U šmatpakutnym «Hazpram-centry» chočuć zrabić biznes-apartamienty
Prajekt budaŭnictva «Hazpram-centra» ŭ Minsku na skryžavańni vulicy Filimonava i praśpiekta Niezaležnaści sprabujuć reanimavać.
03.06.2023 / 10:26
Tak vyhladaŭ prajekt «Hazpram-centra»
Na Nacyjanalnym pravavym internet-partale apublikavany zahad №162 ad 1 červienia, na heta źviarnuŭ uvahu «Reform». Im unosiacca źmieny va ŭkaz 2013 hoda ab budaŭnictvie «Hazpram-centra». Dakumient ustupiŭ u siłu z dnia jaho padpisańnia. Minharvykankamu daručana zaklučyć dadatkovaje pahadnieńnie da inviestdahavora z AAT «Hazpram transhaz Biełaruś».
Novym zahadam «Hazpram transhaz Biełaruś» vyzvalajecca ad vypłaty pieniaŭ za nievykanańnie terminu realizacyi inviestycyjnaha prajekta, naličanych da daty ŭstupleńnia zahadu ŭ siłu. Akramia taho, kampanija vyzvalajecca ad arendnaj płaty za ziamielny ŭčastak dla kompleksu z 1 lipienia da 31 śniežnia 2028 hoda.
Terminy realizacyi inviestprajekta padaŭžajucca da 2027 hoda.
Ź inšych źmianieńniaŭ u zahadzie vynikaje, što ŭ «Hazpram-centry» dazvalajecca budavać biznes-apartamienty, pad hetym majucca na ŭvazie šmatfunkcyjanalnyja pamiaškańni. Pry ich budaŭnictvie možna kiravacca normami i praviłami, vyznačanymi dla pamiaškańniaŭ administracyjnaha pryznačeńnia i žyłych pamiaškańniaŭ.
Taksama ŭ adpaviednaści z zahadam ułaśniki, arandatary, lizinhaatrymalniki biznes-apartamientaŭ, a taksama ich siamiejniki, blizkija svajaki, niepracazdolnyja ŭtrymancy mohuć rehistravacca ŭ takich pamiaškańniach (rehistracyja pa miescy znachodžańnia). Vyznačany pieralik dakumientaŭ dla rehistracyi.
U inviestycyjnym dahavory ab budaŭnictvie kompleksu taksama zamacoŭvajecca prava inviestara na źmianieńnie funkcyjanalnaha składu šmatfunkcyjanalnaha kompleksu, jaho asobnych častak, u tym liku da zaviaršeńnia ich budaŭnictva. Źmieny pavinny ŭzhadniacca ź Minharvykankamam i adpaviadać horadabudaŭničym rehłamientam, pryrodaachoŭnym patrabavańniam. Jany nie pavinny pryvodzić da pamianšeńnia abjomu inviestycyj, praduhledžanaha inviestycyjnym dahavoram.
«Hazpram-centr» pačali budavać u minułym dziesiacihodździ. Jaho budoŭla ŭžo prypyniałasia. Zatym jana adnaŭlałasia, byŭ znojdzieny hienieralny padradčyk — italjanskaja kampanija Codest. Mierkavałasia, što centr dabudujuć u 2020 hodzie. Adnak hetaha nie adbyłosia. U 2021 hodzie raboty na placoŭcy prypynialisia.
«Naša Niva» padrabiazna apisvała epapieju z hetym centram:
Trahikamiedyja na budoŭli «Hazpram-Centra»: abstalavańnie na $20 miljonaŭ sapsavałasia