Mutnaja dabrynia: zadajom pytańni dabračynnamu fondu «Ruch dušy», a nas pałochajuć milicyjaj
Pieryjadyčna kampanii, ŚMI i navat dziaržustanovy atrymlivajuć listy ad fondu «Ruch dušy» z zaklikam dapamahčy chvorym dzieciam. Jak praviła, na ich reahujuć standartna: rajvykankamy i haziety publikujuć infarmacyju ad fondu na svaich sajtach, kampanii arhanizujuć niejki minimalny zbor hrošaj. Ale ŭ niekatorych dziejnaść fondu vyklikaje spraviadlivyja pytańni. Takija ž pytańni ŭźnikli i ŭ «Našaj Nivy». My pasprabavali znajści adkazy na ich — i ŭražańnie zastałosia nieadnaznačnaje. Pieryjadyčna kampanii, ŚMI i navat dziaržustanovy atrymlivajuć listy ad fondu «Ruch dušy» z zaklikam dapamahčy chvorym dzieciam. Jak praviła, na ich reahujuć standartna: rajvykankamy i haziety publikujuć infarmacyju ad fondu na svaich sajtach, kampanii arhanizujuć niejki minimalny zbor hrošaj. Ale ŭ niekatorych dziejnaść fondu vyklikaje spraviadlivyja pytańni. Takija ž pytańni ŭźnikli i ŭ «Našaj Nivy». My pasprabavali znajści adkazy na ich — i ŭražańnie zastałosia nieadnaznačnaje.
13.09.2021 / 08:21
«Kali ja dasiahnuŭ peŭnych metaŭ u svaim biznesie (heta prakat aŭtamabilaŭ), zadumaŭsia pra dabračynnaść. Mieŭ znosiny z pradstaŭnikami padobnych fondaŭ u Rasii i zrabiŭ vysnovu, što ŭ Biełarusi mała śpiecyjalnych arhanizacyj, jakija dapamahajuć ludziam, słaba raźvita arhanizavanaja dabračynnaść. Tamu stvaryŭ fond «Ruch dušy». Potym jon atrymaŭ status mižnarodnaha. U jaho pakul adzin filijał u Sankt-Pieciarburhu, dzie žyvie maja mama», — raskazvaŭ pra siabie dyrektar fondu Viačasłaŭ Łysienkoŭ.
Łysienkovu 23 hady, try ź ich jon zajmajecca fondam. Spačatku jon byŭ miascovym, ale nieŭzabavie byŭ zarehistravany jak mižnarodny. Roźnicy amal niama (niuansy pry rehistracyi) akramia adnaho momantu. Mižnarodny fond musić mieć jak minimum adno pradstaŭnictva za miažoju.
Fond źbiraje hrošy praz svoj sajt, sacyjalnyja sietki, prapanuje razavyja płaciažy ci štomiesiačnyja padpiski. Taksama možna achviaravać niekalki rubloŭ, prosta pazvaniŭšy sa stacyjanarnaha ci mabilnaha telefona.
U dadatak minčuki niaredka mahli bačyć vałancioraŭ fondu kala CUMa ci ŭ inšych miescach u rajonie płoščy Jakuba Kołasa — jany źbirajuć najaŭnyja prosta ŭ skrynački.
Fota: blizko.by
Pra mierapryjemstvy pa zbory hrošaj fondam infarmacyi niama. Ale ŭ rajvykankamy, haziety, firmy prychodziać listy ad «Ruchu dušy»: u ich zvyčajna partret chvoraha małoha, apisańnie jaho biady, rekvizity dla pieraličeńnia hrošaj.
Rajvykankamy, jak praviła, paśla prosta vystaŭlajuć hetyja listy na svaich sajtach. Rajonnaja presa zvyčajna robić tak ža, časam piša natatki ci navat biare intervju ŭ Viačasłava Łysienkova.
Ale ž hetaja schiema pracuje nie zaŭsiody. Žurnalistka vilejskaha vydańnia «Šlach pieramohi» napisała ceły artykuł, pryśviečany fondu. Joj dziejnać Łysienkova padałasia padazronaj.
Paśla hetaha artykuła «Naša Niva» vyrašyła taksama pacikavicca «Rucham dušy» — i pryjšła da peŭnych vysnovaŭ. Ci parušaje fond zakanadaŭstva? Nie. Ci jość pry hetym da jaho pytańni? Tak. I šmat.
Dyk a što nie tak?
U niekatorych dziaciej infarmacyja pra chvarobu jość, u niekatorych — ahulnyja frazy
Pa-pieršaje, sajt fondu vyhladaje dziŭna. Nieachajnaje afarmleńnie, arfahrafičnyja pamyłki, niezrazumiełaja navihacyja. Usio ž XXI stahodździe, sajt — lusterka luboj kampanii. Tak, možna śpisać heta na nievialikuju kamandu ci ekanomiju na veb-dyzajniery. Ale pisać navat imiony chvorych dziaciej z pamyłkami — niejak užo zanadta.
Taksama niekatoryja spasyłki nie pracujuć, ci adkryvajucca cieraz raz. Łahatypy partnioraŭ nie viaduć na ich sajty. Pryčym, u partniory zapisanyja surjoznyja arhanizacyi: A1, MTS, Biełtelekam, BPS-Śbierbank, BDMU i navat Miniust.
Skrynšot sajta fondu «Ruch dušy»
Pa-druhoje, infarmacyjnaje napaŭnieńnie sajta. My paraŭnali staronku «Ruch dušy» z fondam «Šans», jaki pracuje ŭžo bolš za dziasiatak hadoŭ.
U «Šansa» publikujecca infarmacyja z dakładnym dyjahnazam chvoraha dziciaci, nazva patrebnych jamu miedykamientaŭ, suma, jakuju źbiraje fond, jaki pracent ad sumy sabrany. Paśla taho jak nabiahaje patrebnaja suma, zbor zakryvajecca.
Skrynšot z sajta fondu «Šans»
U «Ruchu dušy» ničoha hetaha niama. U niekatorych dziaciej infarmacyja pra chvarobu jość, u niekatorych — prosta ahulnyja frazy.
Skrynšot z sajta «Ruch dušy»
«Dla hetaha patrabujucca šmatlikija abśledavańni, lačeńnie, pracedury»; «Dla hetaha patrabujucca šmatlikija abśledavańni, lačeńnie, pracedury, a taksama kupla darahoha vazka»; «Jarasłavu terminova patrebien kurs ukołaŭ i lačebnych pracedur».
Jakich ukołaŭ? Jakich pracedur? Kolki jany kaštujuć? Kolki hrošaj patrebna? A kolki sabrali? Padobnyja pytańni jość amal da kožnaj staronki sajta.
«Darahija siabry, voś i skončyŭsia naš marafon dapamohi šmatdzietnym siemjam», — piša fond. Ale nie paviedamlaje, kali toj marafon pačynaŭsia, kolki ciahnuŭsia, što było zroblena, jakoj kolkaści siemjaŭ i čym dapamahli. Uvohule, heta adbyvałasia ŭ hetym hodzie? U minułym? Dva hady tamu? Nieviadoma.
A pobač z dopisam — adno videa z padziakami ad biezymiennaj žančyny. Chto jana? Čym joj dapamahli? Tajamnica.
Praŭda, kali tycnuć na videa i pierajści na Jutub, možna ŭsio ž ubačyć, što jano było vykładziena roŭna hod tamu, u vieraśni 2020. Dyk voś kali skončyŭsia toj marafon? Ci jon tady tolki pačaŭsia?
Toje ž tyčycca i dapamohi, jakuju «Ruch dušy» akazvaje (akazvaŭ?) piensijanieram padčas pandemii. Voś tak vyhladaje staronka, pryśviečanaja hetaj dziejnaści.
Jakoj kolkaści piensijanieraŭ dapamahli? Kolki hrošaj patracili? Što kankretna ŭ praduktovych naborach? Jaki ich košt? Kali ŭvohule heta ŭsio adbyvałasia? Adkazaŭ na hetyja pytańni taksama niama.
Papiaredžańnie ad Miniusta i ni śledu zamiežnaha pradstaŭnictva
Uvohule, spravazdačycca «Ruch dušy» nie vielmi lubić. Jany navat atrymali piśmovaje papiaredžańnie ad Ministerstva justycyi. Pryčyna — za toje, što nie dali spravazdačy va ŭstanoŭlenym paradku ab svajoj dziejnaści.
Cikava, što pa zakonie fondy majuć prava spravazdačycca pa-roznamu: apublikavać u ŚMI abo na sajcie arhanizacyi ci niepasredna adpravić infarmacyju ŭ Miniust.
«Ruch dušy» vybraŭ mienavita apošni varyjant. Miniust sam publikuje takija dakumienty, tamu možna pahladzieć kolki hrošaj i na što patraciŭ fond u 2020 hodzie.
Sa spravazdačy vynikaje, što za minuły hod fond sabraŭ 100 tysiač rubloŭ.
A voś patračana było 38 tysiač. Akramia taho, možna daviedacca, što pracujuć va ŭstanovie ŭsiaho dva čałavieki. Adzin zarabiŭ 1800 rubloŭ, druhi — trochi bolš za 3 tysiačy. Pry hetym 20,6 tysiač rubloŭ «Ruch dušy» vydatkavaŭ na svaje materyjalna-techničnyja patreby. Mahčyma, taksama dabračynnaść — ale ž nichto hetaha nie viedaje.
Na sajcie fondu ŭsio ž jość raździeł «Spravazdačy». Tam apublikavanyja fotazdymki niekalkich kvitancyj: adnoj za 2019 hod, čatyroch za 2020, troch — za maj 2021. Usie jany na imiony baćkoŭ chvorych dziaciej, čyje źviestki raźmieščanyja na sajcie. Sumy nievialikija: ad 250 rubloŭ da 2500.
Znajści ŭ siecivie niejkija ślady zamiežnaha pradstaŭnicva niemahčyma. Pa słovach Łysienkova, filijał jość u Pieciarburhu — ale nie znachodzicca ani adras hetaha filijała, ani telefon, u filijała niama staronak u sacyjalnych sietkach, adsutničaje choć jakaja infarmacyja pra jaho dziejnaść. Dziŭnavata dla dabračynnaha fondu.
Kali pačynaješ huhlić nazvu fondu, u siecivie taksama źjaŭlajucca staronki samanazvanych baraćbitoŭ z machlarami i «žabrakami». Hetyja «dobrazyčliŭcy» abvinavačvajuć «Ruch dušy» ŭ machlarstvie i prysvajeńni hrošaj — voś tolki sami nie pryvodziać nivodnaha dokaza.
Akramia taho, jany zvyčajna niezrazumieła dla čaho zdymajuć na videa vałancioraŭ fondu, jakija źbirajuć hrošy na vulicach. Adno z takich videa vyhladała b šarahovaj niaŭdałaj pravakacyjaj, kab na im nie źjaviŭsia sam dyrektar fondu Łysienkoŭ, jaki pavodziŭ siabie pa-chamsku.
I jašče adzin dziŭny momant. U adnym z artykułaŭ na sajcie fondu zhadvajecca jaho kiraŭnik Ryhor Piatrovič Łysienkoŭ. Heta baćka maładoha dyrektara Viačasłava. Uvosieni 2020 hoda jaho šukali — paviedamlałasia, što ŭ kancy žniŭnia mužčyna vyjšaŭ z chaty i źnik.
Ekśpiert: «Uražańnie, što ŭ ich vielmi mała resursaŭ, kab ažyćciaŭlać takuju dziejnaść»
My prahladzieli sajt «Ruch dušy» razam z Natallaj Machańko, dyrektarkaj fondu «Šans».
«Baču, u ich nie dabračynnyja rachunki adkrytyja, a raźlikovyja. Jość niuans — usie hrošy z dabračynnaha rachunku iduć na statutnuju dziejnaść, jakuju zajaŭlaje fond. I da ich bolš pilnaja ŭvaha.
Raźlikovy rachunak dazvalaje afarmlać achviaravańni i rasparadžacca imi pa rašeńni kiraŭnictva ŭ adpaviednaści sa Statutam fondu (naprykład, pracenty pa depazicie, haspadarčaja dziejnaść i inš.) nie tolki jak dabračynnymi. Ale tut zaležyć ad kiraŭnika arhanizacyi.
Nu i pa zakanadaŭstvie, kali płaciež prachodzić kankretna na lačeńnie kankretnaha dziciaci — adtul nielha brać ani kapiejčyny. Kali heta prosta achviaravańni na statutnuju dziejnaść, to zakon nie zabaraniaje častku hrošaj ci navat usie vydatkoŭvać na ŭtrymańnie fondu», — prakamientavała Machańko.
«Taksama my, naprykład, namahajemsia zaŭsiody źbirać na kankretnuju dapamohu kankretnuju sumu. Kali ludzi miesiacami źbirajuć na lačeńnie, to heta takoje maralnaje pytańnie, jakoj i nakolki efiektyŭnaj budzie hetaja dapamoha.
Akramia taho naš fond maksimalna adychodzić ad taho, kab pieradavać hrošy baćkam — bo naša adkaznaść, jak ich vykarystajuć. Baćki, na žal, nie zaŭsiody ich vykarystoŭvajuć mienavita na lačeńnie dziciaci», — kaža dyrektarka fondu.
Taksama Machańko adznačaje: jaje fond nie padtrymlivaje zbory hrošaj na vulicach, bo heta najaŭnyja hrošy i zaŭsiody sprečnaje pytańnie, kolki idzie paśla na rachunak.
«Časam byvaje adrazu bačna, što machlarskaja arhanizacyja. Pra fond «Ruch dušy» — tut ja takoha nie baču. Prosta ŭražańnie, što ŭ ich vielmi mała resursaŭ, kab ažyćciaŭlać takuju dziejnaść», — padsumavała Natalla Machańko.
Vałancior: hrošaj za pracu nie atrymlivaju
Karaciej, pytańniaŭ da «Ruch dušy» nabrałosia šmat. Tamu «Naša Niva» vyrašyła zadać ich niepasredna rabotnikam fondu i baćkam chvorych dziaciej, čyje partrety visiać na sajcie.
My źviazalisia z dvuma vałanciorami. Abodva papałochali karespandenta milicyjaj (?), ale adzin usio ž adkazaŭ na niekalki pytańniaŭ. Pa jaho słovach, nijakija hrošy za svaju pracu jon nie atrymlivaje.
Taksama jon paskardziŭsia, što ludzi, jakija zdymajuć vałancioraŭ na videa i vykładvajuć ich paśla na Jutub, — prosta pravakatary. Heta tak zvanaja Huliko Machnadze (sapraŭdnaje proźvišča — Novikava) i jaje paplečnik Siarhiej Łaparevič.
«Łaparevič padychodziŭ, tykaŭ kamieraj u tvar sa słovami «Vy machlar!». Nul kanstruktyvu. Łaparevič padychodziŭ da dziaŭčat, prosta abražajučy ich, nie reahavaŭ na zaŭvahi, — skazaŭ chłopiec. — Heta čałaviek, jaki zajmajecca prosta pravakacyjami na Jutubie. U jaho adna zadača — nahnać šumichu, nie bolš za toje. Jon nie padychodzić z pytańniami, nie patrabuje dakumientaŭ. U jaho tema adna — padyści i pačać vybiešvać».
Baćki chvoraha dziciaci: hrošy pieraličvali
Taksama «Naša Niva» źviazałasia z baćkami čatyroch dziaciej, infarmacyja pra jakich raźmieščanaja na sajcie «Ruch dušy». Dvoje nie zachacieli havaryć, dvoje adhuknulisia.
Baćki chvoraha na rak Kości Sierykava kažuć, što fond sapraŭdy dapamoh im hrašyma. Heta było dvojčy — uvosieni 2020 i ŭ kancy viasny 2021.
«Pieradali 2500 u pieršy raz i niedzie stolki ž u druhi raz», — kaža Ała, mama chłopca.
Iryna, mama Dzimy Hałavina, taksama paćviardžaje: fond dapamahaŭ. Taksama dvojčy joj pieraviali hrošy.
«Pieršy raz pieraviali 500 rubloŭ, niedzie letam, druhi — 1900, bližej da zimy. Skazali, jašče nam naźbirajuć, bo my źbirajem na vazok, a jon darahi, kaštuje 3500 niedzie. I treba admysłovaje siadzieńnie jašče, jano taksama kaštuje tysiaču ci paŭtary. Fond paabiacaŭ jašče nam dapamahčy», — kaža žančyna.
Dyrektar fondu: «Čakajcie zvanka ź milicyi»
Źviazalisia my i z samim Viačasłavam Łysienkovym. Skončyłasia ŭsio pahrozami milicyi.
Pazvaniŭšy pa adnym z numaroŭ, paznačanych na sajcie, my patrapili na niejkuju dziaŭčynu. Pačuŭšy, što turbujuć sa ŚMI, jana kinuła słuchaŭku. Ale zatym pierazvaniŭ sam Łysienkoŭ.
«Pakažycie mnie choć adzin sajt dabračynnaha fondu, dzie ŭkazvajecca, što vydatkujecca i kudy. Vy niekampietentny ŭ hetym pytańni, heta adrazu bačna. Raskazvaju, kab vy byli prainfarmavanyja: dabračynnyja fondy spravazdačacca raz na hod pierad Miniustam. Usio. My heta vykonvajem. Usie arhanizacyi — «Junichiełp», «Šans» — pakazvajuć prychod hrošaj, raschod nivodnaja arhanizacyja nie budzie pakazvać.
My jakraz adroźnivajemsia ad inšych. Pakazvajem kopii kvitancyj, kudy my pieravodzim hrošy. I vy chočacie ŭpiknuć, što my nieprazrysta pracujem?» — vykazaŭsia Łysienkoŭ.
Čamu na sajcie tolki niekalki kvitancyj, jon patłumačyŭ tak:
«Sajt u pracesie raźvićcia, usiu infarmacyju my nie vykładvajem, poŭny abjom sajta nabirajecca z hadami. Inšyja fondy pracujuć pa 20 hadoŭ, my isnujem mienš za 5 hadoŭ. Praz 20 hadoŭ, moža, u nas jašče lepš budzie sajt, čym u ich».
Pryznaŭ jon i pamyłki na sajcie:
«My ŭ kursie. Sajt pieradali ŭžo redaktaru. Prosta naš prahramist trochi niepiśmienny, zaraz budzie ŭsio redahavacca, možacie ciaham miesiaca prasačyć — sajt abnovicca ŭ płanie tekstaŭ. Vy ž nie pieršyja, chto nam pra heta kaža».
Ale čamu «Ruch dušy» ŭsio ž nie paznačaje, jakija sumy jany źbirajuć kankretna? I na što?
«Bačna, što vy infarmacyjaj nie vałodajecie. Usie fondy źbirajuć na adzin raźlikovy rachunak. Ja mahu pisać usio što zaŭhodna: mahu źbirać dzieciam, ci dziadziu Vasiu, dziadziu Pieciu.
Hrošy iduć tolki na raźlikovy rachunak fondu, a jon ich raźmiarkoŭvaje zhodna sa statutam, u jakim napisanyja mety i zadačy. U nas mety i zadačy — dapamoha ciažka chvorym dzieciam. U inšych fondach — toje ž samaje.
Usio astatniaje — dla pryciahnieńnia ŭvahi. Ja mahu taksama pisać, voś dzicia, terminovy zbor, suma zboraŭ, razumiejecie? Zaklikać. Ale my takoha nie robim, my bolš strymanyja ŭ hetym płanie. My vybrali taki šlach. I my nie parušajem zakanadaŭstva, infarmacyjnyja zakony i hetak dalej. Vy prosta kiepska prainfarmavanyja, kiepska pahružanyja ŭ hetuju temu», — skazaŭ Łysienkoŭ.
Ale čamu ŭsio ž nie napisać padrabiaźniej? Naprykład, pra dapamohu padčas karanavirusa: kolki patracili, kamu dapamahli? Navošta hetaja nieachajnaść?
«Čamu nieachajnaść? Heta vaša subjektyŭnaje mierkavańnie. Kab ja byŭ čałaviek niepahružany ci hłupy, ja b razumieŭ, jak pracujuć hetyja pytańni i ŚMI. Vy ž sami ŭsio vydatna razumiejecie, jak možna śpiekulavać na lubym sajcie. Mahu zajści na luby sajt i stvaryć 10 tysiač krytyčnych pytańniaŭ.
U vas uźnikła pytańnie — možacie źviarnucca ŭ fond, vam usio patłumačać, pakažuć, pradastaviać dakumienty. My ni ad kaho nie chavajemsia, ničoha nie chavajem, u nas usio adkryta.
Što tyčycca padrabiaznaściaŭ, to ludzi, jakija chočuć achviaravać, jany achviarujuć i nie zadajuć lišnich pytańniaŭ. Bo razumiejuć, što arhanizacyja aficyjna zarehistravanaja, usio aficyjna».
A što ź filijałam za miažoj?
«Heta moža ad vašaj kiepskaj infarmavanaści ci što, ale zhodna z zakanadaŭstvam my nidzie nie abaviazany infarmavać, dzie ŭ nas filijał i hetak dalej.
Ale ja davaŭ intervju miascovaj haziecie, dzie kazaŭ, što naš filijał u Pieciarburhu. Ale znoŭ ža — pa zakonie ja nie mušu ničoha kazać.
Naš fond u mižnarodny rearhanizavany tolki sioleta. Ja vam daŭ adkaz? Filijał zarehistravany, ale my na stadyi stvareńnia bazy: sajta, ofisaŭ, štatu supracoŭnikaŭ», — adkazaŭ Łysienkoŭ.
Jon taksama prakamientavaŭ svoj hadavy zarobak dyrektara ŭ 3 tysiačy i raskazaŭ, čamu stvaryŭ fond:
«Heta nie asnoŭny moj zaniatak. U mianie kamiercyjnaja arhanizacyja, jość kamiercyjna arhanizacyja ŭ Sankt-Pieciarburhu. Ja biznesam zajmajusia z 18 hadoŭ. U mianie vysokija aficyjnyja dachody. Fond ja stvaryŭ, bo bačyŭ, što tut isnuje dabračynnaść, ale jana niearhanizavanaja. I mnie zachaciełasia jaje arhanizavać, zajmacca hetym, mnie heta padabajecca. Zajmaŭsia hetym sam, bo ja nie ŭžyvajusia pa charaktaru, lublu prymać rašeńni samastojna. I maju dobryja arhanizatarskija zdolnaści, mnie padabajecca praces, padabajecca kiravać i dapamahać ludziam. Heta maja natura takaja».
Pra spravazdaču za 2020 hod Łysienkoŭ adkazaŭ koratka: «Ja nie buchhałtar, spravazdaču nie padavaŭ. Maja zadača — arhanizatarskaja».
Prakamientavaŭ jon i toje videa.
«Hety Łaparevič, jaki vykłaŭ videa, ciaham miesiaca čaplaŭsia da našych vałanceraŭ i supracoŭnikaŭ. Adzin z vałancioraŭ piśmienna adkazaŭ jamu na ŭsie pytańni. Paśla Łaparevič pačaŭ jaho pravakavać.
I tut u ich razmovu ŭmiašalisia dvoje ałkašoŭ, prabačcie za vyraz. Ja ich sam nie viedaju — prosta pjanyja padyšli zastupicca za vałanciora. Paśla vałancior pazvaniŭ mnie, ja padjechaŭ i ŭbačyŭ karcinu: stajać svaracca pamiž saboj. Ja padyšoŭ, i hety Łaparevič pačaŭ mianie abražać kankretna maciukami. A paśla vykłaŭ svoj rolik, u jakim abrezaŭ heta.
Ja čałaviek niestrymany, budu dziejničać, kali mianie abražajuć. Heta fakt.
Paśla my vyjšli ź mietro. Hetyja chłopcy najazdžali na taho Łapareviča, ja ich uhavaryŭ syści, pahutaryŭ ź im — i jon vybačyŭsia», — raskazaŭ Łysienkoŭ.
Paśla, praŭda, Łaparevič napisaŭ zajavu na Łysienkova. Apošniaha pryznali vinavatym u abrazach i aštrafavali.
«Ja liču, toj Łaparevič — heta maryjanietka Kaciaryny Novikavaj (Huliko Machnadze). Jaje asnoŭnaja zadača — dapiakać naš fond, — skazaŭ Viačasłaŭ Łysienkoŭ. — Jana pisała na nas u DFR, KDK, ABEZ.
Nas praviarali — parušeńniaŭ nie znajšli. Kab choć niešta było, to daŭnym daŭno nas by zakryli. Sioleta KDK pravioŭ poŭnuju pravierku, zabiraŭ usiu dakumientacyju, vyklikaŭ usich vałancioraŭ. Usio detalna praviarałasia. Parušeńniaŭ nie vyjavili. I vas chočuć vykarystać, kab nas ačarnić».
Adkazaŭ jon i pra baćku — toj sapraŭdy raniej pracavaŭ u fondzie, paśla źnik, kaža Łysienkoŭ. Pakul nie znajšoŭsia.
Ale ž u kancy Viačasłaŭ Łysienkoŭ vyrašyŭ papałochać milicyjaj:
«Ci karektna siabie tak pavodzić? Źbirać niejkuju infarmacyju? Pa-pieršaje, vy dziejničajecie niezakonna. Ja mahu vašy źviestki źlić pravaachoŭnym orhanam i napisać zajavu na vas. I buduć vas šukać, razumiejecie ci nie? Za vašu dziejnaść — vy parušajecie zakon ab ŚMI.
Na sajcie nie ŭkazana ŭsia poŭnaja infarmacyja — voś i ŭsio. Kali vam patrabujucca dadatkovyja spravazdačy, to ja ž vam tłumačyŭ: jość ukaz prezidenta, na padstavie jaho možacie źviarnucca, budziem pradastaŭlać usiu infarmacyju. I kali vam štości zdajecca — heta vaša mierkavańnie, razumiejecie? U kožnaha svajo mierkavańnie.
Kali ŭ aficyjnym zapycie vy budziecie zadavać mnie takija ž pytańni, jak zaraz, to što adkazvać? Vy zadajecie durnyja pytańni, prabačcie. Heta prosta padmiena paniaćciaŭ: što ŭ «Šansa» štości jość, u nas čahości niama. Ja mahu pazvanić zaraz prahramistu, jon nakidaje hetych ličbaŭ — i ŭsio. I vy budziecie siadzieć i dumać, što tak i jość. Z čaho vy ŭziali, što tak i jość, jak vam pakazvajuć? Jość peŭnaja paśladoŭnaść zakonnaja, usio, što fondy robiać na sajtach, — heta prosta dla prasoŭvańnia pradukta svajho, voś i ŭsio».
Łysienkoŭ dadaŭ: «Kali budziecie raspaŭsiudžvać hetuju infarmacyju, ja papiaredžvaju adrazu, kab vy byli ŭ kursie, ja budu źviartacca kankretna na vas u pravaachoŭnyja struktury. Stavić pytańnie pra zakonnaść vašych dziejańniaŭ. Nie budu ciškom, adrazu papiaredžvaju, ja budu dziejničać. Bo hetyja padvojenyja standarty i vaša dziejnaść — dziŭnaja vielmi i niezrazumiełaja dla mianie. I niezakonnaja. Voś i ŭsio.
Vaša arhanizacyja zakrytaja, jana ŭ pracesie likvidacyi. Na padstavie čaho vy dziejničajecie? Vaša arhanizacyja zakrytaja! Čakajcie zvanka ź milicyi».