Кавід шкодзіць мозгу. Тлумачым, як гэта адбываецца
Дагэтуль невядома, як канкрэтна на арганізм уплывае захворванне на кавід, але дакладна зразумела, што вірус шкодзіць нервовай сістэме, у тым ліку і мозгу. Вось як гэта адбываецца.
25.08.2022 / 16:40
Фота: pixabay.com
Доўгатэрміновыя наступствы кавіду ўсё больш хвалююць вучоных. Выглядае, што наперадзе ў чалавецтва хваля хранічных захворванняў, выкліканых перажытым кавідам, і яны могуць узнікнуць у больш чым 100 мільёнаў чалавек. Большасць людзей — недзе 62-70% — скардзіцца на тое, што пасля кавіду ў іх пачаліся разлады нервовай сістэмы, піша onet.pl.
Размова не толькі пра неўралагічныя праблемы, але і пра разлады псіхікі. Усё гэта дакладна вывучылі аўтары даследавання, апублікаванага некалькі дзён таму ў выданні The Lancet Psychiatry.
Пачнём з добрых навін: праца навукоўцаў не знайшла ў людзей, што перахварэлі на кавід, доўгатэрміновай рызыкі разладаў накшталт павышанай трывожнасці ці дэпрэсіі. Але ж ёсць і дрэнныя вынікі: рызыка шэрагу небяспечных хваробаў, у тым ліку дэпрэсіі, можа захоўвацца ў былых хворых на кавід на працягу да двух гадоў з моманту хваробы.
Каб зрабіць такія высновы, навукоўцы прааналізавалі даныя прыкладна 1,2 мільёнаў чалавек, якія захварэлі на кавід у перыяд з 20 студзеня 2020 года па 13 красавіка 2022 года, і параўналі іх з данымі аналагічных па стане здароўя і іншых характарыстыках людзей, якія на кавід не хварэлі, але перанеслі іншыя рэспіраторныя інфекцыі.
Высветлілася, што ў тых, хто перанёс кавід, узмацняліся сімптомы трывожных разладаў, але на працягу некалькіх наступных месяцаў рызыка павышанай трывожнасці і дэпрэсіі ў гэтых людзей зніжалася да ўзроўню кантрольнай групы. Тым не менш, нават праз амаль два гады пасля кавіду ў удзельнікаў даследавання адзначалі павышаную рызыку праблем з памяццю і кагнітыўнымі здольнасцямі, дэменцыі, псіхатычных разладаў, эпілепсіі і сутаргаў.
Калі ж размова ішла пра больш новыя штамы кавіду, то-бок пра дэльту і амікрон, то тыя, хто хварэў на іх, мелі павышаную рызыку ішэмічнага інсульту, праблем з памяццю ці ўвагай, бяссонніцы, трывожных разладаў, эпілепсіі і сутаргаў. Наступствы кавіду не абмінулі і дзяцей: у першыя паўгода пасля хваробы тыя маюць павышаную рызыку праблем з памяццю ці ўвагай, бяссонніцы і сутаргаў.