Viartańni, nadziei i straty. 10 hałoŭnych muzyčnych albomaŭ Biełarusi
Atmaśfiera, u jakoj žyvuć Biełaruś i biełarusy voś užo treci hod nie moža nie adbivacca na mastactvie. Tym bolš cenicca toje, što, niahledziačy ni na što, praciahvaje vychodzić. Sabrali dla vas dziasiatku z najbolš značnych muzyčnych relizaŭ 2022 hoda.
26.12.2022 / 10:49
Intelligency — Technoblues Therapy Part I & Part II
Elektronščyki sabrali ŭvieś najlepšy materyjał, zrobleny za apošnija dva hady, kab vydać jaho asobnym albomam. U vyniku kantentu akazałasia ažno na 17 trekaŭ, tamu ich raźbili na dva relizy: adzin vyjšaŭ 3 lutaha, druhi — 29 krasavika.
Sam hurt apisaŭ toje, što ŭ ich atrymałasia, jak «lohkuju aŭdyjalnuju terapiju». Terapija technabluza — takim žanram sami Intelligency akreślivajuć svaju tvorčaść.
«Raźbitaje Serca Pacana» — ŠansOFF
Zimoj 2021 hoda hurt u poŭnym składzie zatrymali padčas kancerta na bazie adpačynku «Ahaniok» i asudzili na 15 sutak.
U izalatary ŭ Žodzinie Dzianis Tarasienka napisaŭ vosiem vieršaŭ pra turemnaje žyćcio, paśla Pavieł Haradnicki prydumaŭ da ich muzyku. Tak atrymaŭsia nietypovy dla RSP albom, jaki daloka nie najlepšy ŭ dyskahrafii hurta, ale niekalki tancavalnych chitoŭ u im možna adšukać.
Weed & Dolphins — Aura
Minski kłaŭd-pank hurt značna bolš viadomy za miežami Biełarusi, čym na radzimie. Čytačy «NN» mohuć być ź im znajomyja pa rejtynhach klipaŭ — Weed & Dolphins traplali ŭ ich u 2019 i 2021 hadach.
U lutym 2022-ha jany ŭpieršyniu za piać hadoŭ zrabili reliz u vyhladzie nie asobnaha sinhła — vyjšła EP, jakaja składajecca ź siami piesień.
Hrupa «Saša i Siroža» — «Kuj»
Muzyčny kambek hoda. Viasnoj 2020 hoda Siarhiej Michałok abviaściŭ pra adnaŭleńnie lehiendarnaha dueta «Saša i Siroža», ale dalej za anłajn-repietycyi sprava nie pajšła.
U vyniku mastak Alaksiej Chackievič uziaŭ spravu ŭ svaje ruki, nabraŭ muzykantaŭ i vypuściŭ absalutna novy materyjał. Kali vy šukajecie, čaho b lohkaha i pazityŭnaha pasłuchać — voś vydatnaja prapanova.
Čytajcie i słuchajcie taksama: Tancavalnaja lichamanka, tyktok-trendy i vajna — TOP-10 muzyčnych albomaŭ hoda pa viersii «Našaj Nivy»
Super Besse — Tristesse
Biełaruski post-pank hurt paśpiachova hastraluje pa ŭsim śviecie. Heta nie pierabolšańnie: Super Besse ŭ 2022-m davali kancerty ŭ Polščy, Rumynii, Narviehii, Vienhryi, Bałharyi i prajechalisia z turam pa Mieksicy.
Svoj novy łonhpłej, jaki zapisvaŭsia padčas pandemii, muzykanty apisali vielmi łakanična: himny sumu, straty i adzinoty.
Pandemija skončyłasia, ale viesialej ad hetaha śvietu dakładna nie stała.
Relikt — Byli, Jość, Budziem
Relikt sioleta vypuściŭ nietypovy albom — u im sabranyja nie aŭtarskija treki, a kaviery na viadomyja hurty i vykanaŭcaŭ z 1980—90-ch: «Mroju», ULIS, «Bondu», «Kamełot», Siaržuka Sokałava-Vojuša i inšych.
Na vokładcy alboma-padarožža hurt raźmiaściŭ partret kultavaha biełaruskaha muzyčnaha žurnalista i krytyka Vitaŭta Martynienki.
«Hetym albomam my chacieli addać daninu pavahi nie tolki «hienierałam ajčynnaha roka», ale i takim asobam, jak, naprykład, Anatol Mialhuj, Vitaŭt Martynienka, Siarhiej Filimonaŭ — usim tym, chto rupiŭsia na nivie Biełaruščyny», — padkreśliŭ hurt svaim relizam.
Źmicier Vajciuškievič — «Viecier»
U kancy lipienia śpiavak i muzykant paradavaŭ svaich prychilnikaŭ novym albomam, zapisanym razam z WZ-Orchestra.
U «Vietry» — vosiem piesień, pryśviečanych svabodzie, radzimie i kachańniu.
«Sojuz» — Force of the Wind
Heta, napeŭna, samy pryhožy ŭ muzyčnym płanie reliz hetaha hoda. Abajalnych biełarusaŭ zacaniŭ navat amierykanski repier Tyler, the Creator, jaki prakamientavaŭ adzin z dopisaŭ «Sajuza».
Amierykaniec napisaŭ roŭna adno słova: «INSANE!» («Šalona!»).
U dobrym sensie albom sapraŭdy taki i jość. Biełarusaŭ na jaho stvareńnie natchniŭ džaz i brazilskaja estrada siaredziny minułaha stahodździa.
Hučyć «Force of the Wind» tak, nibyta heta saŭndtrek ź minułaha žyćcia. U pryncypie častkova tak i jość — albom častkova pisali ŭ Kijevie na studyi Ivana Dorna (a taksama ŭ Biełarusi, ZŠA, Niderłandach i Brazilii). U im niama bolu, jon poŭny nadziej i maraŭ.
«Ciapier heta kamuści moža zdacca niedarečnym. Ale heta adbitak taho času i adčuvańni, jakimi nam chaciełasia b padzialicca», — adkazvajuć na mahčymyja pretenzii muzykanty «Sajuza».
AKUTE — «Napałovu tut»
Paśla troch z pałovaj hadoŭ maŭčańnia mahiloŭski hurt viarnuŭsia z novymi pieśniami.
«Heta albom-viartańnie: my viarnulisia ź niekatoraha zacišša, viarnulisia da hitarnaha saŭnda. Roŭna pałova nas — tut», — tak łakanična i zahadkava mahiloŭcy apisali svoj reliz.
Bolš jany ničoha nie kažuć i kancertaŭ nie dajuć. A što kazać — treba słuchać i tancavać pad dyska-dekadans.
Śvieta Bień, Hala Čykis — «Prijom!»
Z hetym albomam vy mahli paznajomicca krychu raniej u padborcy suśvietnych relizaŭ. Ale my jaho nie mahli nie ŭklučyć i siudy, bo padborka była b nie poŭnaj.
Heta vielmi dobraja hłybokaja muzyka, jakaja daje słuchaču nadzieju na toje, što jon nie adzin i napieradzie jaho jašče čakaje niešta dobraje.