«Mianie nichto nie prymušaŭ». Ciktokier z Bresta vybačajecca pierad KDB sa ślaźmi na vačach — što heta było?
18-hadovy bieraściejec Alaksandr maje davoli paśpiachovy akaŭnt u ciktoku: amal 112 tysiač padpisčykaŭ, amal 5 miljonaŭ łajkaŭ. Asobnyja roliki majuć bolš za sotniu tysiač prahladaŭ. U svaich rolikach chłopiec faktyčna «pierakazvaje» aktualnyja, na jaho dumku, naviny. Ale ŭ apošnim videa Alaksandr niečakana prosić prabačeńnia ŭ KDB i svajho ŭniviersiteta, a taksama prosić praciahnuć kantrakty jaho baćkam, jakich zvalniajuć z pracy. «Naša Niva» pahavaryła z chłopcam.
13.10.2021 / 19:05
Alaksandr — druhakurśnik bresckaha palitecha, kaliści chacieŭ stać žurnalistam, ale nie skłałasia. Junak zastaŭsia ŭ Breście i ciapier vučycca na inžyniera-budaŭnika.
«Ciktok heta jak chobi, ja na im nie zarablaju, — kaža chłopiec. — U mianie tam try žanry: asnoŭnyja naviny koratka i biez kamientaroŭ; ścisła niejkaja fraza, jakaja padmacoŭvajecca fotazdymkam ci dakumientam; niepasredna razmoŭny žanr, dzie ja daju svaje kamientary.
Ja pačaŭ zajmacca hetym niedzie ŭ krasaviku 2020 hoda, kali pačynaŭsia karanavirus i mnie zachaciełasia źniać pra toje, što adbyvałasia tady ŭ majoj škole.
Za 1,5 hoda nijakich prablem nie było. Ale z pačatku hetaha navučalnaha hoda raptam uźnik dziki cisk na mianie.
Ja maksimalna prybiraju lubuju apazicyjnuju nakiravanaść rolikaŭ, rablu ŭsio tak, kab usio było pa zakonie, kab nie było da čaho dakałupacca. I ŭsio adno pačałosia niešta nie vielmi dobraje.
Raptam pačali sypacca pahrozy ŭ telehramie jak mnie, tak i maim baćkam. Prytym najčaściej mienavita baćkam, choć jany tut i ni pry čym.
Pa hetych paviedamleńniach było zrazumieła, što hetyja ludzi vałodajuć usioj infarmacyjaj pra mianie, pra maich baćkoŭ, to-bok heta paviedamleńni nie ad niejkich «vypadkovych minakoŭ».
Ja nie bajusia za siabie, ale cisk na baćkoŭ mianie biantežyć, heta jak udar u śpinu. Jany hetaha nie zasłuhoŭvajuć, heta sumlennyja ludzi, jakija ŭsio žyćcio ščyra pracujuć. Plus da mianie pačali dachodzić čutki, što maimi materyjałami nie vielmi zadavolenyja i va ŭniviersitecie, mahčymyja prafiłaktyčnyja hutarki.
Ale ž aficyjna pakul nichto sa mnoj nie havaryŭ, nikudy nichto nie vyklikaŭ.
Voś tolki ŭ baćkoŭ pačalisia prablemy na pracy. Im 55 i 60 hadoŭ. Jany inžyniery ŭ dziaržaŭnaj arhanizacyi. I ciapier im paviedamili, što nie praciahnuć kantrakty abaim. Pryčyna nibyta mienavita ŭva mnie.
Ale ja pahavaryŭ ź niekatorymi ludźmi, što spyniu svaju dziejnaść, tamu, spadziajusia, staŭleńnie da baćkoŭ źmienicca i kantrakty im praciahnuć. Dziela ich ja byŭ hatovy pajści na takuju achviaru i zapisać videa z vybačeńniami.
Mianie nichto nie prymušaŭ jaho zapisvać — heta tolki majo rašeńnie i žadańnie, kab źnizić hradus cisku».
Ale čamu junak u «pakajalnym zvarocie» vybačajecca pierad KDB?
«Bo maju infarmacyju, što KDB cikavicca maim kanałam, i ja paličyŭ, što nieabchodna paprasić prabačeńnia, kab panizić hradus, — tłumačyć Alaksandr. — Hety rolik ja zapisvaŭ u vielmi emacyjnym stanie, bo niedzie za hadzinu da taho atrymaŭ paviedamleńnie ad baćkoŭ [pra prablemy na pracy — NN].
Heta było vielmi ciažka dla mianie, i sapraŭdy na vačach byli ślozy».
Ciapier Alaksandr źbirajecca zapisvać roliki tolki pra suśvietnyja padziei.
«Byli idei i nakont pierajezdu za miažu, ale pakul što vyrašyŭ prosta ŭziać pierapynak i adpačyć ad ciktoku na paru tydniaŭ. Paśla budu aśviatlać naviny z Rasii i śvietu, kali i vyrašu zakranać Biełaruś, to vielmi aściarožna. Bo lubaja tema, jakaja choć niejak tyčycca palityki, usprymajecca ŭ nas vielmi baluča», — kaža chłopiec.