Jak praciahnuć žyćcio svajmu staromu smartfonu, kab nie kuplać novy?
Siezon abnaŭleńniaŭ liniejek aficyjna raspačaŭsia. Samsung na dniach prezientavała svaje novyja hnutkija telefony sieryi Fold, u vieraśni čakajecca prezientacyja navinak ad Apple, paśla čaho Google vypuścić novy Pixel. Ale pryłady, jakija hetyja technałahičnyja hihanty pradavali nam apošnija niekalki hadoŭ, pa-raniejšamu dobryja. A voś zvyčka daŭžej karystacca starymi telefonami prynosić karyść nie tolki našym kašalkam, ale i navakolnamu asiarodździu, piša WSJ.
16.08.2022 / 12:48
Fota: Wired.
Biezumoŭna, kali vaš telefon u drennym stanie ci pracuje na apieracyjnaj sistemie, padtrymka jakoj skončyłasia, vam varta kupić novy. Ale kali vašamu telefonu mienš za piać hadoŭ i jon usio jašče spraŭlajecca sa svaimi funkcyjami, vy možacie pavialičyć chutkaść jaho dziejańnia i padoŭžyć termin słužby z dapamohaj hetych čatyroch parad.
Parada 1: Praviercie abnaŭleńnie prahramnaha zabieśpiačeńnia
Pa tradycyi ŭvosień vychodziać apošnija viersii prahramnaha zabieśpiačeńnia iOS ad Apple i Android ad Google. Paśla abnaŭleńnia vašy pryłady buduć adčuvać siabie naviejšymi, abnaŭleńni palepšać biaśpieku i vypraviać sistemnyja pamyłki.
- U madelach iPhone: ciapier iPhone 6S (vypuščany ŭ 2015 h.) i bolš novyja padtrymlivajuć abnaŭleńnie da apošniaj viersii iOS 15.6. Adnak iOS 16, jakaja pavinna vyjści ŭ vieraśni hetaha hoda ź niekatorymi novymi funkcyjami, nie mahčyma budzie ŭstalavać na staryja madeli. Jaje atrymajuć tolki iPhone 8 (vypuščany ŭ 2017 hodzie) i naviejšyja.
- U madelach Android: Praviercie ŭ naładach, ci jość mahčymaść abnavić svaju viersiju Android. Abnaŭleńni sistemy i biaśpieki na pryładach Samsung padtrymlivajucca try hady (Galaxy S20 i starejšyja) abo čatyry hady (ad Galaxy S21 i naviejšych). Dla karystalnikaŭ Pixel ad Google jość svaja sistema abnaŭleńniaŭ.
Parada 2: Pierahledźcie svoj sposab zaradžać telefon
Kali ŭ vas paškodžany abo sapsavany kabiel zaradki, zamianicie jaho. Zaradnaja pryłada atrymlivaje vialikuju nahruzku — šmatrazovaje vykarystańnie, pierahibańnie provadu, pastajannaje tuzańnie. Novaja zaradka ad vytvorcy zmoža zaradžać vaš smartfon bolš efiektyŭna i biaśpiečna. Źviarnicie ŭvahu na funkcyju biespravadnoj zaradki, kali ŭ vašym telefonie takaja jość, tak vaš telefon choć i budzie zaradžacca pavolniej, ale heta pamienšyć nahruzku na batareju i sam aparat.
Lityj-ionnyja akumulatary — tyja, jakija jość u vašym telefonie i bolšaści inšaj elektroniki — z časam hublajuć svojstva trymać zarad, a sposab zaradki abo vykarystańnia akumulatara moža zapavolić hety praces. Kali vy pastajanna zaradžajecie vaš akumulatar da 100% abo vykarystoŭvajecie telefon z zaradam nižej za 15%, to heta nie spryjaje «zdaroŭju» batarei. Mnohija telefony ciapier majuć nałady, kab manitoryć i pavialičvać čas aŭtanomnaj raboty.
- U madelach iPhone: pierajdzicie ŭ raździeł Nałady > Akumulatar, zatym uklučycie funkcyju aptymizavanaj zaradki akumulatara, kab zapavolić jaho stareńnie.
- U madelach Samsung: pierajdzicie ŭ Nałady > Dahlad pryłady > Aptymizavać zaraz.
Parada 3: Jak pavialičyć chutkaść
Zapavolenaje funkcyjanavańnie pryłady moža być nastupstvam stareńnia batarei. U 2017 hodzie Apple zajaviła, što naŭmysna źniziła chutkaść telefonaŭ sa starymi batarejami, kab praduchilić niečakanaje vyklučeńnie pryłady. Jak praviła, akumulatary pačynajuć demanstravać źnižeńnie jomistaści praz dva-try hady, abo prykładna praz 500 zaradak. Vychadam moža stać zamiena batarei. Dla taho, kab ubačyć ciapierašni abjom vašaj batarei i paraŭnać jaho z zajaŭlenym pry pakupcy, patrebna:
- U madelach iPhone: pierajdzicie ŭ Nałady > Akumulatar > Stan batarei.
- U madelach Android: niama lohkadastupnaj ubudavanaj funkcyi, ale takija prahramy, jak, naprykład, AccuBattery i MacroPinch, pakazvajuć infarmacyju ab stanie batarei ŭ vašym smartfonie.
Voś što jašče možna zrabić, kab pavialičyć pradukcyjnaść:
- Pierazahružajcie telefon praź dzień. Pakidańnie telefona ŭklučanym na praciahu doŭhaha času moža pryvieści da pamianšeńnia abjomu dastupnaj pamiaci i pamyłak.
- Vyzvalicie miesca. «Usprymajcie svoj telefon jak ofis. Kali jon pierapoŭnieny niepatrebnymi rečami, to i pierasoŭvacca pa im ciažej. Pahladzicie ŭ naładach iPhone abo Android, što zajmaje schovišča. Vydalicie niepatrebnyja fajły i vykarystoŭvajcie vobłačnyja servisy dla ich zachoŭvańnia».
- Zabaranicie prahramam pracavać u fonavym režymie. Pryčynaj spadu pradukcyjnaści moža być šmat zapuščanych prahram.
- Karystajciesia veb-sajtami zamiest prahram. Prahramy nie tolki zajmajuć miesca, ale i mohuć pracavać u fonavym režymie, što moža pryvieści da źnižeńnia pradukcyjnaści. Mnohija servisy, jak, naprykład, sacyjalnyja sietki, mohuć być dastupnyja z vašaha mabilnaha braŭziera z tymi samymi funkcyjami. Vy navat možacie dadać zakładki veb-sajta na hałoŭny ekran.
Parada 4: Abaranicie vaš telefon ad źniešniaha ŭździejańnia
Dobry, zručny čachoł moža pavialičyć termin słužby vašaha telefona na hady, a achoŭnaje škło abaronić ekran. Trymalniki dla telefona, jakija prymacoŭvajucca da zadniaj kryški, zrobiać vašu pryładu zručniejšaj dla trymańnia i praduchilać vypadkovaje padzieńnie.
Niahledziačy na toje, što mnohija telefony majuć standart vodaniepranikalnaści, nie biarycie ich dla padvodnaha płavańnia. Vilhać moža paškodzić kampanienty ŭnutry telefona. Asabliva mocna salonaja vada raźjadaje elektroniku.