŭžo bolš za paŭtara hoda.
«Pieršyja dastaŭki ja dobra pamiataju. Jak byvaje ŭ padobnych startapach, dastaŭlali nabory ježy siabram, znajomym. Pryjemna, što niekatoryja našy klijenty ź pieršaha dnia z nami».
Farmat chatnich viačeraŭ, ale pryhatavanych jak u hodnym restaranie, u śviecie nie novy, zaznačaje Vital. A voś na biełaruskim rynku siońnia jaho pradstaŭlaje tolki Rebox.
Vital kaža, što ich servisu było krychu praściej zapuścicca, čym inšym padobnym startapam, jakija źjaŭlalisia i źnikali praz try miesiacy. Usio ž «Restaracyja» daje materyjalna-techničnuju bazu.
«I ŭsio adno było składana: usio było nie tak, jak my płanavali. Tolki padrychtoŭka išła amal paŭhoda: prydumvalisia i vypraboŭvalisia recepty, rabiŭsia brendzinh i šmat čaho jašče. Ale heta było strašna cikava».
Chto karystajecca servisam?
«Kali my adpracavali hod, vyrašyli zładzić vialikuju ahulnuju sustreču, kudy zaprasili svaich pastajannych klijentaŭ. Sustreča adbyłasia ŭ farmacie kinapakazu ŭ staličnym kinateatry», — pryhadvaje Vital. Da hetaha kamanda servisu viedała tych, kamu štotydzień pradumvaje viačeru, tolki pa sacsietkach.
Siońnia klijentam Rebox pieravažna 25-40 hadoŭ, jany aktyŭnyja, hatovyja sprabavać novaje, kožny dzień rabić adkryćci, navat prosta hatujučy viačeru. Heta ludzi, jakija ŭmiejuć canić svoj čas i ličyć hrošy.
«Našy klijenty — heta i prahramisty, i nastaŭniki, i daktary. Prafiesii vielmi roznyja», — dadaje Vital.
Što ŭ nas na viačeru?
Paraŭnoŭvać Rebox z dastaŭkaj hatovaj ježy niekarektna i niapravilna — picu štoviečar jeści nie budzieš. U Rebox imknucca zrabić kožnuju viačeru adroznaj.
«My abaviazkova ŭklučajem u mieniu na tydzień śvininu, jałavičynu, rybu, kurycu, kab viačery byli raznastajnyja i karysnyja».
Što datyčna pravilnaha charčavańnia, to Vital adznačaje, što z hetym składaniej, bo paniaćcie pravilnaha charčavańnia kožny vyznačaje indyvidualna.
«Ale ŭ našych viačerach šmat harodniny, starajemsia ŭklučać karysnyja morapradukty».
Darečy, viehietaryjanski set u Rebox nie pryžyŭsia.
«My sprabavali jaho ŭvieści, ale vialikaha popytu nie było, tamu z časam admovilisia. Rabić kožny tydzień admysłovuju viehietaryjanskuju liniejku ekanamična niavyhadna, a toj samy set dvojčy ŭ nas zamaŭlać nie buduć».
Zatoje ŭ Rebox ciapier raspracoŭvajuć mahčymaść zamianiać niekatoryja pradukty.
«Naprykład, kali vy nie jaście śvininu, to zmožacie zamianić jaje čymści jašče. U nas jość pastajannyja klijenty, jakija nie jaduć pamidoraŭ. My im abaviazkova zamianiajem hety inhredyjent. U bližejšych płanach chočam dać takuju mahčymaść usim našym klijentam».
Viačera ŭ pieršuju čarhu asacyjujecca ź siamjoj, z časam, jaki možna pravieści razam. Tamu naturalna, što Rebox abrali mienavita farmat viačeraŭ.
«Śniadanak — heta chutka. Na składanaści i ekśpierymienty ŭ čałavieka prosta niama času. A prapanoŭvać jamu aŭsianku z roznymi areškami — śmiešna».
Zatoje abiedy — inšaja sprava.
«My płanujem da našych viačeraŭ pa žadańni klijentaŭ dadavać jašče i supy. Mnohija kažuć, što hatujuć našy viačery na abied. Dyk čamu nie azdobić ich dobrymi supami?»
Chto pracuje ŭ Rebox?
Siońnia kamanda Rebox — heta kala 30 čałaviek. Siaredni ŭzrost — 30-35 hadoŭ. Kurjery, fasoŭščyki, prybiralščyki i, viadoma, kuchary. U Rebox ź pieršaha dnia pracuje brend-šef Jaŭhien Makarevič. Dapamahajuć jamu jašče dva kuchary. Akramia taho, tut praktykujuć najmać povaraŭ dla raspracoŭki roznych receptaŭ.
Ciapier u bazie Rebox kala 600 receptaŭ. Paŭtarajucca jany nie čaściej, čym raz na dva miesiacy. Karystalnikam prapanujuć dva varyjanty setaŭ na viačery: kłasičny i łajt. Recepty łajt-boksaŭ mienš składanyja, u ich mienš inhredyjentaŭ, hatavać ich praściej i chutčej. Akramia asnoŭnaha mieniu, u Rebox praduhledžanyja viačery, prymierkavanyja da śviat, a taksama set «Hości» — viačera, raźličanaja na čatyroch čałaviek, u jakuju ŭvachodzić asnoŭnaja strava, zakuska i sałata.
Niešta pajšło nie tak
Vital raskazvaje, što za pryhožymi, smačnymi i svoječasova dastaŭlenymi stravami staić vializnaja praca. U jakoj zdarajucca i promachi.
«Kuchary — mastaki ŭ svajoj spravie. I ź imi, jak ź lubymi ludźmi mastactva, byvaje ciažka. Prosty prykład: našy kuchary hatujuć novuju stravu i niekatoryja inhredyjenty dadajuć «na voka». Ale tak u nas nie pracuje: usio pavinna być uzvažana da hrama».
U Rebox isnuje try etapy kantrolu receptu. Na pieršym usio hatujecca, fatahrafujecca, na druhim — unosiacca karekciroŭki.
Naprykład, kuchary napisali, što stravu možna pryhatavać za 40 chvilin. Treba jašče raz pravieryć, ci sapraŭdy heta tak.
«My adnojčy pravodzili konkurs pa narezcy cybuli. Dyk hałoŭku cybuli kuchary pakryšyli za 15 siekund, a mnie spatrebiłasia dźvie chviliny. Tamu i hetyja 40 chvilin, što zakłali na pryhatavańnie kuchary, u zvyčajnaha niepadrychtavanaha čałavieka mohuć raściahnucca na hadzinu. Na treciuju viačeru, viadoma, budzie atrymlivacca chutčej».
Na astatnich etapach kantrolu znoŭ usio pierapraviarajecca i karektujecca.
«Časam zdarajecca, što niešta zabudziem pakłaści ŭ skryniu. Ale takija niedachopy my imkniomsia vypraŭlać chutka i za naš košt. My lubim našych klijentaŭ, i jany adkazvajuć nam uzajemnaściu».
Pra drobnyja niedachopy Rebox Vital Anaškievič raskazvaje spakojna. Jon razumieje, što pry vialikich abjomach pracy mohuć być niečakanaści.
«Ad momantu prydumvańnia stravy da momantu, kali pradukty pakładuć u skryniu i jana trapić klijentu, zvyčajna prachodzić dva miesiacy. Praz heta ŭ nas adnojčy zdaryŭsia promach z harbuzom. Viačera ź im źjaviłasia na sajcie tady, kali na jaho byŭ užo nie siezon. My tady nasilisia pa ŭsich pastaŭščykach, kuplali pa dva-try — usio, što było ŭ prodažy ŭ toj momant. Bo kali pradukt trapiŭ na sajt i klijent jaho zamoviŭ, užo nie skažaš: «Sory, harbuza nie budzie, my prosta nie možam». Ale z taho času my stali bolš abačlivymi».
Jak ni dziŭna, ale bolš za ŭsio narakańniaŭ u klijentaŭ… na bulbu.
«Da praduktaŭ u nas vielmi strohi padychod. Kali ŭ bulbie jość «vočki», to klijenty imhnienna robiać fota i dasyłajuć nam: «Što heta za bulbu vy mnie padsunuli?» Chacia kramie takuju pretenziju naŭrad ci chto b pradjaŭlaŭ. Tamu ŭ nas usie pradukty maksimalna jakasnyja».
Samaje składanaje ŭ prasoŭvańni — pieršaja zamova
My hutarym ź Vitalom Anaškievičam pra kuchniu, recepty, pra kamandu adnadumcaŭ, jakija sabralisia ŭ Rebox, pra pośpiechi i ŭzajemnuju luboŭ z klijentami. I padajecca, što prablem dla hetaj maładoj kreatyŭnaj kamandy paprostu nie isnuje. Ale tak nie byvaje.
«U nas jość prablema pieršaj zamovy, — kaža Vital, — nam vielmi ciažka pryciahnuć novaha klijenta, kab jon pasprabavaŭ naš set upieršyniu. Mnohim zdajecca, što 85 rubloŭ za piać viačeraŭ na dvaich — heta šalonyja hrošy. Ale kali vy na adzin viečar zamaŭlajecie sušy za 30 rubloŭ, vam ža nie zdajecca heta darahim? Adnak psichałohiju čałavieka vielmi ciažka pierabudavać».
A što dalej?
Pavinien zapracavać abnoŭleny sajt Rebox.by, musić źjavicca raździeł dadatkovych straŭ. Da naboru praduktaŭ dla asnoŭnaj viačery ŭ karystalnika budzie mahčymaść zamović sabie taksama pradukty na sup ci desiert, jakija jon taksama zmoža pryhatavać doma.
Akramia taho, raskazvaje Vital, vielmi važna zrabić maksimalna kamfortnaj mabilnuju viersiju sajta.
Što sapraŭdy važna dla Rebox — heta pastajanny dostup u internet. Kamunikacyja z karystalnikami servisu aktyŭna idzie ŭ sacyjalnych sietkach i roznych mesendžarach, pieravažna ŭ instahramie i vajbiery. Klijenty dzielacca svaimi ŭražańniami pra stravy, mieniedžary i kuchary ŭ režymie anłajn dapamahajuć u vypadku ŭźniknieńnia pytańniaŭ, źviazanych z hatavańniem.
«Znosiny ŭ sacyjalnych sietkach my padtrymlivajem praktyčna 12 hadzin na sutki. Tamu pry vybary taryfnaha płanu nam važna, kab byŭ uklučany mabilny internet i kab mieniedžary zaŭsiody zastavalisia z klijentam na suviazi, navat kali niešta zdarycca z wi-fi», — tłumačyć Vital.
Taryfny płan «Kamfort+ dla biznesu» ad velcom akurat stvorany dla hetych met. Asnoŭnyja jaho pieravahi — heta bieźlimitnyja zvanki va ŭsie sietki, bieźlimitnyja zvanki pamiž supracoŭnikami, dadatkovyja miehabajty litaralna za kapiejki, abaviazkovaje apaviaščeńnie ab skančeńni trafiku i absalutna bieskaštoŭnaja dadatkovaja opcyja «Bieźlimitny internet».
Cikavy vypadak
Nie tak daŭno ŭ Rebox pryjšoŭ vodhuk, što ich siertyfikat na pradukty dla viačeraŭ staŭ viasielnym padarunkam.
«Siertyfikat padaryli sa słovami: «Vielmi chočacca spraścić pieršyja siamiejnyja budni maładoj haspadyni». Voś dla hetaha my i pracujem!»
Materyjał padrychtavany pry padtrymcy velcom.
Pra admysłovyja taryfnyja płany «Kamfort+ dla biznesu» vy možacie daviedacca tut.