Kiraŭnik DAI kupiŭ taŭnchaus u «Lebiadzinym» za $290 tysiač. Inšy pakupnik addaŭ za takoje žyllo $450 tysiač
26.03.2020 / 13:20
Apošnija hady DAI Biełarusi ŭznačalvaje Dźmitryj Karziuk. Pra jaho treba viedać jak minimum try fakty.
Dźmitryj Karziuk, fota Nadziei Bužan
- Karziuk pryjšoŭ słužyć u DAI jašče ŭ 1993 hodzie. U 37 hadoŭ jon uznačaliŭ DAI Minska, a ŭ 45 — DAI Biełarusi.
- Adno z chobi Karziuka — matacykły. Jak i ŭ eks-ministra ŭnutranych spraŭ Ihara Šunieviča, jak i ŭ syna kiraŭnika krainy Viktara Łukašenki.
- Karziuk hulaje ŭ chakiejnaj kamandzie Alaksandra Łukašenki.
«Naša Niva» daviedałasia, što ŭ studzieni 2020 hoda Karziuk staŭ haspadarom pałovy doma (płošča — kala 275 m2) u kompleksie «Alimpik Park». Nieruchomaść kaštavała jamu ŭ paŭtara raza tańniej, čym jaho susiedziam.
Elitnaje žyllo pobač z zakaźnikam
«Alimpik Park» — žyllovy kompleks na vulicy Ratamskaj. Jaho buduje kampanija «Tapas», źviazanaja z Paŭłam Biełym, napadajučym chakiejnaj kamandy Alaksandra Łukašenki.
Učastak pad budaŭnictva byŭ vydzieleny praz prezidencki ŭkaz. I nieŭzabavie pačaŭsia skandał za skandałam. Praź blizkaść da zakaźnika «Lebiadziny» zabudoŭščyk mieŭ šerah abmiežavańniaŭ, ale ihnaravaŭ ich. Vyšynia budynkaŭ pieravysiła dazvolenyja pakazčyki, pačali vysiakać drevy, a ŭ prybiarežnaj zonie pabudavali restaran.
«Tapas» sprajektavaŭ niekalki piacipaviarchovikaŭ i siamipaviarchovikaŭ, a taksama katedžy na dźvie siamji. Žyllo, vidavočna, elitnaje: paraŭnajcie z 37-paviarchovym murašnikam u susiednim kvartale ŭzdoŭž praśpiekta Pieramožcaŭ. Prosta za voknami pačynajecca zakaźnik, možna prajścisia paŭkiłamietra pieššu da vadaschovišča «Drazdy».
«Alimpik Park», fota Nadziei Bužan
Katedžaŭ na dźvie siamji (tak zvanych «dupleksaŭ») pabudavali šeść. Što ŭjaŭlajuć saboj hetyja zbudavańni?
U kožnaha haspadara svoj paradny ŭvachod i svoj vychad u zakaźnik. Supolnaja tolki adna ściana. Pieršy pavierch cahlany, druhi — z kieramzitabietonnych błokaŭ. Vyšynia stolaŭ — 3 mietry. Kožnamu haspadaru vydzialajecca dva parkovačnyja miescy.
Taŭnchausy na vulicy Ratamskaj, fota Nadziei Bužan
Na sajcie «Alimpik Parka» ŭkazvajucca ceny na hetyja dupleksy. Košt varjirujecca ad $400 tysiač da $500 tysiač. Čym bližej da kraju kompleksu, tym tańniej. Karziuk nabyŭ sabie pałovu samaha tannaha, krajniaha doma.
Skrynšot z sajta «Alimpikparka»
Darečy, pałovu adnaho z samych darahich damoŭ niadaŭna nabyła Aksana Sidorskaja, dačka eks-premjera Siarhieja Sidorskaha.
Niekali na raźmierkavańni jana pracavała ŭ banku, paśla ŭ adnym z mabilnych apierataraŭ, adkul syšła na pracu ŭ minski «Dom Maskvy» (kulturny-dziełavy centr dla prasoŭvańnia kaštoŭnaściaŭ «ruskaha śvietu»). A kali pajšła ŭ dekret, zadumałasia pra ŭłasnuju spravu. Razam z mužam-dyzajnieram adkryła «prastoru dla estetyčnaha i fizičnaha raźvićcia dziaciej i darosłych». U intervju Probusiness.io jana pryznavałasia, što ramont u pamiaškańni kaštavaŭ kala $50 tysiač: «Častku hrošaj ukłali my z mužam, častku ŭziali ŭ doŭh u baćkoŭ».
Tym nie mienš, addajučy doŭh baćkam, Aksana Sidorskaja nabyła dupleks. Na sajcie «Tapasa» ŭkazvajecca jaho prybliznaja cana — $500 tysiač.
Aksana Sidorskaja z mužam. Fota Probusiness.io
Kolki ž zapłaciŭ Karziuk?
«Naša Niva» zapytała vypisku z Rejestra cen na ziamielnyja ŭčastki. Pavodle dakumienta Nacyjanalnaha kadastravaha ahienctva, u studzieni 2020 hoda ŭ «Alimpik Parku» było zaklučana niekalki ŭhodaŭ:
- 20 studzienia taŭnchaus płoščaj 279,2 m2 byŭ nabyty za $449 tysiač. Kvadratny mietr kaštavaŭ $1606.
- 27 studzienia taŭnchaus płoščaj 273,6 m2 byŭ nabyty za $288 tysiač u ekvivalencie. Kvadratny mietr kaštavaŭ $1052.
- 31 studzienia kvatera ŭ susiednim siamipaviarchoviku (taksama ŭ składzie «Alimpik Parka») płoščaj 207,6 m2 była nabyta za $346 tysiač u ekvivalencie. Kvadratny mietr kaštavaŭ $1665.
U vočy kidajecca nievierahodnaja roźnica u canie kvadratnaha mietra. Jak niaciažka zdahadacca, pałovu katedža pa $1050 za mietr nabyŭ mienavita kiraŭnik DAI Biełarusi Dźmitryj Karziuk.
Aceńvać realny košt jaho žylla składana, bo jaho taŭnchaus — i nie kvatera, i nie paŭnavartasny katedž. Adnak u lubym razie za takija hrošy ničoha prystojnaha nie kupiš. Pavodle Realt.by, siaredni košt kvadratnaha mietra na druhasnym rynku žylla składaje $1477, na pieršasnym — $1334.
Ale ŭ lubym razie zastajecca niezrazumiełym, čamu kampanija «Tapas» vyrašyła zrabić dla kiraŭnika DAI źnižku pamieram bolš za $100 tysiač u paraŭnańni z koštam susiednich taŭnchausaŭ.
«Naša Niva» nieadnarazova sprabavała źviazacca ź Dźmitryjem Karziukom praz pres-słužbu MUS, ale marna.
Dadatkovy katedž pad Minskam
Admietna, što piać hadoŭ tamu Karziuk užo pabudavaŭ sabie dom. Jon nabyŭ na aŭkcyjonie ŭčastak u vioscy Źvianiačy za 20 kiłamietraŭ ad Minska. Heta miesca pobač z katedžnym pasiołkam haspadaroŭ rynka ŭ «Ždanovičach», jakija nieŭzabavie mohuć stracić svajo žyllo.
Pasiołak u Źvianiačach, fota Nadziei Bužan
Ciapier u Źvianiačach staić dom Karziuka, jaho płošča — kala 250 m2.
fota Nadziei Bužan
***
Dźmitryj Karziuk
Naradziŭsia ŭ 1971 hodzie ŭ Minsku. U orhanach unutranych spraŭ — z 1993 hoda. Słužyŭ inśpiektaram DPS, kamandziram uzvoda, kamandziram asobnaj roty DPS, načalnikam adździeła DPS i prafiłaktyki UDAI HUUS Minharvykankama.
U 2008-2009 hadach uznačalvaŭ DAI Partyzanskaha rajona Minska, u 2009-2016 — načalnik DAI MInska.
Z 2016 uznačalvaje DAI Biełarusi.