У Віцебску затрымалі Барыса Хамайду. Ён адмовіўся зняць медальён з «Пагоняй»
Барыс Хамайда 25 жніўня прыйшоў у суд, каб падтрымаць журналістку Таццяну Мацвееву, якую судзілі па абвінавачванні ў несанкцыянаваным пікетаванні і далі восем сутак арышту, паведамляе БАЖ.
26.08.2022 / 09:41
Медальён з гербам «Пагоня» на чырвонай стужцы распаўсюджвальнік незалежнай прэсы і найстарэйшы віцебскі апазіцыянер Барыс Хамайда носіць штодзень. Раней у міліцыі не было прэтэнзій да знешняга выгляду спадара Барыса, таму для яго было цалкам нечаканым, што ў судзе Кастрычніцкага раёна «Пагоню» загадалі зняць.
Каля паста дзяжурнага Барыса Хамайду спыніў супрацоўнік Кастрычніцкага РАУС Уладзіслаў Шышкавец — той самы, што склаў адміністрацыйны пратакол на журналістку.
Міліцыянт запатрабаваў, каб Хамайда зняў медальён, той адмовіўся і спрабаваў патлумачыць міліцыянту, што носіць яго штодня. А галоўнае — што выява «Пагоні» не з’яўляецца забароненай, і яна ёсць нават на гербе Віцебскай вобласці. Адно што там яна — на зялёным фоне, а ў Барыса Хамайды — на чырвоным.
Уладзіслаў Шышкавец выклікаў службовую машыну, і актывіста павезлі ў пастарунак.
Прысутныя на судзе па справе Таццяны Мацвеевай прыгадалі, што на пачатку мінулага пасяджэння Барыс Хамайда не падняўся з лаўкі ў той момант, калі зайшоў суддзя. У адказ на пытанне, чаму ён не ўстае, 74-гадовы апазіцыянер сказаў, што яму баляць ногі. Тыя, хто быў побач, дапамаглі сталаму чалавеку падняцца, і інцыдэнт быў вычарпаны. Але яго, магчыма, запомніў міліцыянт Уладзіслаў Шышкавец. Верагодна, ён чакаў з’яўлення Хамайды на наступным пасяджэнні, і медальён з «Пагоняй» стаў нагодай для затрымання.
Сябры чакалі, што Барыса Хамайду адпусцяць з пастарунка, бо затрыманне за медальён шмат каму падалося беспадстаўным. Але ўвечары на волю актывіст так і не выйшаў.
Яго мабільны тэлефон адключаны. Атрымаць нейкую інфармацыю пра спадара Хамайду праблематычна: ён не мае сям’і, а паведамляць нешта староннім людзям у міліцыі адмаўляюцца. Верагодна, што Барыса будуць судзіць, але што яму ставяць у віну, пакуль невядома.