Hod tamu startavała, mahčyma, hałoŭnaja vybarčaja kampanija niezaležnaj Biełarusi. Jak heta było
8 maja 2020 hoda ŭ Biełarusi startavała vybarčaja kampanija, vynikam jakoj stała zusim źmienienaja kraina. I hetaja prezidenckaja honka ašałamlalna adroźnivajecca ad usich papiarednich kolkaściu padziej, ich nasyčanaściu, a hałoŭnaje — vynikami.
08.05.2021 / 10:06
Tut.by uspaminaje hałoŭnyja padziei apošniaj prezidenckaj kampanii.
Fota: Darja Burakina, TUT.BY
8 maja. Abvieščanaja data vybaraŭ
Deputaty Pałaty pradstaŭnikoŭ hałasujuć i vybirajuć 9 žniŭnia jak asnoŭny dzień vybaraŭ. Pierad pačatkam hałasavańnia pierad deputatami vystupaje kiraŭnik CVK Lidzija Jarmošyna. Jana prapanuje pravieści prezidenckija vybary 9 žniŭnia. Pakolki, zhodna z zakanadaŭstvam, krajni dzień praviadzieńnia vybaraŭ 30 žniŭnia, a vybary pavinny prajści ŭ niadzielu, deputaty pavinny byli vybrać z čatyroch dat: 9, 16, 23 i 30 žniŭnia.
Fota: Darja Burakina, TUT.BY
Kampanija aficyjna startuje i ciapier inicyjatyŭnyja hrupy patencyjnych kandydataŭ u prezidenty mohuć padavać u CVK dakumienty na rehistracyju.
U hety ž dzień eks-kiraŭnik PVT Valeryj Capkała i błohier Siarhiej Cichanoŭski, jaki ŭ toj momant adbyvaje 15-sutačny aryšt, zajaŭlajuć, što buduć udzielničać u vybarach.
12 maja. Babaryka idzie na vybary
Ab svaim udziele ŭ vybarach, zajaŭlaje kiraŭnik Biełhazprambanka Viktar Babaryka. U hety ž dzień bank paviedamlaje, što Babaryka vyjšaŭ sa składu praŭleńnia i zvolniŭsia z pasady staršyni praŭleńnia pa ŭłasnym žadańni.
Fota: Miron Klimovič, TUT.BY
- Ja nie naiŭny čałaviek i vydatna razumieju tyja miežavyja ŭmovy i praviły hulni, jakija sfarmavanyja na hetym poli ŭ Biełarusi, a samaje hałoŭnaje — finalnuju častku hetaha «dziejstva», jakaja była sfarmulavanaja jašče ŭ epochu Stalina: usio roŭna, jak hałasujuć, važna, jak ličym, — zajaŭlaje Babaryka, kamientujučy svajo vyłučeńnie ŭ prezidenty.
15 maja. Cichanoŭskaja idzie na vybary
Apošni dzień padačy dakumientaŭ na rehistracyju inicyjatyŭnaj hrupy kandydata ŭ prezidenty. I tut prezidenckaja kampanija idzie na rekord — dakumienty padali 55 čałaviek.
Ale zarehistravana było tolki 15 inicyjatyŭnych hrup: eks-bankira Viktara Babaryki, eks-kiraŭnika PVT Valeryja Capkały, kiraŭnika Biełaruskaj sacyjał-demakratyčnaj Hramady (BSDH) Siarhieja Čeračnia, sustaršyni BCHD Volhi Kavalkovaj, kiraŭnika Ruchu «Za Svabodu» Jurasia Hubareviča, v.a. staršyni AHP Mikałaja Kazłova, eks-deputata Hanny Kanapackaj, sustaršyni «Havary praŭdu» Andreja Dźmitryjeva, majstra piermanientnaha makijažu i tatuiroŭki, muzykanta Alaksandra Taboliča.
Błohieru Siarhieju Cichanoŭskamu ŭ rehistracyi inicyjatyŭnaj hrupy CVK admaŭlaje «ŭ suviazi z parušeńniem paradku padačy dakumientaŭ».
Fota: Volha Šukajła, TUT.BY
U adkaz na heta žonka błohiera Śviatłana Cichanoŭskaja zajaŭlaje, što budzie sama ŭdzielničać u vybarach u jakaści kandydata ŭ prezidenty. Jaje inicyjatyŭnuju hrupu taksama rehistrujuć.
21 maja. Zbor podpisaŭ
Startuje zbor podpisaŭ za kandydataŭ u prezidenty. U termin da 19 červienia 15 inicyjatyŭnych hrup pavinny sabrać pa 100 tysiač podpisaŭ, kab ich vyłučenca zarehistravali ŭ jakaści kandydata.
Zbor podpisaŭ prachodzić z razmacham: padpisacca za Babaryku, Cichanaŭskuju i Capkału vystrojvajucca vializnyja čerhi pa ŭsioj Biełarusi. Pikiety Za Łukašenku pakul vyrašana nie pravodzić.
Fota: Aleś Pilecki, TUT.BY
Budučyja alternatyŭnyja kandydaty pravodziać sustrečy ź ludźmi. Usie, akramia Śviatłany Cichanoŭskaj — zamiest jaje na miescach zboru podpisaŭ staić jaje kardonnaja vyjava.
Fota: Vadzim Zamiroŭski, TUT.BY
Siarhiej Cichanoŭski ŭ jakaści davieranaj asoby svajoj žonki i kiraŭnika inicyjatyŭnaj hrupy jeździć pa krainie i razmaŭlaje ź biełarusami, jakija stajać u čerhach, kab pakinuć svoj podpis za ŭčarašniuju chatniuju haspadyniu.
25 maja. 200 tysiač podpisaŭ za Łukašenku
«Biełaja Ruś» rapartuje, što inicyjatyŭnaja hrupa pa vyłučeńni Alaksandra Łukašenki kandydatam u prezidenty ŭžo sabrała 200 tysiač podpisaŭ pry 100 tysiačach nieabchodnych. Nivodnaha pikietu pa zbory podpisaŭ za Łukašenku na toj momant nie pravodziłasia.
Fota: Volha Šukajła, TUT.BY
U «Biełaj Rusi» tłumačać, što ŭ arhanizacyi 190 tysiač členaŭ, jakija padpisalisia za Łukašenku. Jašče 10 tysiač podpisaŭ sabranyja praz hramadskija pryjomnyja arhanizacyi.
29 maja. Łukašenka vykazvajecca, Cichanoŭskaha zatrymlivajuć
Dniom Alaksandr Łukašenka pieršy raz vykazvajecca pra svaich hałoŭnych apanientaŭ: abvinavačvaje Babaryku ŭ chłuśni, namiakaje, što zvolniŭ Capkału z PVT nie prosta tak, nazyvaje Cichanoŭskaha «šałudzivym».
Uviečary ŭ Hrodnie, dzie inicyjatyŭnaja hrupa Śviatłany Cichanoŭskaj pad kiraŭnictvam jaje muža źbiraje podpisy za vyłučeńnie, adbyvajecca dziŭny kanflikt pamiž žančynaj i Siarhiejem Cichanoŭskim. Błohiera i jašče dzieviaciarych ź jaho kamandy zatrymlivajuć.
Fota: Anžalika Vasileŭskaja, TUT.BY
«Adzin z supracoŭnikaŭ milicyi padvierhnuŭsia napadu», — paviedamiŭ paśla incydentu dziaržtelekanał «Biełaruś 1».
«Heta pravakacyja», - kazaŭ Siarhiej Cichanoŭski da taho, jak jaho schapiŭ AMAP.
Da incydentu šmat pytańniaŭ i ŭ žurnalistaŭ, i va ŭsich karystalnikaŭ sieciva, chto bačyŭ videa.
Raspačynajecca kryminalnaja sprava ab hvałcie ŭ dačynieńni da supracoŭnikaŭ orhanaŭ unutranych spraŭ. Pa joj prachodziać dzieviać čałaviek: Siarhiej Cichanoŭski, Jaŭhien Raźničenka, Dźmitryj Furmanaŭ, Uładzimir Navumik, Viarhilij Ušakoŭ, Alaksandr Aranovič, Siarhiej Kałmykoŭ, Vasil Babroŭski i Arciom Sakaŭ.
Paźniej Siarhieju Cichanoŭskamu i jašče siami asobam pradjaviać abvinavačvańnie jašče pa niekalkich artykułach.
3 červienia. Rumas — usio
Alaksandr Łukašenka adpraŭlaje ŭ adstaŭku dziejny skład urada na čale ź Siarhiejem Rumasam. Niezadoŭha da hetaha — 25 maja — Łukašenka zajaŭlaŭ ab namiery da vybaraŭ sfarmavać novy skład urada. Paśla jon paabiacaŭ «u bližejšy čas» pryznačyć vykanaŭcu abaviazkaŭ premjer-ministra, a «paśla vybaraŭ, kali jon budzie dobra pracavać, to zaćvierdzić na pasadzie».
4 červienia. Novy premjer, 900 tysiač za kanapaj
Łukašenka pryznačaje novym premjeram Ramana Hałoŭčanku, taksama pryznačajucca novyja vice-premjery.
Raman Hałoŭčanka. Fota: Reuters
Jašče adna važnaja pierastanoŭka — novym staršynioj Kamiteta dziaržaŭnaha kantrolu pryznačany Ivan Cierciel — raniej jon pracavaŭ na pasadzie namieśnika staršyni KDB.
U hety ž dzień stanovicca viadoma, što ŭ dačnym domie błohiera Siarhieja Cichanoŭskaha padčas treciaha pieratrusu znajšli 900 tysiač dalaraŭ — častka sumy była vyjaŭlenaja dzieści za kanapaj, astatniaje — u adkrytych miescach.
Adkul u błohiera takija hrošy nie viedali ni jaho žonka, ni siabry.
Cikava, što 900 tysiač dalaraŭ «rastvoracca» ŭ pracesie rasśledavańnia «spravy Cichanoŭskaha»: pra ich siłaviki z tych časoŭ nie zhadali ni razu da maja hetaha hoda. Litaralna dniami Hienprakuratura zajaviła, što charaktar upakoŭki značnaj častki hrošaj, sieryjnaść numaroŭ banknot u pačkach pakazvali na ich adnamomantavaje atrymańnie ŭ bankaŭskich abo inšych finansavych arhanizacyjach.
5 červienia. Pieršy pikiet za Łukašenku
U Minsku prachodzić pieršy pikiet pa zbory podpisaŭ za vyłučeńnie Alaksandra Łukašenki. Na im kiraŭnik inicyjatyŭnaj hrupy Łukašenki Michaił Arda zajaŭlaje ab zbory kala 1 młn podpisaŭ za ich kandydata.
Fota: Volha Šukajła, TUT.BY
11 červienia. U Biełhazprambank pryjšli
U ofisy Biełhazprambanka i niekalkich pryvatnych kampanij prychodziać siłaviki.
DFR Dziaržkantrolu raspačynaje kryminalnuju spravu pa č. 2 art. 243 «Uchileńnie ad vypłaty padatkaŭ i zboraŭ u asabliva bujnym pamiery» i pa č. 2 art. 235 «Lehalizacyja srodkaŭ, atrymanych złačynnym šlacham, u asabliva bujnym pamiery». U jakaści padazravanych pa kryminalnaj spravie prachodziać pradstaŭniki kamiercyjnych struktur, byłyja i dziejučyja rabotniki bankaŭskaj sistemy. Sam Viktar Babaryka pa spravie pakul nie prachodzić.
Fota: Vadzim Zamiroŭski, TUT.BY
U hety ž dzień Śviatłana Cichanoŭskaja zajaŭlaje, što zdymaje svaje pikiety pa zbory podpisaŭ u Minsku i abłasnych haradach z-za aściarohi, što tam mohuć adbycca pravakacyi ŭ dačynieńni da zborščykaŭ podpisaŭ. Da hetaha było zatrymana bolš za 10 siabraŭ inicyjatyŭnaj hrupy Cichanoŭskaj.
18 červienia. Pryjšli pa Babaryku
Zatrymanyja pretendent na pasadu prezidenta Viktar Babaryka i jaho syn Eduard, kiraŭnik jaho inicyjatyŭnaj hrupy.
Kiraŭnik KDK Ivan Cierciel paviedamlaje, što Viktar Babaryka «zatrymany ŭ suviazi z tym, što źjaŭlaŭsia niepasrednym arhanizataram supraćpraŭnaj dziejnaści, sprabavaŭ uździejničać na śviedak, schavać ślady raniej učynienych złačynstvaŭ i litaralna na dniach źniać bujnuju sumu hrošaj z padkantrolnych jamu rachunkaŭ».
Na dumku kiraŭnika KDK «za dziejnaściu Babaryka stajali lalkavody ŭ «Hazpramie», a moža być, i vyšej». Cierciel zajaŭlaje, što spravy raspačatyja pa šaści artykułach Kryminalnaha kodeksa: art. 243 (Uchileńnie ad vypłaty sum padatkaŭ, zboraŭ), art. 235 (lehalizacyja («admyvańnie») srodkaŭ, atrymanych złačynnym šlacham), art. 210 (Kradziež šlacham złoŭžyvańnia słužbovymi paŭnamoctvami), art. 209 (machlarstva), art. 430 (Atrymańnie chabaru), art. 431 (Dača chabaru). Zatrymanyja kala 20 čałaviek.
Viktar i Eduard Babaryka źmiaščajucca ŭ SIZA KDB.
Uviečary hetaha ž dnia ŭ centry Minska vystrojvajecca łancuh salidarnaści ź Viktaram i Eduardam Babaryka dy inšymi zatrymanymi. Akcyja doŭžycca bolš za šeść hadzin, ludzi stajać pad praliŭnym daždžom i razychodziacca tolki bližej da hadziny nočy. Padčas akcyi adbyvajucca kropkavyja zatrymańni.
Fota: Dźmitryj Bruško, TUT.BY
U «Łancuh salidarnaści» ludzi buduć vychodzić jašče try dni. Za hety čas budzie zatrymana bolš za 360 čałaviek u 19 haradach, za jakija jany atrymajuć sumarna 105 sutak aryštu, 50 tysiač rubloŭ štrafaŭ.
24 červienia. Babaryka i Capkała padajuć dakumienty
Eks-kiraŭnik PVT Valeryj Capkała i kamanda Viktara Babaryki, jaki znachodzicca ŭ SIZA KDB, padajuć u CVK dakumienty na rehistracyju kandydatami ŭ prezidenty. Capkała za svajo vyłučeńnie sabraŭ 160 tysiač podpisaŭ, Babaryka — amal 435 tysiač podpisaŭ.
Fota: Volha Šukajła, TUT.BY
Śviatłana Cichanoŭskaja dakumienty ŭ CVK pryniasie 30 červienia.
CVK pravieryć podpisy i ahučyć, što nieabchodny paroh u 100 tysiač podpisaŭ pieraadoleli 6 pretendentaŭ. U Viktara Babaryka — 165 744, u Alaksandra Łukašenki — 1 939 572, u Hanny Kanapackaj — 146 588, u Siarhieja Čeračnia — 143 109, u Andreja Dźmitryjeva — 106 841, u Śviatłany Cichanoŭskaj — 104 757 podpisaŭ.
Pavodle źviestak CVK, tolki eks-kiraŭnik PVT i dypłamat Valeryj Capkała nie sabraŭ dastatkova podpisaŭ: paśla pravierak u jaho zastałosia 75 249 podpisaŭ.
28 červienia. «Budzie cikava»
«Vybary buduć vielmi cikavymi, a paśla vybaraŭ - budzie jašče cikaviej. Heta ja vam abiacaju « — zajaŭlaje Alaksandr Łukašenka na zakrytym vystupie pierad aktyvam Minskaj vobłaści.
Jon taksama pryznaje, što heta jon «daŭ sihnał ź Cichanoŭskim. Ja niešta nie tak rabiŭ? Ja pieražyvaŭ za svaju krainu, za jakuju ja pakul jašče adkazvaju. I budu adkazvać zaŭsiody — u lubym jakaści», — zajaŭlaje Łukašenka.
9 lipienia. Užo 76%
Palityčny ahladalnik Biełteleradyjokampanii Andrej Kryvašejeŭ paśla sustrečy z Łukašenkam publikuje na svajoj staroncy ŭ Facebook «śviežuju sacyjałohiju» ad Apieratyŭna-analityčnaha centra. Jak śćviardžajecca ŭ dakumiencie, rejtynh Łukašenki na lipień miesiac składaje 76%.
14 lipienia. Babaryku i Capkału nie puskajuć na vybary
Centrvybarkam admaŭlaje ŭ rehistracyi kandydatami dvum samym papularnym alternatyŭnym pretendentam-Viktaru Babaryka i Valeryju Capkała.
Kandydatami ŭ prezidenty rehistrujuć Śviatłanu Cichanoŭskuju, Alaksandra Łukašenku, Hannu Kanapackuju, Andreja Dźmitryjeva, Siarhieja Čeračnia.
Fota: Volha Šukajła, TUT.BY
Uviečary ŭ haradach Biełarusi prachodziać šmatlikija akcyi pratestu suprać nierehistracyi Babaryki i Capkały, bolš za 250 čałaviek zatrymanyja.
15 lipienia. Čerhi ŭ CVK
Da CVK vystrojvajucca čerhi achvotnych padać skarhu na admovu ŭ rehistracyi dvuch pretendentaŭ na prezidenckuju pasadu. Kala piaci hadzin viečara pad apładysmienty i kryki padtrymki padaje skarhu i kamanda Viktara Babaryki.
Fota: Darja Burakina, TUT.BY
Na prylehłych da CVK vulicach ŭvieś čas dziažuryć AMAP. Zatrymańni pačynajucca paśla zakryćcia CVK, kali ludzi razychodziacca.
16 lipienia. Abjadnańnie ŭ tryumvirat
Śviatłana Cichanoŭskaja zajaŭlaje, što abjadnoŭvajecca z kamandami Babaryka i Capkała. Pradstaŭlać abjadnanuju kamandu ciapier budzie žanočy tryumvirat: kandydat u prezidenty Śviatłana Cichanoŭskaja, Vieranika Capkała i Maryja Kaleśnikava.
Fota: Štab Viktara Babaryki
19 lipienia. «Nie dačakajeciesia»
U biełaruskich sacyjalnych sietkach pačynaje kursiravać infarmacyja ab tym, što Alaksandr Łukašenka ekstrana špitalizavany z hipiertaničnym kryzam
«Nie dačakajeciesia», — adkazvaje na heta pres-sakratar Alaksandra Łukašenki Natalla Ejsmant.
Uviečary hetaha ž dnia ŭ Minsku ŭ parku Družby narodaŭ prachodzić pieršy mitynh Śviatłany Cichanoŭskaj ź jaje paplečnicami Kaleśnikavaj i Capkała. Mitynh stanovicca siensacyj — na jaho, pa padlikach pravaabaroncaŭ, dobraachvotna i biez raznaradki pryjšło bolš za 7 tysiač čałaviek.
Fota: Źmicier Bruško, TUT.BY
Cichanoŭskaja, Kaleśnikava i Capkała pačynajuć jeździć pa krainie, źbirajučy ŭsiudy šmattysiačnyja mitynhi.
Taksama abjadnanyja štaby prapanujuć nasić da vybaraŭ i prychodzić na vybarčy ŭčastak z paviazanaj biełaj stužačkaj na ruce, kab bačyć adnadumcaŭ, jakija vystupajuć za pieramieny.
21 lipienia. «Ale heta praŭda»
Kandydaty ŭ prezidenty pačynajuć vystupać u pramym efiry pa dziaržTB. Usie, akramia Alaksandra Łukašenki.
Adna z samych mocnych pramovaŭ — u Śviatłany Cichanoŭskaj.
- Pa televizary vam nie pakažuć, što ŭ dziejnaha prezidenta vielmi nizki rejtynh, što jaho padtrymlivaje zusim mała ludziej, ale heta praŭda. Pa televizary vam nie pakažuć, što ŭžo niekalki miesiacaŭ pa ŭsioj krainie vystrojvajucca kiłamietrovyja čerhi ź biełarusaŭ, jakija patrabujuć, kab Siarhieja Cichanoŭskaha, Viktara Babaryku i inšych palitviaźniaŭ vypuścili z turmaŭ, ale heta praŭda. Pa televizary vam nie pakažuć, što ludzi, jakich chapaje AMAP, prosta mirna hulali na vulicy i nie rabili ničoha drennaha, ale heta praŭda. Pa televizary vam nie pakažuć, što absalutnaja bolšaść suprać ciapierašniaj ułady i choča novaha prezidenta, ale heta praŭda, - zajaŭlaje Cichanoŭskaja.
24 lipienia. Capkała źjazdžaje
Eks-pretendent u prezidenty Valeryj Capkała źjazdžaje ź Biełarusi i viazie z saboj dziaciej. Pryčyna — siamja atrymała infarmacyju, što Valeryja płanujuć zatrymać pa nadumanych abstavinach.
Žonka eks-pretendenta Vieranika zastajecca ŭ krainie, kab praciahnuć kampaniju razam sa Śviatłanaj Cichanoŭskaj. Vieranika źjedzie ź Biełarusi tolki pierad 9 žniŭnia.
28 lipienia. «Vahnieraŭcy»
U noč z 28 na 29 lipienia pad Minskam zatrymlivajuć 33 čałaviek. Dziaržaŭnyja ŚMI paviedamlajuć, što heta bajeviki zamiežnaj pryvatnaj vajskovaj kampanii Vahniera. 32 ź ich zabrali z sanatoryja pad Minskam, jašče adzin čałaviek byŭ znojdzieny i zatrymany na poŭdni krainy.
Usie zatrymanyja — hramadzianie Rasijskaj Fiederacyi, 14 ź ich zhadvajucca ŭ bazie «Miratvorac» jak udzielniki vajennych dziejańniaŭ na Danbasie. DziaržSMI sa spasyłkaj na pravaachoŭnyja orhany zajaŭlajuć, što»była atrymanaja infarmacyja ab prybyćci na našu terytoryju bolš za 200 bajevikoŭ dla destabilizacyi abstanoŭki ŭ pieryjad vybarčaj kampanii».
Infarmacyi pra los astatnich 160 bajevikoŭ, darečy, niama dahetul.
30 lipienia. Kandydaty iduć u CVK
Paśla zatrymańnia «vahnieraŭcaŭ» u CVK vyklikajuć kandydataŭ u prezidenty. Tam im paviedamlajuć ab uzmacnieńni mier biaśpieki i papiaredžvajuć ab mahčymych pravakacyjach.
Uviečary ŭ parku Družby narodaŭ znoŭ prachodzić ahitacyjny pikiet kandydata ŭ prezidenty Śviatłany Cichanoŭskaj. Pa dadzienych pravaabaroncaŭ, na jaho pryjšli kala 63 tysiač čałaviek.
4 žniŭnia. Avacyi ŭśled
Alaksandr Łukašenka vystupaje z pasłańniem da biełaruskaha naroda i Nacyjanalnaha schodu. Jon drenna vyhladaje i drenna havoryć - za niekalki tydniaŭ da hetaha jon «pieranios karanavirus na nahach» i heta byli jaho nastupstvy.
Ale zapomnicca jaho vystup nie stolki hetym, kolki finałam. Paśla paŭtarahadzinnaj emacyjnaj pramovy Łukašenki, prysutnyja — a heta kala 2,5 tysiač čałaviek — pravodziać jaho doŭhimi i praciahłymi apładysmientami. Avacyi pustoj scenie doŭžacca try chviliny.
8 žniŭnia. Kaleśnikava z kimści błytajuć
Uviečary 8 žniŭnia štab Cichanoŭskaj zajaŭlaje, što siłaviki zatrymali siabra abjadnanaha štaba Maryju Kaleśnikavu.
- Kali sieli ŭ mašynu i pačali vyjazdžać z parkoŭki, darohu zabłakavaŭ sierabrysty mikraaŭtobus. Adtul vyjšli pradstaŭniki milicyi. Maryju siłaj adviali ŭ bus i źjechali, — paviedamiŭ u štabie Cichanoŭskaj.
Mienš čym praz hadzinu stała viadoma, što Maryju Kaleśnikavu adpuścili. Siłaviki skazali Maryi, što «jaje pierabłytali ź inšym čałaviekam». Kaleśnikavu padvieźli da miesca viačery, kudy jana płanavała iści, i paprasili prabačeńnia.
9 žniŭnia. Hałasavańnie, stralba, vybuchi
U Biełarusi — asnoŭny dzień vybaraŭ. Da vybarčych učastkaŭ vystrojvajucca kiłamietrovyja čerhi — takoha ŭ Biełarusi nie nazirałasia ni na adnych vybarach. Ludzi stajać u čerhach navat paśla aficyjnaha zakryćcia ŭčastkaŭ u 20.00. Pracu niekatorych učastkaŭ z-za hetaha vyrašana praciahnuć.
Ale paśla zaviaršeńnia hałasavańnia čerhi nie razychodziacca — ludzi čakajuć pačatku padliku hałasoŭ i vynikaŭ, jakija kamisii pavinny abjavić. Na mnohich učastkach kamisii hetaha nie robiać, a staršyniaŭ vyvodziać z budynkaŭ pad achovaj siłavikoŭ.
Prychilniki Śviatłany Cichanoŭskaj hałasujuć ź biełymi stužkami na rukach, a paśla hałasavańnia fatahrafujuć svoj biuleteń i adpraŭlajuć fota płatformie «Hołas», jakaja viadzie alternatyŭny padlik hałasoŭ. Mnohija da taho ž składajuć biuleteni harmonikam — kab ich było vidać u skryni.
Ciaham usiaho dnia pakul idzie hałasavańnie, u Minsku nazirajucca prablemy z mabilnym internetam. Stacyjanarny taksama pačynaje «padać».
Jaŭka na 18.00 na vybarach prezidenta składaje 79,01 adsotka. Centr Minska pastupova pierakryvajecca siłavikami.
Paśla zakryćcia učastkaŭ publikujucca vyniki nacyjanalnaha exit poll. Pavodle ich źviestak, Alaksandr Łukašenka nabiraje 79,7%, Śviatłana Cichanoŭskaja-6,8%, Hanna Kanapackaja-2,3%, Andrej Dźmitryjeŭ-1,1%, Siarhiej Čaračeń-0,9%. Suprać usich-9,2%.
Pry hetym u štabie Cichanoŭskaj zajaŭlajuć: u Minsku i pa ŭsioj krainie jość niekalki ŭčastkaŭ, dzie Cichanoŭskaja pieramahła. Paźniej takich učastkaŭ stanovicca ŭsio bolš.
Tym časam kala ŭčastkaŭ dla hałasavańnia źjaŭlajecca AMAP, jaki razhaniaje i zatrymlivaje ludziej, jakija čakajuć abviaščeńnia vynikaŭ hałasavańnia. U hety ž čas na centralnych vulicach i płoščach haradoŭ Biełarusi pačynajecca siłavy razhon demanstrantaŭ, jakija sabralisia vykazacca suprać papiarednich vynikaŭ vybaraŭ.
Na pratestoŭcaŭ nakiroŭvajuć techniku, uklučajuć vadamioty, vybuchajuć śviatłošumavyja hranaty.
Pavodle źviestak MUS, u noč z 9 na 10 žniŭnia ŭ 33 haradach krainy zatrymanyja 3000 čałaviek, ź ich blizu tysiačy ŭ Minsku «»u vyniku sutyknieńniaŭ «paciarpieli 50 hramadzian i 39 supracoŭnikaŭ milicyi, niekatoryja špitalizavanyja».
- Nieabchodna adznačyć, što ŭ dačynieńni da parušalnikaŭ bajavaja zbroja nie ŭžyvałasia. Zahinułych niama — zajaviła MUS.
Śledčy kamitet pa padziejach z nočy 9 na 10 žniŭnia raspačynaje kryminalnyja spravy pa faktach masavych biesparadkaŭ (art. 293 Kryminalnaha kodeksa) i hvałtu ŭ dačynieńni da supracoŭnikaŭ orhanaŭ unutranych spraŭ (art.
10 žniŭnia. Cichanoŭskaja źjazdžaje
CVK abviaščaje papiarednija vyniki vybaraŭ: Alaksandr Łukašenka nabraŭ 80,23% hałasoŭ vybarščykaŭ, jaho asnoŭnaja supiernica Śviatłana Cichanoŭskaja-9,90%.
Štab Śviatłany Cichanoŭskaj zajaŭlaje, što nie pryznaje aficyjnyja vyniki, i što pa padlikach niezaležnych naziralnikaŭ Cichanoŭskaja vyjhrała vybary.
Uviečary hetaha ž dnia Śviatłana Cichanoŭskaja ŭvachodzić u budynak CVK, kab padać skarhu pa vynikach vybaraŭ. Ź joj u budynak zachodziać pradstaŭniki štaba Maryja Kaleśnikava, Volha Kavalkova i advakat Maksim Znak.
Cichanoŭskuju i Znaka pravodziać u pryjomnuju kiraŭnika CVK. Praz 2,5 hadziny Znak vychodzić adtul adzin i zajaŭlaje, što Cichanoŭskaja pakinuła budynak praź inšy vychad.
Dzie Śviatłana — nichto nie viedaje sutki. 11 žniŭnia ŭ svaim Twitter kiraŭnik litoŭskaha MZS Linas Linkiavičus piša, što Cichanoŭskaja znachodzicca ŭ Litvie. Paźniej jana vypuskaje videazvarot, u jakim sprabuje skamiečana rastłumačyć, čamu źjechała ź Biełarusi.
«Ale viedajecie, nie daj boh apynucca pierad takim vybaram, pierad jakim apynułasia ja», — kaža Cichanoŭskaja.
Tolki praź niekalki miesiacaŭ jana raskaža, što ŭ kabiniecie kiraŭnika CVK ź joj pahavaryli «vysokapastaŭlenyja čynoŭniki», jakija prapanavali joj pakinuć krainu, kab paźbiehnuć nastupstvaŭ.
I dalej, i dalej…
Siłavoje padaŭleńnie pratestaŭ doŭžyłasia try dni — da 12 žniŭnia. Paśla hetaha adbyvajecca šerah padziej, jakija pakazali, što kraina nikoli nie budzie raniejšaj.
Stanovicca viadoma, što padčas pratestaŭ u Minsku zahinuŭ mužčyna — Alaksandr Tarajkoŭski. Pavodle aficyjnaj viersii MUS, ahučanaj 10 žniŭnia, jon sprabavaŭ kinuć niavyśvietlenuju vybuchovuju pryładu ŭ bok pravaachoŭnikaŭ. Jano vybuchnuła ŭ ruce, mužčyna atrymaŭ śmiarotnyja traŭmy. Paźniej vyśvietliłasia, što Tarajkoŭski zahinuŭ ad ahniastrelnaha ranieńnia.
U dalejšym stanovicca viadoma, što na pratestach zahinuli jašče dva čałavieki — bieraściejec Hienadź Šutaŭ i hamialčanin Alaksandr Vichor.
12 žniŭnia — jak adkaz na hvałt, jaki doŭžyłasia try dni, u centr Minska vychodziać žančyny ŭ biełym i z kvietkami — jany stanuć adnym ź simvałam mirnaha biełaruskaha pratestu.
Upieršyniu ŭ historyi Biełarusi pradpryjemstvy zajaŭlajuć pra strajki, rabočyja vychodziać na vulicy, u tym liku supracoŭniki pramysłovych hihantaŭ — «Biełaruśkalij»,»Naftan», MZKC, MTZ, MAZ, BMZ, BIEŁAZ, Połack-Škłovałakno, Palimir. Siarod patrabavańniaŭ — spynić hvałt z boku siłavikoŭ i pryciahnuć da adkaznaści vinavatych, składańnie paŭnamoctvaŭ Alaksandra Łukašenki, pryznańnie vybaraŭ nielehitymnymi i pryznačeńnie novych, vyzvaleńnie palitviaźniaŭ.
Pravaabaroncy paviedamlajuć ab katavańniach na Akreścina i ŭ inšych izalatarach pa ŭsioj krainie. Pavodle ich źviestak, ludziej źbivali, katavali adsutnaściu ježy i vady, trymali dziasiatki čałaviek u kamierach na čaćviarych.
U niadzielu, 16 žniŭnia ŭ Minsku z ranicy źbirajecca mitynh za Łukašenku, jakich nie było padčas vybarčaj kampanii. Na nastupny dzień Łukašenka na viertalocie prylataje na MZKC i vychodzić da rabočych. Jaho sustrakajuć krykami «Sychodź!».
16 žniŭnia paśla mitynhu za Łukašenku ŭ Minsku źbirajecca samy šmatliki mitynh — blizu 300 tysiač čałaviek vychodziać ź bieł-čyrvona-biełymi ściahami i patrabujuć novych vybaraŭ. Ich nichto nie razhaniaje, siłavikoŭ na vulicach, zapoŭnienych ludźmi, niama. Na pratesty vychodziać, zdajecca, usie: i opiernyja dzivy — Marharyta Laŭčuk stała hołasam pratestu, i spartsmieny — Alena Leŭčanka ŭznačaliła pratest spartsmienaŭ, i kupałaŭcy, i navat supracoŭniki dziaržTB, jakija zvolnilisia paśla vybaraŭ. Mitynhi paŭtarajucca kožnuju niadzielu až da siaredziny vosieni, kali siłaviki stali žorstka razhaniać pratesty i masava zatrymlivać ludziej. Štrafy davali redka, čaściej za ŭsio ludzi atrymlivali «sutki», a paźniej i kryminalnyja spravy. Adnak biełarusy praciahvajuć vychodzić na akcyi pratestu — užo nie takija šmatlikija, ale nie zdajucca.
Jašče ŭ kancy žniŭnia Maryja Kaleśnikava i štab Babaryki zajaŭlajuć ab stvareńni kaardynacyjnaj rady, jakaja budzie zaklikać Łukašenku sieści za stoł pieramovaŭ. U vyniku ŭsie členy prezidyuma KR buduć albo aryštavanyja, albo źjeduć za miažu, kab paźbiehnuć turmy.
Śviatłana Cichanoŭskaja stanovicca lidaram niezaležnaj Biełarusi za miažoj. Jana sustrakajecca ź jeŭrapiejskimi kiraŭnikami dziaržaŭ, dypłamatami i čynoŭnikami, prosić ich prymusić Łukašenku sieści za stoł pieramovaŭ i padtrymać biełarusaŭ u ich žadańni pieramien i ŭ praviadzieńni novych vybaraŭ. A ŭ hety čas u Biełarusi na jaje zavodziać kryminalnyja spravy i abviaščajuć u mižnarodny vyšuk.
2021 hod
Administracyjnyja i kryminalnyja spravy ciapier zavodziacca na kožnaha i ź luboj nahody (škarpetki i štory nie toj rasfarboŭki, čytańnie knih u elektryčcy, śpievy na vulicy, nadpisy na asfalcie, abraza milicyjantaŭ i pradstaŭnikoŭ ułady ŭ sacsietkach). Zakony «pryvodziacca ŭ adpaviednaść» užo postfaktum. Ale biełarusy praciahvajuć supraciŭlacca: vychodzić na dvarovyja maršy pratestu, zajaŭlać ab niespraviadlivaści ŭ adnosinach da mirnych hramadzian i biespakaranaści ŭ dačynieńni da tych, chto pavinien być pakarany.