«Nie stajała pytańnie — sustrakacca sa mnoj ci ź Cichanoŭskaj». Pra što Łatuška havaryŭ u Kijevie z Padalakom?
Kiraŭnik NAU i pradstaŭnik Abjadnanaha pierachodnaha kabinieta pa tranzicie ŭłady Pavieł Łatuška pajechaŭ ź vizitam u Kijeŭ. Jon sustreŭsia z daradcam kiraŭnika Ofisa Uładzimira Zialenskaha Michaiłam Padalakom. Detali sustrečy jon raspavioŭ «Našaj Nivie».
31.05.2023 / 22:12
Pavieł Łatuška na pres-kanfierencyi ŭ Kijevie. Skryn strymu Ukrinform TV
«Hałoŭnaja vysnova, jakuju možna zrabić pa vynikach sustrečy z daradcam Ofisa prezidenta Ukrainy, — ciahnik Łukašenki syšoŭ, stancyja Ukraina dla jaho zakrytaja, na joj hety ciahnik bolš nie spynicca.
Druhaja vysnova — z režymam Łukašenki aficyjny Kijeŭ nie padtrymlivaje nijakich kamunikacyj. Dla mianie, jak pradstaŭnika demakratyčnych sił Biełarusi, heta vielmi važna.
Treciaja vysnova — jość upeŭnienaść, što ciapier partniorstva Ukrainy ź Biełaruśsiu budzie ažyćciaŭlacca z pradstaŭnikami šyrokich demakratyčnych sił», — adznačaje Łatuška.
Z Padalakom jany abmiarkoŭvali adkaznaść režymu Łukašenki za niezakonnaje pieramiaščeńnie dziaciej, rolu Sajuznaj dziaržavy ŭ arhanizacyi ahresii suprać Ukrainy, vajennuju daktrynu Sajuznaj dziaržavy, jaje rolu, u tym liku ŭ pieramiaščeńni jadziernaj zbroi na terytoryi Biełarusi. Sustreču inicyjavaŭ biełaruski bok pry padtrymcy deputata Viarchoŭnaj Rady Ukrainy Bahdana Jaromienki.
Hałoŭnaj metaj vizitu Łatuški va Ukrainu było pieradać papiaredniuju spravazdaču ab roli Łukašenki i Sajuznaj dziaržavy ŭ niezakonnym pieramiaščeńni i pieravučvańni ŭkrainskich dziaciej na terytoryi Biełarusi. Uładam Ukrainy pieradali dadatkovyja materyjały da hetaj spravazdačy, 12 kiejsaŭ dziaciej-sirot, jakija byli vyviezieny ŭ Biełaruś. A taksama abmierkavali, čym biełaruskaja apazicyja moža jašče dapamahčy ŭ hetym rasśledavańni.
Łatuška zaŭvažaje, što pytańnie nie stajała: sustrakacca ź im ci ź Cichanoŭskaj.
«My pryjechali pakazać spravazdaču, padrychtavanuju NAU pa faktach pieramiaščeńnia ŭkrainskich dziaciej, roli ŭ hetym Łukašenki i Sajuznaj dziaržavy. Materyjały byli pryniatyja ŭkrainskim bokam dla vykarystańnia pry praviadzieńni papiaredniaha śledstva, jakoje robić Hienieralnaja prakuratura pa vajennych złačynstvach.
Takija materyjały važnyja dla ŭpaŭnavažanaha pa pravach čałavieka ambudsmiena Ukrainy, kab zrazumieć i atrymlivać bolš hłybokuju infarmacyju ab saŭdziele ŭ hetych złačynstvach mienavita režymu Łukašenki. Zrazumieła, što my padymali pytańnie ab dalejšych krokach, ab pieradačy hetych materyjałaŭ prakuroru ŭ Mižnarodny kryminalny sud u Haazie dla vydačy ordara na aryšt Łukašenki», — tłumačyć Łatuška.
Padčas vizitu va Ukrainu palityk sustreŭsia taksama z deputatami Viarchoŭnaj Rady Ukrainy. Havaryli pra sankcyjny cisk na režym Łukašenki i vypracoŭku stratehii supracoŭnictva ź biełaruskimi demakratyčnymi siłami, taksama byli abmierkavanyja mahčymyja zakanadaŭčyja inicyjatyvy ŭ parłamiencie Ukrainy pa tematycy Biełarusi.
Ź ministram kultury i infarmacyi Ukrainy hałoŭnaj temaj razmovy stała sankcyjnaje ŭździejańnie na łukašenkaŭskuju prapahandu.
«Byli sustrečy ź dziesiaćciu kiraŭnikami, palitołahami, analitykami Ukrainy, jakija zajmajucca Biełaruśsiu. Hałoŭnaja tema — raspracoŭka stratehii dla Biełarusi z pryjarytetam, što treba zrabić siońnia i zaraz dziela taho, kab my pryśpiešyli na šlachu demakratyčnych pieramien.
Jašče byli sustrečy, ale nie dumaju, što ciapier čas pra ich raskazvać. Hałoŭnaje, što my nie pryjšli prasić, my pryjšli dapamahać, razumiejučy, što Ukraina znachodzicca pad ciažaram ahresii, jakuju raźviazała Rasii pry ŭdziele režymu Łukašenki.
Sustreč było našmat bolš, z časam i pra ich raskažam», — padsumoŭvaje palityk.