«Heta była psichałahičnaja razradka». Paeta Słavamira Adamoviča sudziać za bytavy kradziež, jon pryznaŭ vinu

22.03.2019 / 12:44

U Puchavickim rajonnym sudzie pačaŭsia praces nad paetam Słavamiram Adamovičam, piša Radyjo Svaboda.

Słavamira Adamoviča abvinavačvajuć pavodle 2-j častki 205-ha artykuła Kryminalnaha kodeksu («Kradziež majomaści z praniknieńniem u žytło»). Jamu pahražaje da 4 hadoŭ źniavoleńnia. Da zakančeńnia suda Adamovič budzie znachodzicca pad chatnim aryštam.

Svaju vinu Adamovič pryznaŭ całkam i paprasiŭ u paciarpiełaha prabačeńnia za toje, što zrabiŭ. Paciarpiełym ad dziejańniaŭ Adamoviča pryznany Siarhiej Laščynski, u jakoha jość dom u vioscy Cahielnia Puchavickaha rajonu. U toj ža vioscy žyvie i Słavamir Adamovič.

Pavodle pakazańniaŭ samoha Adamoviča, jon prykmieciŭ u vioscy hety dom, jaki paličyŭ zakinutym, i ŭ adnu z načej u listapadzie 2018 hodu pranik u jaho, uzłamaŭšy zamok łomam. Usiaho z doma Laščynskaha i jahonaha chlava da 16 śniežnia 2018 hodu jon skraŭ bolš za 20 rečaŭ: adzieńnie, meblu, posud, instrumienty, pryłady. Śledstva acaniła ich košt u 300 rubloŭ.

Śpis skradzienaha, pavodle materyjałaŭ śledstva:

Na sudzie Adamovič pryznaŭ, što skraŭ hetyja rečy, admoviŭsia tolki ad taho, što nibyta skraŭ jašče i elektraruchavik.

Nazvaŭ učynak «formaj psichałahičnaj razradki»

Słavamir Adamovič pasprabavaŭ u sudzie patłumačyć matyvy svaich učynkaŭ. Jon uspomniŭ, što znachodziŭsia ŭ vioscy Cahielnia ŭ svaim domie, pracavaŭ nad litaraturnym tvoram i prytym pryhadvaŭ, jak jaho zatrymali 25 sakavika 2018 hodu ŭ Marjinaj Horcy. Tyja ŭspaminy, pavodle Adamoviča, nie davali jamu supakoicca. Tady jaho pratrymali 9 hadzin u milicyi i ŭžo tady nibyta zajaŭlali jamu pra datyčnaść da kradziažoŭ z adnaho doma i padpału druhoha.

Heta nie davała jamu spakoju z taho samaha času.

«Mnie treba było vyjści ź psichałahičnaha stuparu, bo ja jak piśmieńnik nie moh pisać. Taja dumka visieła, pryhniatała mianie», — skazaŭ Adamovič i na ŭdakładnieńnie sudździ pryznaŭ, što kradziež tych rečaŭ byŭ «formaj psichałahičnaj razradki».

Sudździa Vasilevič spytaŭ u Adamoviča, jakuju metu jon staviŭ pierad saboj, pranikajučy na lecišča Laščynskaha i zabirajučy adtul rečy? Padsudny znoŭ skazaŭ pra «psichałahičny dyskamfort», jaki nie davaŭ jamu spakoju. 

U sud Słavamir Adamovič pryjšoŭ apranuty ŭ čorny kaścium z bardovym halštukam-matylkom. Paet skazaŭ, što jamu soramna pierad paciarpiełym, i paprasiŭ prabačeńnia. Dadaŭ, što kali pranikaŭ u dom Laščynskaha, dyk spadziavaŭsia, što «voś-voś pryjdzie haspadar, i heta mianie spynić, ale toj nie prychodziŭ».

Spaliŭ repradukcyi karcin i złamaŭ prajhravalnik

U sudzie vystupiŭ i paciarpieły Siarhiej Laščynski, jaki pracuje ŭ Miensku ŭ Dziaržkamitecie ekspertyz. U vioscy Cahielnia žyli jahonyja prodki.

«Ja zajšoŭ u dom i byŭ u šoku, — skazaŭ Laščynski.— Nie tolki tamu, što šmat rečaŭ źnikła, a što ŭ domie byŭ sucelny pahrom. Ujavicie: vielizarny kufar niejak vydrali sa ściany, trumo, vialikija kresły — jak heta mahčyma było vyciahnuć?! Ślady ad vałačeńnia kufra ciahnulisia ad doma da jara. Žach!»

Paciarpieły admoviŭsia ad maralnych pretenzij da Słavamira Adamoviča, bo bolšaść skradzienych rečaŭ toj viarnuŭ. Pry hetym Siarhiej Laščynski nahadaŭ, što ŭ jaho ŭsio ž zhubilisia dźvie repradukcyi karcin (pavodle materyjałaŭ spravy, Adamovič spaliŭ ich u piečy) i muzyčny prajhravalnik «Vieha», jaki byŭ spraŭny, a ciapier nie pracuje. «Chaj budzie na jahonym sumleńni».

Słavamir Adamovič admoviŭsia ad advakata, jon baronić siabie sam.

U materyjałach spravy jość pašpart hramadzianina Narvehii na imia Adamoviča. Słavamir paćvierdziŭ, što dahetul źjaŭlajecca hramadzianinam i Narviehii, i Biełarusi.

Pavodle ekspertyzy, psichičnaj chvaroby ŭ jaho nie było.

Raniej Słavamir Adamovič u interviju Svabodzie zajaŭlaŭ, što jahonaja sprava sfabrykavanaja i maje «palityčny padtekst».