Ёзвяк: За вывад беларускага калію з-пад санкцый выступаюць Партугалія, Бельгія, Нідэрланды і Францыя
Карэспандэнт «Радыё Свабода» ў Бруселі Рыкард Ёзвяк, вядомы сваімі інсайдарскімі сувязямі, даў інтэрв'ю беларускай службе «Радыё Свабода», у якім падзяліўся тым, што яму вядома адносна таго, як у кулуарах структур Еўрасаюза вядуцца дыскусіі адносна санкцый супраць беларускага калію.
23.02.2023 / 22:11
На выключэнні беларускіх калійных угнаенняў з новага санкцыйнага пакета ЕС настойваюць Бельгія, Нідэрланды, Францыя і Партугалія, паведаміў Ёзвяк. Ключавую ролю тут іграе Партугалія, якая праводзіць у Еўропе інтарэсы сваёй былой калоніі, Бразіліі. Гэтым самым Ёзвяк пацвердзіў учарашнюю інфармацыю на гэты конт «Нашай Нівы».
ААН і Бразілія праз Партугалію лабіруюць вывад Гуцэрыева і Галаватага з-пад санкцый
Ёзвяк сцвярджае, што ў пытанні з беларускім каліем Еўропа прыслухоўваецца да бедных, аднак палітычна ўплывовых краін Паўднёвага паўшар'я, якія заяўляюць пра небяспеку голаду ў выпадку недахопу ўгнаенняў. І гэта сур'ёзны аргумент.
Таксама Ёзвяк паўтарыў свой ранейшы даволі скандальны тэзіс пра тое, што ЕС у санкцыйным плане ставіцца да Беларусі больш мякка, чым да Расіі, бо гэтага просіць афіцыйны Кіеў. Украінцы не хочуць, каб Лукашэнка больш актыўна ўключыўся ў вайну і не хочуць яго правакаваць, а Брусель да іх у гэтым плане прыслухоўваецца.
У новым санкцыйным пакеце, які цяпер рыхтуецца, па словах Ёзвяка, найбольш прынцыпова пакінуць у сіле санкцыі супраць беларускага калію для Літвы, бо ў адваротным выпадку яе ўлады могуць чакаць унутрыпалітычныя наступствы. Урэшце ж давядзецца ісці на нейкі кампраміс, але як ён будзе выглядаць, журналіст-інсайдар не ведае.