Vybary «pa paniacijam»
U dzień sustrečy ź Miadźviedzievym u Sočy Łukašenka raspaviadaje ŭ «Iźviestijach», jak krucili ličbami hałasavańnia ŭ 2006 hodzie. Piša ŭ svaim błohu na NN Alaksandr Kłaskoŭski.
27.08.2009 / 10:09
U dzień sustrečy biełaruskaha kiraŭnika z rasijskim u Sočy «Iźviestija» strelili zahałoŭkam «Łukašenka: maje vybary byli sfalsifikavanyja».
Maskoŭskaja hazieta nadrukavała intervju, jakoje 13 žniŭnia braŭ Michaił Husman (pamiatajecie, jon tady jašče kasiŭ travu z haspadarom u Drazdach?).
Nahadaju: bomba pra falsifikacyju vybuchnuła ŭvosień 2006 hoda, kali Łukašenka hutaryŭ z ukrainskimi žurnalistami. Pastfaktum ludzi ź jahonaha atačeńnia doŭha davodzili: prezidenta nie tak zrazumieli… Pakrysie taja zajava stała zabyvacca.
Zaraz Łukašenka paćviardžaje:
«Za mianie na apošnich vybarach prahałasavała, dziela viedama, 93%. I ja pryznaŭsia potym, kali mianie prosta pačali dušyć, što my sfalšavali vybary. I ja hruba skazaŭ: «Tak, sfalšavali». Ja addaŭ kamandu, kab nie 93% było, a niedzie tam 80, ja nie pamiataju kolki. Tamu što za 90 — heta ŭžo psichałahična nie ŭsprymajecca. Ale heta była praŭda».
Niaźmienny prezident Biełarusi efiektnym pasažam chacieŭ padkreślić, jak jaho lubić narod. Bačycie, maŭlaŭ, ścipłaść prymušaje navat trochi źbivać ličby, kab nie nahadvali statystyku kolišnich refierendumaŭ u Sadama Chusiejna.
Kamu addavałasia kamanda, jak vyhladała pracedura pierarobki vynikaŭ — hetyja detali nie rasšyfroŭvajucca. Ale heta mienavita detali. A tak — ź pieršych vusnaŭ prahučała pierakanaŭčaje tłumačeńnie dla tych, chto jašče dumaje, što ŭ Biełarusi jość niejkija vybary.
Hetaje pryznańnie naŭrad ci ździvić rasijskuju publiku: tam palityka taksama robicca «pa paniacijam». Ale ž bravada peŭna raźličana na toje, što jaje prakaŭtnuć jak ajčynny elektarat, tak i Jeŭropa.