З цэнтральнай плошчы Смаргоні канчаткова прыбралі помнік Леніну
А новае месца для яго выберуць самі смаргонцы.
23.05.2019 / 10:15
Помнік Уладзіміру Леніну з цэнтральнай плошчы Смаргоні прыбралі месяц таму. Спачатку ішла гаворка пра тое, што помнік адновяць і вернуць на сваё месца. Але неўзабаве знеслі і п’едэстал да помніка.
Начальніца аддзела ідэалогіі, культуры і па справах моладзі Смаргонскага райвыканкама Ганна Джумкова патлумачыла, што помнік зараз сапраўды аднаўляюць.
«Гэты помнік не ўяўляе ніякай архітэктурнай ці іншай каштоўнасці. Ён зроблены з цэменту, які з часам пачаў разбурацца. Было два варыянты.
Або пакрываць помнік металам, але гэта вельмі дорага. І думаю, людзі б не зразумелі, каб мы выдаткавалі грошы на гэта. Сёння ёсць больш запатрабаваныя сферы, дзе патрэбныя бюджэтныя грошы.
Або рабіць фармоўку з цэменту. Пасля таго, як працы будуць завершаныя, мы вернем помнік, яго ніхто не будзе разбураць і знішчаць. Правядзем грамадскае абмеркаванне і разам са смаргонцамі вырашым, у якім месцы паставіць Леніна», — расказала Ганна Джумкава.
Што ж датычыцца плошчы, то яна моцна зменіць сваё аблічча.
«У лістападзе ў Смаргоні пройдуць абласныя «Дажынкі», таму да іх і плошчу, і горад у цэлым чакае сур'ёзны рамонт», — абяцае Ганна Джумкова.
Помніку Леніну на адноўленай плошчы месца не знайшлося.