БЧ плануе звольніць 8 тысяч супрацоўнікаў — «Супольнасць чыгуначнікаў»
«Супольнасць беларускіх чыгуначнікаў» са спасылкай на свае крыніцы ў сістэме паведамляе, што на Беларускай чыгунцы нібыта плануюцца масавыя скарачэнні.
10.03.2023 / 18:31
Намеры скараціць кадры нібыта звязаны з бядотным фінансавым становішчам кампаніі і санкцыйным ціскам на Беларусь, які непасрэдна тычыцца чыгуначных перавозак.
Адносна меркаваных маштабаў звальненняў называецца лічба 8 тысяч чалавек, але гэта толькі прыблізная лічба, якая ў працэсе можа і павялічыцца.
«Супольнасць чыгуначнікаў» падкрэслівае, што звальняць могуць не толькі супрацоўнікаў Беларускай чыгункі, якія ўдзельнічалі ў пратэстах, але і іншых работнікаў, якіх будуць лавіць на любой правіне, каб знайсці фармальную нагоду для звальнення.
Па стане на верасень 2022 года ў структуры Беларускай чыгункі працавалі каля 63 тысяч чалавек.