Kaśpiarovič, Karpovič… Chto takaja prapahandystka Alena Krasoŭskaja, jakaja śviedčyła suprać viasnoŭcaŭ
Jana vydavała siabie za pravaabaroncu, a paśla śćviardžała, što ŭ Biełarusi niama palitviaźniaŭ i ŭ turmach dobraja situacyja.
05.01.2023 / 20:14
Fota: «SB. Biełaruś siehodnia»
Pavodle jaje ŭłasnych słoŭ, Krasoŭskaja skončyła Minskuju miedyčnuju vučelniu. Potym pracavała ŭ tahačasnaj minskaj papraŭčaj kałonii №1, jakaja mieściłasia na vulicy Apanskaha (ciapier heta vulica nazyvajecca Kalvaryjskaja, a na miescy kolišniaj kałonii pabudavali žyły kompleks «Kaskad»). Tam jana paznajomiłasia sa svaim budučym mužam, jaki mieŭ niekalki sudzimaściaŭ. Paźniej jon raptoŭna pamior u miescach pazbaŭleńnia voli. Aficyjnaja viersija śmierci — samahubstva.
U 2011 hodzie Alena Krasoŭskaja adnačasova sprabavała pracaŭładkavacca ŭ kampaniju «Havary praŭdu» i ŭ pravaabarončuju arhanizacyju «Płatforma Inavejšn», jakuju ŭznačalvaŭ Andrej Bandarenka. U arhanizacyju źviartalisia pa dapamohu ludzi, jakija apynulisia ŭ miescach pazbaŭleńnia voli. Tady pravaabaronca Bandarenka adznačaŭ, što Krasoŭskaja — dobry vykanaŭca.
Krasoŭskaja dapamahała stvarać struktury ŭ 15 haradach i naładžvać tam pracu sajta. Spravy ŭ arhanizacyi vialisia paśpiachova, Bandarenku ŭdałosia dabicca pierahladu niekatorych kryminalnych spraŭ, i niekalki čałaviek u vyniku vyjšła na volu.
U 2014 hodzie Bandarenku aryštavali. Na sudzie tady vystupaŭ patajemny śviedka i jaho supiarečlivyja pakazańni sud pakłaŭ u asnovu abvinavaŭčaha prysudu. Hetym śviedkam była žančyna. Vykazvałasia mierkavańnie, što hetym patajemnym śviedkam mahła być Alena Krasoŭskaja.
Bandarenku asudzili pa troch častkach artykuła 339 Kryminalnaha kodeksa (ździajśnieńnie chulihanstva, złosnaha chulihanstva i asabliva złosnaha chulihanstva) da čatyroch hadoŭ pazbaŭleńnia voli ŭ kałonii ŭzmocnienaha režymu. Paźniej pa amnistyi termin skaracili da troch hadoŭ.
Jašče da suda, kali tolki adbyłosia zatrymańnie Bandarenki, Krasoŭskaja razam z aktyvistam Płoščy-2010 Mikitam Lichavidam naviedała žonku Andreja i dała joj padpisać damovu dareńnia na aŭtamabil, jaki naležaŭ siamji Bandarenka. Jana tady zajaviła, što aŭtamabil nasamreč va ŭłasnaści «Płatformy Inavejšn» i patrebny joj dla pracy.
Za paŭhoda Krasoŭskaja-Kaśpiarovič (jana tady nasiła padvojnaje proźvišča) likvidavała sietku filijałaŭ «Płatformy Inavejšn», a potym zakryła i sajt arhanizacyi.
U 2015 hodzie jana zarehistravała novuju arhanizacyju pad nazvaj «Rehijon-119». Na praktycy vyśvietliłasia, što sajta ŭ arhanizacyi niama, hrupy ŭ sacsietkach miortvyja, numaroŭ telefonaŭ taksama nie było paznačana. Adnak paśla likvidacyi «Płatformy Inavejšn» mienavita ŭ «Rehijona-119» zastałosia prava naviedvać miescy pazbaŭleńnia voli.
Pra psieŭdapravaabaroncu zahavaryli paśla taho, jak jana pradstaviła spravazdaču pra stanovišča biełaruskaj pienitencyjarnaj sistemy. Krasoŭskaja ŭ joj adznačyła, što situacyja ŭ biełaruskich turmach vielmi dobraja. I zajaviła, što pamylałasia, kali raniej krytykavała ŭmovy ŭtrymańnia.
Krasoŭskaja viadomaja svaimi skandalnymi zajavami, siarod jakich śćvierdžańnie, što ŭ Biełarusi niama palitviaźniaŭ, što treba bolš žorstka karać pa «narkatyčnych» artykułach. Taksama jana kazała, što padtrymlivaje śmiarotnaje pakarańnie.
U 2018 hodzie Krasoŭskuju zaŭvažyli ŭ restaranie va ŭročyščy Kurapaty «Pojediem-pojedim». Jana abraźliva vykazvałasia suprać aktyvistaŭ, jakija trymali tam vachtu.
Alena Krasoŭskaja ŭ Kurapatach. Fota: fejsbuk Maksima Viniarskaha
«Čamu biznes musić pakutavać ad taho, što chtości vyrašyŭ, što ŭ tym miescy nielha jeści? Ja nie razumieju. My nie jeli na kaściach. Kości lažać našmat dalej. Absalutna nijakich prablemaŭ», — kazała jana tady.
Niekalki hadoŭ tamu Krasoŭskaja adčyniła maleńki restaran «Jeda» ŭ centry stalicy. Tam źbiralisia prapahandysty režymu. Ale ŭ 2021 hodzie ŭstanova začyniłasia ź nieviadomych pryčynaŭ. Krasoŭskaja prakamientavała toje zakryćcio koratka: «Rana radujeciesia».
Ciapier Krasoŭskaja publikujecca ŭ łukašenkaŭskaj haziecie «SB. Biełaruś siehodnia». U śniežni 2022 hoda jana vydała artykuł, dzie zaklikała «kančatkova razabracca ź niepatrebnym zmaharskim chłamam». Prapahandystka plažyła ŭ tekście błohiera, byłoha hałoŭnaha redaktara «Anłajniera» Dzianisa Blišča, eks-kandydatku ŭ prezidenty Taćcianu Karatkievič, Dźmitryja Cimaškova, jakoha šmat chto viedaje jak «Lilčynaha tatu», mastactvaznaŭcu Alaksandra Radajeva i jaho žonku, pradziusarku Inu Radajevu.
Hałoŭnaja pretenzija aŭtarki da hierojaŭ artykuła ŭ tym, što jany niedastatkova chvalać i niedastatkova radujucca biełaruskim realijam, «z usich sił praciahvajuć mazać našu rečaisnaść čornaj farbaj».
Jaje siońniašniaje źjaŭleńnie na sudzie nad viasnoŭcami vyklikała abureńnie. Valancin Stefanovič zajaviŭ chadajnictva, kab Krasoŭskuju vydalili z pracesu, bo, pa jaho mierkavańni, jana davała pakazańni pa spravie jak śviedka pad inšym proźviščam — «Karpovič».