Paplečnik Vaskrasienskaha Mikałaj Sierykaŭ raskazaŭ pra siabie: Letaś zvolniŭsia z KDB, byŭ u štabie Capkały, a ciapier pavieryŭ Juru
24.11.2020 / 22:15
Mikałaj Sierykaŭ — u minułym siabra inicyjatyŭnaj hrupy Valeryja Capkały. Na siońnia jon staŭ adnym hałoŭnych piersanažaŭ «kruhłaha stała», jaki ładzić Juryj Vaskrasienski. Pry hetym pra Sierykava amal ničoha nie viadoma.
«Naša Niva» pasprabavała likvidavać hety prabieł i zadała jamu niekalki pytańniaŭ.
«Naša Niva»: Mikałaj, raskažycie trochu pra siabie.
Mikałaj Sierykaŭ: Ja były vajennasłužačy.
«NN»: Mienavita vajskoviec? Bo isnujuć viersii, što vy i ŭ raźviedcy pracavali, i ŭ KDB. Dzie tut praŭda?
MS: Ja čytaŭ. Ja vučyŭsia ŭ Vajskovaj akademii ŭ Minsku na fakultecie suviazi aŭtamatyzavanych sistem kiravańnia. Paśla vypusku słužyŭ aficeram u supraćpavietranaj abaronie ŭ Hrodnie. Pa skančeńni pieršaha kantrakta pieravioŭsia ŭ orhany dziaržbiaśpieki va ŭpraŭleńnie vajskovaj kontrraźviedki. Adsłužyŭ tam pieršy kantrakt, pa skančeńni jakoha zvolniŭsia ŭ 2019 hodzie.
«NN»: Kolki hadoŭ vy sumarna addali orhanam?
MS: Piać hadoŭ u vojsku i dva hady ŭ kontraraźviedcy. Ad maja 2020 hoda aktyŭna ŭklučyŭsia ŭ vybarčuju kampaniju, byŭ členam inicyjatyŭnaj hrupy Valeryja Capkały, adnym z kaardynataraŭ štaba pa Leninskim rajonie Minska.
«NN»: Mnie kazali, što vas nie było ŭ śpisach siabroŭ inicyjatyŭnaj hrupy.
MS: My byli źviazanyja z kaardynatarami štaba. Śviatasłaŭ Barbuk (u minułym adzin z kiraŭnikoŭ minskaha BRSM — «NN»), jaki kaardynavaŭ uvieś horad, i kiraŭnik usiaho štaba Andrej Łankin. Z Łankinym dobra paznajomilisia padčas pracy, kali źbirali podpisy. Kali CVK nie zarehistravaŭ Capkału, to štab spyniŭ svajo isnavańnie. Potym adbyłosia hetaje abjadnańnie (z Babarykam i Cichanoŭskaj — «NN»). My pieražyvali za los, za toje, jak buduć padziei raźvivacca, byli na suviazi z Łankinym, pastajanna stasavalisia.
«NN»: U abjadnanym štabie vas nie było?
MS: Nie. Była raźvitalnaja narada sa štabam Capkały — i ŭsio. Niekatoryja, kaniečnie, pierajšli. My ž pastajanna byli na suviazi, stelefanoŭvalisia, kaho zatrymali, kaho — nie. Łankin byŭ znajomy z Vaskrasienskim. Ja taksama sustrakaŭsia ź Juryjem na Kamaroŭcy, tam ža ŭsie źbirali podpisy, stasavalisia. Kali Juryja zatrymali, to my sačyli za hetym. Niejak my pahavaryli z Łankinym i, hruba kažučy, pavieryli Juru. Čamu b nie pasprabavać?
«NN»: Čamu vy syšli ź siłavych struktur?
MS: Mabyć, nie majo. Ja nie takoje ŭjaŭlaŭ i čakaŭ. Paŭsiul tolki pa adnym kantrakcie.
«NN»: Čamu padtrymali Capkału?
MS: Kali daviedaŭsia, što Valeryj Viljamavič vyłučajecca, to pačytaŭ jaho bijahrafiju, prahramu, i padumaŭ, što dastojny kandydat. Jon i ekanamična hramatny, i maje vialiki dośvied, i ŭ palitycy papracavaŭ, i ruliŭ takoj machinaj, jak PVT, i mižnarodny ŭzrovień. Hatovy kandydat byŭ.
«NN»: Vy jaho ŭsprymali jak apazicyjnaha kandydata?
MS: Kaniečnie. Usie siabry inicyjatyŭnaj hrupy tolki tak usprymali. Kali havaryli, što spojler, my nie vieryli, my pajšli za daśviedčanym, razumnym čałaviekam.
«NN»: U vas zastałosia šmat znajomych u orhanach? Jakija tam nastroi?
MS: Tak, šmat. Ja skažu tak, adnosiny va ŭsich roznyja. U lubym razie, jany nastrojenyja tak, što svaje funkcyjanalnyja abaviazki i zadačy buduć vykonvać.
«NN»: Čaho čakajecie ad kruhłaha stała Vaskrasienskaha?
MS: Chočam, kab pabolej ludziej i bakoŭ byli ŭciahnutyja ŭ hety praces. My ničoha nie kuplajem i nie pradajom, my — aŭkcyjonny dom. My dajem placoŭku i ŭhavorvajem ludziej vykazacca. Chočam dabicca amnistyi dla palityčnych. Kali hetaha dabjomsia, budzie dobra. Vybarčy praces uskryŭ šmat prablem, treba mianiać vybarčuju sistemu. Mnie padabajecca, što my dyskutujem vakoł Kanstytucyi, jakuju ŭžo treba mianiać. My jak nacyja stali bolš darosłyja, i treba dakładna prapisać usio, kab u Kanstytucyi nie byli dvajakich momantaŭ.
«NN»: Vas nie zatrymlivali paśla vybaraŭ?
MS: Nie.