Nieardynarny baciuška z Homiela atrymaŭ užo 25 sutak aryštu: čamu jaho nie baronić BPC?
28.09.2020 / 19:31
Pravasłaŭnaha śviatara Uładzimira Drabyšeŭskaha 28 vieraśnia pavinny byli vypuścić ź izalatara, dzie jon adbyvaŭ 10-dzionny aryšt. Adnak jaho znoŭ pavieźli ŭ sud, vynik — jašče 15 sutak aryštu.
Drabyšeŭski — heta toj dvuchmietrovy śviatar, jaki 13 žniŭnia ŭ sutanie vyjšaŭ da homielskaha Śledčaha kamiteta z płakatam «Spynicie hvałt». «Naša Niva» sabrała cikavyja fakty pra hetaha nieardynarnaha śviatara.
Uładzimir Drabyšeŭski. Fota kp.by.
Ajcu Uładzimiru Drabyšeŭskamu (papularnaje ŭ Homieli proźvišča) 42 hady. Dvaccać ź ich jon pravioŭ u sanie śviatara. Trynaccać apošnich hadoŭ baciuška słužyŭ u chramie śviatoha Iana Karmianskaha ŭ Homieli. Da hetaha davodziłasia šmat dzie pasłužyć, u tym liku ŭ vioskach.
Pa adukacyi Drabyšeŭski — inžynier-sistematechnik, skončyŭ Homielski dziaržaŭny ŭniviersitet, ale pa śpiecyjalnaści pracavać nie daviałosia, bo jašče ŭ čas studenctva staŭ na šlach śviatarstva, kali zakančvaŭ VNU ŭžo byŭ dyjakanam.
Bahasłoŭ Natałka Vasilevič kaža, što ajciec Drabyšeŭski mieŭ aŭtarytet siarod viernikaŭ. «Heta intelektuał, u nas ź im było šmat bahasłoŭskich sprečak, u tym liku pra ajca Sierhija Bułhakava. Ale jaho pavažali nie tolki intelektuały, jość videa, jak Uładzimira sprabujuć adbić carkoŭnyja žančyny ŭ siłavikoŭ».
Naprykancy lipienia Drabyšeŭski byŭ pazbaŭleny prava śviaščennasłužeńnia, ale zastaŭsia ŭ sanie. Sprava ŭ tym, što śviatara chacieli pieravieści z Homiela nastajacielem u viosku Staraja Bielica ŭ rajonie. Jaho zaprasili a 12 hadzinie na jeparchijalny saviet, ale prajšła ŭžo hadzina ŭ čakańni, a jaho ŭsio nie vyklikali. Tady baciuška prosta pakinuŭ pamiaškańnie. Jamu zvanili i prasili viarnucca, ale toj nie zachacieŭ. U vyniku ŭ toj ža viečar jaho pazbavili prava słužyć na terytoryi Homielskaj jeparchii i zvolnili z carkvy.
U intervju «Mocnym navinam» śviatar tłumačyŭ, što spačatku ź jepiskapam Ściafanam u jaho byli pryjaznyja adnosiny, a potym stali paharšacca. Naprykład, Drabyšeŭski zajmaŭ zusim inšuju pazicyju, čym jeparchijalnaje načalstva adnosna situacyi z karanavirusam. Jon ličyŭ, što hetuju prablemu nie varta niedaaceńvać, a naadvarot usialak zaścierahacca. Asabliva heta stała aktualna, kali stali chvareć homielskija kliryki. Drabyšeŭski miarkuje, što mienavita za hetyja roznahałośsi jaho i mahli sasłać u viosku.
Pry hetym sana baciušku nie pazbaŭlali, jamu było prapanavana znajści pracu ŭ inšaj jeparchii. To-bok pracuj dzie zaŭhodna, ale nie ŭ Homieli.
Drabyšeŭski — šmatdzietny baćka, u jaho šaściora dziaciej. Starejšaja skončyła škołu, małodšamu — dzieviać hadoŭ. Transpartu ŭ jaho niama, pierajazdžać, majučy takuju vialikuju siamju, u inšaje miesca dla jaho vielmi prablematyčna.
Taja akcyja la Śledčaha kamiteta była nie adzinaj, u jakoj udzielničaŭ ajciec Drabyšeŭski, mienavita tamu, mabyć, jaho ŭžo asudzili ŭ druhi raz. Adznačym, što Drabyšeŭski taksama ŭvajšoŭ u Kaardynacyjnuju radu, stvoranuju paśla vybaraŭ.
Čamu BPC nie baronić svajho śviatara ŭ sudach? Pres-sakratar BPC Siarhiej Lepin paviedamiŭ «NN», što ŭładyka Vienijamin maje infarmacyju pa hetaj spravie. «Sočym, uładyka infarmavany», — adkazaŭ jon. Tym nie mienš, nijakich chadajnictvaŭ u sud z boku BPC nie dasyłałasia.
Kiraŭnik infarmacyjnaha adździełu Homielskaj jeparchii Aleh Kastrama adznačyŭ, što da ichniaj jeparchii Uładzimir Drabyšeŭski nie maje nijakaha dačynieńnia, za jahonymi źniavoleńniami tam nie sočać. «Uładyka Ściafan zaraz adsutničaje, navat nie viedaju, ci jon u kursie», — adkazaŭ ajciec Aleh. Toje, što heta adbyvajecca na terytoryi Homielskaj jeparchii dla ich taksama ničoha nie značyć. «U nas na terytoryi jeparchii šmat śviataroŭ z Rasii žyvie, ale pracujuć u inšym miescy, jakoje heta maje da nas dačynieńnie?»
Uładzimir Drabyšeŭski kazaŭ, što na akcyi pajšoŭ by i kali b zastavaŭsia ŭ štacie Homielskaj jeparchii.
«Čamu Patryjarch moža za Pucina ahitavać, jepiskap Huryj — za Łukašenku, a ja, prosty pop, vyjdu z płakatam «Svabodu palitviaźniam» — mnie adrazu paviesiać jarłyk «palitykan»?
Ludzi siadziać za toje, što źbirali podpisy. Heta fantastyčnyja historyi z punktu hledžańnia jurydyčnaha prava. I heta ž nie 1950-ja, kali adzinaja krynica — haziety «Praŭda» i «Iźviestija». Kali heta ŭsio na jutubie, u fejsbuku, u tielehramie. Kali pa BT kažuć «bankir sprabavaŭ skraści karciny i vyvieźci», a ty, navat kali nie sačyŭ za hetaj historyjaj, huhł čytaješ i razumieješ, kudy źnikli hetyja karciny, pačynaješ pytać, što ŭ nas adbyvajecca», — kazaŭ Drabyšeŭski «Mocnym navinam».