Biełaruski pasoł u Rasii damoviŭsia z kiraŭnikom «DNR» ab supracoŭnictvie ŭ čatyroch śfierach. Ale supracoŭnictva ŭžo idzie poŭnym chodam
Biełaruś i «Danieckaja narodnaja respublika» buduć raźvivać supracoŭnictva ŭ sielskaj haspadarcy, mašynabudavańni, vuhalnaj halinie i pastaŭkach charčovaj pradukcyi, piša TASS.
16.06.2023 / 13:16
Adpaviednaje pahadnieńnie ŭ čaćvier padpisali na Pieciarburhskim mižnarodnym ekanamičnym forumie pasoł Biełarusi ŭ Rasii Dźmitryj Kruty i v. a. kiraŭnika «DNR» Dzianis Pušylin.
Dźmitry Kruty i Dzianis Pušylin. Fota: telehram-kanał Dzianisa Pušylina
«Siońnia było padpisana kamiunikie. U nas jość užo niejkaja darožnaja karta paśla sustrečy z Alaksandram Ryhoravičam [Łukašenkam] — my stvaryli šerah rabočych hrup, zaraz paśla jašče šeraha sustreč kiraŭnikoŭ roznaha ŭzroŭniu pačniecca pierachod u praktyčnuju płoskaść. Užo jość peŭny vynik: vybudavana liniejnaje ŭzajemadziejańnie pamiž pradpryjemstvami, pramyja suviazi. <…> Heta tyčycca i sielskaj haspadarki, i transpartnaj zabiaśpiečanaści», — raspavioŭ Pušylin u razmovie karespandentam TASS paśla padpisańnia pahadnieńnia.
Staršynia ŭrada «DNR» Jaŭhien Soncaŭ paćvierdziŭ, što pačynajučy z krasavika, kali adbyłasia sustreča Pušylina i Łukašenki ŭ Minsku, mnohija biełaruskija pradpryjemstvy ŭžo naładzili ŭzajemadziejańnie z kontrahientami ŭ «DNR»: u ich liku, naprykład, BiełAZ i biełaruskaja kampanija, jakaja raspačała pieravałku zbožža na ekspart praz port akupavanaha Maryupala.
Pa słovach Soncava, u ciapierašnim pahadnieńni ź Biełaruśsiu ŭžo prapisany šerah kankretnych prajektaŭ, u pryvatnaści, pastaŭki sielskahaspadarčaj i charčovaj pradukcyi, techniki i zapčastak, vuhalu. Ciaham miesiaca hetyja prajekty buduć detalizavanyja z vychadam na pašyranuju viersiju pahadnieńnia, jakuju padpišuć pradstaŭniki ŭradaŭ Biełarusi i hetaha akupavanaha rehijona Ukrainy.