Rasijskaja apazicyja choča vydavać pašpart «dobraha ruskaha»
Udzielniki Antyvajennaj kanfierencyi ŭ Vilni vystupili ź inicyjatyvaj vydačy dakumienta «dobraha ruskaha». Takoje paśviedčańnie budzie vydavacca tym, chto padpisaŭ dekłaracyju suprać pucinskaj vajennaj ahresii. Inicyjatary chočuć, kab dakumient «dobraha ruskaha» viarnuŭ jaho ŭładalnikaŭ da dasiahnieńniaŭ cyvilizavanaha śvietu, jakich rasijanie pazbavilisia praz sankcyi.
20.05.2022 / 15:48
Stvaralniki antyvajennaha kamitetu vyrašyli pierajści ad abmierkavańnia situacyi, jakaja skłałasia, da dziejańniaŭ, zajaviŭ siońnia adzin z arhanizataraŭ foruma Hary Kasparaŭ, piša kanał «Možam rastłumačyć». Kasparaŭ abviaściŭ pra stvareńnie Rasijskaha kamiteta dziejańnia, na sajcie jakoha budzie apublikavanaja dekłaracyja — prahramny dakumient, jaki moža stać asnovaj dla abjadnańnia «inšaj Rasii».
Kasparaŭ pieraličyŭ try hałoŭnyja pastułaty hetaha dakumienta.
Pa-pieršaje, pryznańnie taho, što napad na Ukrainu — złačynnaja vajna.
Druhoje, što jana raźviazanaja nielehitymnym pucinskim režymam.
Treciaje — pryznańnie terytaryjalnaj cełasnaści Ukrainy, uklučajučy Krym i Danbas.
Pa słovach Kasparava, padpisańnie takoha dakumienta budzie aznačać mabilizacyju aktyŭnaj častki «dobrych ruskich, jeŭrapiejskich ruskich».
Pa słovach eks-deputata Dziarždumy Dźmitryja Hudkova, hramadzianam, jakija vystupajuć suprać vajny, nieabchodna palityčna aformicca.
Pavodle jaho, dla atrymańnia pašparta «dobraha ruskaha» treba budzie prajści try etapy. Čałaviek rehistrujecca, padpisvaje antyvajennuju dekłaracyju i prachodzić paćviardžeńnie asoby. Paśla hetaha jon atrymlivaje ID. Jaho možna budzie pazbavić pa peŭnych kryteryjach — naprykład, čałaviek, jaki atrymaŭ hety «pašpart», schłusiŭ pra svaje pohlady i paŭdzielničaŭ u Z-mierapryjemstvie.
Kali abjadnajecca vialikaja kolkaść ludziej, čyje asoby paćvierdžanyja, «naš hołas budzie pačuty, zjavicca subjekt», tłumačyć zadumu Hudkoŭ.
Na jaho dumku, u pierśpiektyvie možna budzie adkryć «ambasady svabodnaj Rasii», jakija zajmalisia b sistemnaj pracaj z zachodnimi pradstaŭnictvami, zachodnimi biurakratyjami.
Dla ŭładalnikaŭ takoha ID praduhledžvajucca lhoty, naprykład, prahramy pracaŭładkavańnia, prahramy dapamohi ŭ rełakacyi, rehistracyi ŭ zabłakavanych dla rasijan servisach.
«U apazicyi pieršy raz za 22 hady jość šaniec zrabić niešta dla rasijan realna dobraje, što palahčaje žyćcio», — padtrymaŭ ideju ŭdzielnik forumu Jaŭhien Čyčvarkin.