Padličyli kolkaść represavanych za antyvajennyja vystupy. Jana šakuje
Siarod tych, kaho sudzili ci sudziać łukašysty, — piensijanierka, jakaja pakinuła nadpis na prypynku «nie vajnie», svajaki kalinoŭcaŭ i tyja, chto pieradavaŭ infarmacyju pra ruch rasijskaj techniki. Padličyli, kolki čałaviek represavana — prynamsi, tych, čyje imiony viadomyja. Realnaja ličba budzie, napeŭna, u razy bolšaja.
24.02.2023 / 11:23
Kolki biełarusaŭ paciarpieła za antyvajenny supraciŭ?
Pa źviestkach inicyjatyvy Dissidentby, z 24 lutaha 2022 hoda pa roznych palityčnych kryminalnych spravach zatrymali nie mienš za 2300 biełarusaŭ. Pa administracyjnych spravach, źviazanych z palitykaj, było zatrymana bolš za 6500 čałaviek.
Najbolšy antyvajenny pratest adbyŭsia ŭ dni refierendumu 27—28 lutaha 2022 hoda. Pa infarmacyi pravaabaroncaŭ «Viasny», pa vynikach hetych pratestaŭ było zatrymana nie mienš za 1100 čałaviek, ź jakich kala 600 byli aryštavanyja.
Byli i akcyi asobnych ludziej, jak u Navapołacku, dzie žančyna vyjšła na znak pratestu padčas školnaj liniejki.
Dakładna padličyć maštab represij mienavita za padtrymku Ukrainy i asudžeńnie vajny niemahčyma. «Časta niezrazumieła, što stanovicca pryčynaj zatrymańnia: udzieł u antyvajennym ruchu, antyvajennyja kamientary abo niešta inšaje», — kaža suzasnavalnica inicyjatyvy Dissidentby Maryna Kasinierava. Pra mnohija vypadki zatrymańniaŭ pravaabaroncam i žurnalistam nie paviedamlajecca.
Dakładna možna nazvać bolš za 90 imionaŭ tych, chto ciapier u SIZA ci ŭžo asudžany pa kryminalnych spravach niepasredna za antyvajennuju dziejnaść. Pa acenkach pravaabaroncaŭ, usiaho takich palitviaźniaŭ — niekalki socień.
Antyvajennyja pratesty
Viadoma, što častka zatrymanych paśla «sutak» za antyvajenny pratest 27—28 lutaha nie vyjšła na volu.
Tak stałasia z Alaksandram Komaram i Andrejem Andrejevym. Ich katavali paśla zatrymańnia, Komara źbili dvojčy, druhi raz — za toje, što zapeckaŭ kryvioju mašynu śpiecsłužboŭcaŭ. Paśla im prysudzili try i dva z pałovaj hady kałonii adpaviedna.
Skrynšot videa, jakoje vykarystoŭvajecca jak dokaz «viny» Komara i Andrejeva
Paśla pratestaŭ 27—28 lutaha pa «kryminałkach» zatrymali jašče niekalki čałaviek: da prykładu, u hety dzień padčas hałasavańnia zatrymali Ihara Fiodarava z Baranavičaŭ, jakomu prysudzili dva hady źniavoleńnia (za kamientar z asudžeńniem vajny), i Marharytu Błaško ź Minska, jakoj prysudzili try hady «chimii» z nakiravańniem (za samu akcyju).
Zatrymlivali navat za zakliki da akcyj pratestu. Da prykładu, viadoma pra zatrymańnie žodzinca Alaksandra Mironava, jaki ŭ čatach zaklikaŭ miascovych žycharoŭ da ŭdziełu ŭ akcyi pratestu. Paźniej jamu prysudzili dva hady kałonii.
Ludziej zatrymlivajuć za samaje niavinnaje. U śniežni 2022 hoda ŭ Breście 68-hadovuju piensijanierku Ludmiłu Kohan zatrymali za nadpis «nie vajnie» na došcy abjaŭ na prypynku transpartu. Zaraz jaje čakaje sud pa kryminalnaj spravie.
«Złačynstva» Ludmiły Kohan. Fota: Ministerstva ŭnutranych spraŭ
U vieraśni 2022 hoda zatrymali piaciarych udzielnikaŭ akcyi pa vyviešvańni ściahoŭ Biełarusi i Ukrainy na adnym z damoŭ pa vulicy Lesi Ukrainki ŭ žniŭni 2022 hoda. Usie jany ciapier prachodziać pa kryminalnaj spravie i ŭtrymlivajucca ŭ turmie Žodzina.
Voś hetyja ściahi jašče da vyviešvańnia. Fota: MUS
Jašče šaściarych biełarusaŭ zatrymali za vyviešvańnie biełaruskaha i ŭkrainskaha ściahoŭ na aporach ŁEP na MKAD u kastryčniku 2022 hoda. Usie jany taksama ŭ SIZA.
Fota z akcyi na pačatku kastryčnika 2022. Fota: sacsietki
«Rejkavyja partyzany»
Na čyhuncy było ździejśniena nie mienš za dvanaccać arhanizavanych akcyj sabatažu (da prykładu, akcyja siamji Hlebkaŭ tudy nie ŭvachodzić — jany spantanna padpalili biarvieńnie na rejkach). Na siońnia viadomyja imiony adzinaccaci aryštavanych «rejkavych partyzanaŭ» i adnoj žančyny, jakaja musiła im dapamahčy (Alesia Bunievič).
Usie jany atrymali vielizarnyja turemnyja prysudy — ad 11 hadoŭ turmy dla Siarhieja Hlebki i Alaksieja Šyškaŭca da 23 hadoŭ dla Dzianisa Dzikuna.
Ludzi hoda pa viersii «Našaj Nivy» — hieroi, jakija chacieli spynić vajnu. Što pra ich viadoma?
Ludzi, jakija pieradavali infarmacyju pra pierasoŭvańnie vajskovaj techniki RF
Pravaabarončamu centru «Viasna» viadoma bolš za tryccać ludziej, jakich zatrymlivali za pieradaču takoj infarmacyi. Jak padličyŭ «Biełaruski Hajun», ahułam infarmacyju pra pierasoŭvańnie vajskovaj techniki pieradali niekalki tysiač biełarusaŭ, jakija ryzykavali svajoj svabodaj.
Zatrymanyja pa takich spravach atrymlivajuć realnyja terminy ŭ kałonii, zvyčajna — kala troch hadoŭ turmy.
Što viadoma pra padletka, jakoha adpravili ŭ kałoniju za toje, što źniaŭ na videa rasijskuju techniku?
Antyvajennyja kamientatary
Samyja viadomyja vypadki — heta spravy 20-hadovaj Danuty Pieradnia i 19-hadovaha Ilji Vieramiejeva. Im za niekalki dopisaŭ u telehramie dali pa 6,5 hoda kałonii kožnamu.
Danuta Pieradnia i Ilja Vieramiejeŭ. Fota: ich staronki «UKantakcie»
Ahułam ža takich ludziej, pa źviestkach «Viasny», nie mienš za dvaccać čałaviek. Bolšaść ź ich atrymała prysudy ŭ vyhladzie pazbaŭleńnia voli ŭ kałonii.
«Špijony»
Paśla pačatku vajny ŭ biełaruskich siłavikoŭ pačałosia palavańnie na «špijonaŭ». Chutka budzie sud nad ukraincam Paŭłam Kupryjenkam i dvuma žycharami Homielščyny — Dźmitryjem Sałaviančykam i Tarasam Mačynskim. Im pahražaje da piatnaccaci hadoŭ turmy.
Źleva naprava: Kupryjenka, Mačynski, Sałaviančyk. Fota: BT i «UKantakcie»
Jašče adzin čałaviek, jakoha publična vinavacili ŭ ahienturnaj dziejnaści, — były vajskoviec Dźmitryj Hulin. Biełaruskija śpiecsłužby kažuć, što byccam by jon byŭ zavierbavany SBU ŭ pačatku vajny, a paśla prylotu ŭ Biełaruś zatrymany.
Ale całkam imavierna, što situacyja značna bolš prazaičnaja — mužčyna pavioŭsia na apieratyŭnuju hulniu biełaruskich śpiecsłužbaŭ. Ciapier jamu pahražaje da 15 hadoŭ turmy.
Dźmitryj Hulin. Fota: BT
U žniŭni 2022 hoda stała viadoma pra zatrymańnie biełarusa Jarasłava Sakoviča. Jaho vinavaciać byccam by ŭ ahienturnaj dziejnaści i ŭdziele ŭ vajnie va Ukrainie ŭ 2019 hodzie. Ale ŭ hetych abvinavačvańniach zanadta šmat niuansaŭ.
Jarasłaŭ Sakovič z žonkaj. Fota: «Adnakłaśniki»
Jahonyja znajomyja i siabry kateharyčna admaŭlajuć navat tearetyčnuju mahčymaść jahonaha ŭdziełu va Uzbrojenych siłach Ukrainy, a vyjechać ź Biełarusi, pa ichnich źviestkach, jon nie moh praz chvarobu baćkoŭ. Pa źviestkach resursu Dissidentby, jaho doŭhi čas katavali supracoŭniki biełaruskich śpiecsłužbaŭ, kab jon skazaŭ na kamieru, što «vajavaŭ va USU». Sakovič na videa sapraŭdy vyhladaje źbitym.
Na niepraŭdzivaść źviestak u videa navodzić jašče adzin fakt: u videa biełaruskich śpiecsłužbaŭ Sakovič kaža, što «ŭ 2019 hodzie ŭstupiŭ u dobraachvotny bataljon «Arata»» (były «Pravy siektar»). Ale reč u tym, što «Aratu» vyvieli z zony bajavych dziejańniaŭ u 2018 hodzie.
Ciapier jaho ŭtrymlivajuć u minskim SIZA na vulicy Vaładarskaha. Suprać mužčyny, pa źviestkach biełaruskich śpiecsłužbaŭ, zaviedziena niekalki kryminalnych spraŭ.
Tyja, chto chacieŭ pajechać vajavać va Ukrainu i dapamahaŭ joj, a taksama svajaki vajaroŭ
Na siońnia viadoma pra vosiem čałaviek, jakija chacieli pajechać dapamahać Ukrainie i byli zatrymanyja. Heta 20-hadovy sirata Andrej Raptunovič, 30-hadovy Anatol Michajłaŭ, 19-hadovy Andrej Masłaŭ, 50-hadovy Michaił Listapadaŭ, 29-hadovy Jaŭhien Karpaŭ, 37-hadovy Siarhiej Vajciuk, Alaksandr Ajnutdzinaŭ i 52-hadovy Siarhiej Hrybovič. Ich dakładna bolej, ale imiony niekatorych nieviadomyja.
Źvierchu na fota Siarhiej Vajciuk, sprava — Andrej Raptunovič. Źnizu źleva naprava — Ajnutdzinaŭ i Masłaŭ. Fota: «UKantakcie» i Dissidentby.com
Taksama pieraśledujuć svajakoŭ tych, chto pajechaŭ vajavać va Ukrainu. Tak, dvajuradnaj siastry dobraachvotnika Jana Mielnikava Viktoryi Navickaj prysudzili paŭtara hoda kałonii, a brat Vadzima Kabančuka Viktar Frančuk čakaje suda — aboje jany ciapier u SIZA na vulicy Vaładarskaha.
Viktoryja Navickaja i Viktar Frančuk. Fota: dissidentby.com
Taksama biełarusaŭ zatrymlivali za achviaravańni pałku Kalinoŭskaha i Ukrainie. Da prykładu, 28-hadovaja dziaŭčyna była zatrymanaja za achviaravańnie ŭ kancy kastryčnika 2022 hoda. Jana skazała, što achviaravała, bo chacieła dapamahčy ludziam va Ukrainie. Zaraz joj pahražaje da vaśmi hadoŭ turmy.
Fota: «UKantakcie»
Sapraŭdny maštab antyvajennaha supracivu ŭ Biełarusi i jahonyja nastupstvy jašče daviadziecca daśledavać u bližejšyja hady.