«Bolš aniekdatyčnaha piersanaža ŭ hetaj vajnie prydumać nielha» — Padalak pra abvinavačańni Łukašenki ŭ padryvie Kachoŭskaj HES
Alaksandr Łukašenka abvinavaciŭ Ukrainu ŭ padryvie Kachoŭskaj HES, zajaviŭšy, što «na złodziei i šapka haryć». Čarhovy hałasłoŭny vypad u adras Kijeva prakamientavaŭ daradca kiraŭnika Ofisa prezidenta Ukrainy Michaił Padalak pa prośbie «Lusterka».
10.06.2023 / 16:18
Alaksandr Łukašenka. Skrynšot videa
— Ja, ščyra kažučy, užo stamiŭsia kamientavać aniekdoty ŭ vykanańni Łukašenki. Mnie zdajecca, što bolš aniekdatyčnaha piersanaža ŭ hetaj vajnie prydumać nielha. Jość, viadoma, Šajhu jašče. Ale hladzicie: Łukašenka zaŭsiody ručki składzie, siadzić taki nadźmuty miašočak i ŭvieś čas niešta raspaviadaje, jak byccam maje dostup da niejkaj infarmacyi, — skazaŭ Padalak.
Daradca kiraŭnika Ofisa prezidenta Ukrainy padkreśliŭ, što ŭ Łukašenki niama ni dostupu da aktualnaj infarmacyi, ni razumieńnia pracesaŭ, jakija adbyvajucca, i, jak śledstva, adsutničaje mahčymaść pravilnaha analizu.
— Absalutnaja nieaktualnaść taho, dzie jon znachodzicca i što jon robić. Heta značyć čałaviek pa-za časam, jaki dakładna niasie absalutna aniekdatyčnuju achinieju. Ja prašu prabačeńnia za takija farmuloŭki, bo [ŭsio] heta — niejmaviernaja łuchta, jakuju niasie hety čałaviek na praciahu 15,5 miesiaca.
Jon uvieś čas pavialičvaje abjom jurydyčnych pretenzij da siabie. Niesumnienna, hety čałaviek pavinien zrazumieć adnu reč: vajna skončycca nie [tak], jak u 14 hodzie, i ŭsie jaho razvahi pra toje, što na złodziei haryć šapka, jamu pryjdziecca ŭsio heta raspaviadać. Kali, viadoma, jon zmoža heta zrabić pa fizičnych i tych ci inšych paramietrach. Tamu što, nakolki ja razumieju, dla Rasii jon sapraŭdy hetak ža nie maje nijakaj kaštoŭnaści, jak i ludzi, jakija siońnia ŭdzielničajuć niepasredna ŭ vajnie, — zajaviŭ Michaił Padalak.
Alaksandr Łukašenka 8 červienia na sustrečy z sakratarami Rad biaśpieki dziaržaŭ — členaŭ ADKB vykazaŭsia nakont padryvu Kachoŭskaj HES.
— Vy, napeŭna, zdahadvajeciesia, chto padarvaŭ Kachoŭskuju HES? Kažuć, na złodziei i šapka haryć. Chto pieršym pra heta zakryčaŭ? Zrazumieła, što ŭkrainskamu boku treba było schavać try dni «kontrnastupu», dzie amal dźvie sotni broniemašyn było źniščana i bolš za dźvie tysiačy čałaviek zahinuli. Tamu — Kachoŭka, Kachoŭka, a pra toje (straty. — «NN») nichto nie kaža. A heta ž usio vidać, — zajaviŭ Łukašenka.
U noč na 6 červienia vybucham była źniščana Kachoŭskaja HES. Sotni miastečak akazalisia ŭ zonie zatapleńnia. Pačałasia evakuacyja žycharoŭ niebiaśpiečnych rajonaŭ.
Kijeŭ i Maskva vinavaciać adno adnaho. Bieły dom zajaviŭ, što RF adkaznaja za razbureńnie Kachoŭskaj HES, bo toje, što zdaryłasia, było b niemahčymym, kali b rasijskaja armija nie ŭvarvałasia va Ukrainu.
Čytajcie taksama:
ISW sprahnazavaŭ, jak padryŭ Kachoŭskaj HES paŭpłyvaje na ŭkrainski kontrnastup