У Венесуэле гіперінфляцыя: новая банкнота мільён балівараў — гэта ўсяго паўдаляра
07.03.2021 / 11:21
Венесуэла ўжо амаль тры гады знаходзіцца ў цяжкім сацыяльна-эканамічным крызісе, на фоне гіперінфляцыі краіна запускае ў абарачэнне новыя банкноты наміналам 200 тысяч, 500 тысяч і 1 млн балівараў, перадае dw.com.
«Новыя банкноты наміналам 200 тыс. (0,11 даляра ЗША), 500 тыс. (0,27$) і 1 млн суверэнных балівараў (0,53$) пачнуць паступова ўводзіцца ў абарачэнне з 8 сакавіка 2021 года», — гаворыцца ў паведамленні, апублікаваным на сайце Цэнтрабанка ў Каракасе ў пятніцу, 5 сакавіка. У Цэнтрабанку выказалі ўпэўненасць у тым, што новыя купюры задаволяць патрэбы нацыянальнай эканомікі.
Венесуэла ўжо амаль тры гады знаходзіцца ў стане цяжкага сацыяльна-эканамічнага крызісу. Па выніках 2018 года інфляцыя ў краіне склала 1,7 млн працэнтаў, а 2019 — больш 9585 працэнтаў. У якасці адной з мер умацавання эканомікі ўлады краіны ўвялі новую валюту — суверэнны балівар, аднак і яго курс моцна ўпаў: у цяперашні час 1 даляр ЗША каштуе больш за 1,8 млн балівараў.
У лютым 2020 года Bloomberg паведаміў, што друкаваць новыя банкноты для Венесуэлы будзе расійская кампанія «Госзнак», прычым плануецца выпусціць 300 млн новых банкнот наміналам ад 10 тыс. да 50 тыс. суверэнных балівараў. У самой расійскай кампаніі адмовіліся каментаваць гэтае паведамленне.