СК: Даішнік сам спаліў штаны перад смерцю
20.05.2019 / 14:15
20 мая Следчы камітэт правёў брыфінг, прысвечаны смерці 22-гадовага інспектара ДАІ з Магілёва Яўгена Патаповіча. Следчыя прыйшлі да высновы, што міліцыянт інсцэніраваў сваё забойства і здзейсніў суіцыд.
Пазней афіцыйны прадстаўнік СК Юлія Ганчарова агучыла некалькі момантаў, якія не ўзгадавалі падчас брыфінгу.
Па версіі следства, паведамленне ў Viber аб выкраданні сапраўды было адпраўлена загінулым, што пацвярджаецца вывучэннем яго тэлефона, канфіскаванага з месца здарэння.
«Улічваючы устаноўленыя на гэты момант абставіны, следства прыходзіць да высновы, што яно было адпраўлена з месца здарэння самім маладым чалавекам перад суіцыдам для таго, каб яго хутчэй знайшлі, — паведаміла Ганчарова. —
Штаноў на ім не было, бо яны спаленыя з дапамогай вадкасці для распальвання. Па версіі следства, загінулы зрабіў гэта наўмысна».
Таксама Ганчарова акцэнтавала ўвагу на тым, што раненне ў міліцыянта было толькі адно — стрэл у галаву. Бо раней, на фота, якія ўцяклі ў сеціва, была бачная кроў на майтках загінулага. Адразу пачалі з’яўляцца версіі, пра нажавыя раненні ў пах.
«І яшчэ раз акцэнтуем увагу на тым, што ніякіх раненняў у вобласці пахвіны не было, кроў на споднім апынулася там з-за позы. Адзінае зафіксаванае цялеснае пашкоджанне — агнястрэльнае раненне ў галаву. Інфармацыя, якая распаўсюджваецца на асобных Telegram-каналах, з'яўляецца недакладнай. Дрэнная якасць і ракурс фота дазваляюць раскручваць гэтую «версію», бо іх аўтары разумеюць, што здымак буйным планам не будзе апублікаваны па этычных меркаваннях», — заявіла Юлія Ганчарова.