Прэм'ер Галоўчанка загадаў, каб БТ выкупіла ва ўласніцы кватэру ў доме для журналістаў дзяржСМІ
2 ліпеня была апублікаваная незвычайная пастанова Савета Міністраў: Белтэлерадыёкампанію абавязалі набыць двухпакаёвую кватэру ў мінскім раёне Чыжоўка.
06.07.2021 / 14:15
Дакумент падпісаны аж прэм’ер-міністрам Раманам Галоўчанкам. Згодна з пастановай, Белтэлерадыёкампанія мусіць да 1 жніўня набыць двухпакаёўку па вуліцы Карзюкі за 43 тысячы даляраў.
І вось тут пачынаюцца цікавыя нюансы.
Па-першае, гэта дом, пабудаваны для супрацоўнікаў дзяржаўных СМІ. Тут жывуць работнікі БТ, АНТ, БелТА і іншых медыя. Яны атрымалі свае кватэры некалькі месяцаў таму.
Сама ж двухпакаёўка пакуль належыць Алене Мікалаеўне Ліпскай.
Хто такая Алена Ліпская? Дакладна гэта невядома. Але ж менавіта так завуць жонку спартыўнага журналіста БТ Станіслава Ліпскага.
Другі важны момант — цана. Карзюкі — гэта Чыжоўка, не самы прэстыжны раён сталіцы. Але і для Чыжоўкі $43 тысячы за два пакоі выглядае невялікай цаной. У тым жа доме прадаюцца кватэры, але ж па зусім іншых коштах. Напрыклад, голая двухпакаёўка без рамонту прапануецца за $69 тысяч, у паўтара разу больш за кватэру для БТ.
«Наша Ніва» паспрабавала звязацца са Станіславам Ліпскім праз яго сяброў і знаёмых, тыя перадалі, што ён не захацеў гаварыць.