Польшча фармуе міжнародную кааліцыю, каб не дапусціць беларусаў і расіян на Алімпіяду
Польшча фармуе кааліцыю з 36 краін, каб не дапусціць спартсменаў з Беларусі і Расіі на міжнародныя спаборніцтвы, у тым ліку і на Алімпіяду-2024 у Парыжы. Пра гэта заявіў міністр спорту Польшчы Каміль Бартнічук у эфіры радыё RMF24.
27.04.2023 / 16:38
Каміль Бартнічук. Фота: RMF24
«Мы знаходзімся ў працэсе фармулявання наступнай пазіцыі кааліцыі 36 краін. 15 мая ў нас Рада ЕС па спорце, дзе мы таксама плануем прыняць дэкларацыю, якая будзе выразна выступаць супраць вяртання расіян і беларусаў на міжнародныя арэны», — заявіў Бартнічук.
Пры гэтым Польшча пакуль не атрымала адказу на свой пратэст, пададзены ў МАК супраць допуску расіян і беларусаў да адборачных спаборніцтваў да Алімпіяды-2024.
Таксама польскі міністр паведаміў, што на Еўрапейскіх гульнях, якія пройдуць сёлета з 21 чэрвеня па 2 ліпеня ў Кракаве, беларусаў з расіянамі дакладна не будзе, ім палякі проста не выдадуць візы. Але можна зрабіць выключэнні для тых спартсменаў, якія выступяць з «выразнай заявай, якая асуджае расійскую агрэсію супраць Украіны і злачынствы, учыненыя там расіянамі».
Чытайце таксама:
Польскі міністр спорту прапанаваў стварыць для беларусаў і расіян зборную бежанцаў
Украінка Світоліна не паціснула руку беларусцы Сасновіч пасля тэніснага матча
Латвія не дала візу галоўнаму трэнеру зборнай Казахстана. Прычына — яго беларускі пашпарт