Što budzie z kinateatram «Pieramoha» paśla rekanstrukcyi? Kancepcyja pamianiałasia
Rekanstrukcyju minskaha kinateatra płanujuć zaviaršyć da kanca hetaha hoda.
03.06.2023 / 11:17
Rekanstrukcyja kinateatra «Pieramoha». Fota tut i dalej: «Minsk-Naviny»
Pra źmieny ŭ prajekcie ahienctvu «Minsk-Naviny» raskazaŭ dyrektar pradpryjemstva «Minskaja spadčyna» Alaksandr Kochan.
— Da Dnia horada, jaki adznačajecca ŭ vieraśni, płanujem skončyć usie vonkavyja raboty pa budynku i dobraŭparadkavańni, kab abjekt nabyŭ zavieršany vyhlad, — kaža Kochan. — Što tyčycca ŭnutranych rabot, jany pakul iduć u mienšym abjomie, čym chaciełasia b.
Heta źviazanaje z tym, što pamianiałasia kancepcyja abjekta: syšoŭ raniejšy arandatar, apierataram abjekta vystupić «Kinavideaprakat». Tamu prajektnaja dakumientacyja karektujecca pad inšyja kinatechnałohii i patrabavańni kinaprakatu.
Karekciroŭka zaviaršajecca ŭ červieni, zatym patrebnaja budzie ekśpiertyza, paśla čaho pracy praciahnucca ŭ intensiŭnym farmacie.
Jak viadoma, kinateatr «Pieramoha» maje bieź niečaha 100-hadovuju historyju. Pieršapačatkova heta byŭ kłub «Charčavik». Novuju funkcyju i znakavuju nazvu abjekt atrymaŭ paźniej. Uličvajučy salidny ŭzrost budynka, jaho było vyrašana rekanstrujavać, zachavaŭšy aŭtentyčny vobraz. Raboty startavali ŭ lutym 2022 hoda. Pa prajekcie praduhledžvałasia stvareńnie trochzalnaha kinateatra (da asnoŭnaj zały na 108 miescaŭ dadavalisia na roznych uzroŭniach jašče dźvie). Taksama płanavałasia adkryć dva abjekty hramadskaha charčavańnia, kanfierenc-zału, šmatfunkcyjanalnaje pamiaškańnie. Adnak paśla taho jak Minharvykankam vyznačyŭ UP «Kinavideaprakat» u jakaści arhanizacyi, što budzie ekspuatavać kinateatr, kancepcyju pierahledzieli.
Było vyrašana admovicca ad kafe i restarana, a zamiest ich arhanizavać dadatkovyja kinazały. Takim čynam, «Pieramoha» stanie multypleksam ź piaćciu załami, jakija zmohuć pryniać 284 čałaviek. Praces rekanstrukcyi płanujuć zaviaršyć da kanca hetaha hoda.
Jak paviedamlaŭ raniej ahienctvu Kochan, kinateatr zachavaje svajo histaryčnaje abličča. Vonkava jon praktyčna nie źmienicca, taksama zachavajucca aŭtentyčnyja elemienty (kałony, častka dekoru), jakija vyznačanyja Ministerstvam kultury.