Byłoha hałoŭnaha inžyniera chołdynha «Babuškina krynka», jaho žonku i siabra sudziać za machinacyi
U Mahilovie 27 vieraśnia abviaścili prysud byłomu hałoŭnamu inžynieru AAT «Babuškina krynka» Dźmitryju Firsavu, jaho žoncy Taćcianie i ich znajomamu Leanidu Maślukovu.
28.09.2021 / 08:15
Dźmitryj Firsaŭ na pasadzie hałoŭnaha inžyniera AAT «Babuškina krynka» pracavaŭ z kastryčnika 2013 hoda. Jon ža ŭznačalvaŭ na pradpryjemstvie konkursnuju kamisiju pa zakupkach. Pa viersii abvinavačvańnia, Dźmitryj Firsaŭ ad imia «Babuškinaj krynki» kuplaŭ u firmaŭ, padkantrolnych jaho žoncy i siabru, tavary pa nieabhruntavana zavyšanych cenach, pišuć naviny.online.
Pieršy raz hrupu sudzili jašče ŭ lipieni 2019. Tady im pryznačyli vialikija terminy pa abvinavačvańni ŭ zavałodańni majomaściu małočnaha pradpryjemstva na sumu 417 tysiač rubloŭ.
Ciapier ich sudzili za zamach na zavałodańnie majomaściu pradpryjemstva na sumu 292 tysiačy rubloŭ, učynieny słužbovaj asobaj z vykarystańniem svaich słužbovych paŭnamoctvaŭ arhanizavanaj hrupaj u asabliva bujnym pamiery. Złačynstva jany nie zmahli davieści da kanca, bo apieratyŭniki raskryli schiemu.
Usich traich znoŭ pryznali vinavatymi. Dźmitryja Firsava asudzili jašče i za pieravyšeńnie słužbovych paŭnamoctvaŭ. Z ulikam minułaha pakarańnia jaho kančatkova prysudzili da 11 hadoŭ i 6 miesiacaŭ uzmocnienaha režymu. Taćciana Firsava atrymała siem hadoŭ pazbaŭleńnia voli ŭ kałonii ahulnaha režymu. Leanidu Maślukovu pryznačyli vosiem hadoŭ u kałonii ŭzmocnienaha režymu.
Akramia taho abvinavačanych abaviazali pakryć AAT «Babuškina krynka» 292 tysiačy rubloŭ naniesienaj škody i na piać hadoŭ zabaranili zajmać pasady, źviazanyja z vykanańniem arhanizacyjna-rasparadčych, administracyjna-haspadarčych abaviazkaŭ i jurydyčna značnych dziejańniaŭ. Ź Dźmitryja Firsava dadatkova spahnali jašče 17,9 tysiačy rubloŭ u karyść byłoha pracadaŭcy.
Čytajcie taksama: Krynicy: zatrymany viadomy biznesmien, ułaśnik «Tytana», «Civali» i «Truma», jon sam napisaŭ na siabie zajavu