Iłan Mask ustupaje ŭ hulniu sa štučnym intelektam. Jaho novaja kampanija pačynaje pracu nad stvareńniem ŠI
Iłan Mask abviaściŭ pra stvareńnie kampanii Ch.Al, jakaja zojmiecca pytańniami štučnaha intelektu z metaj «paznańnia realnaści», jak skazana ŭ paviedamleńni Maska. Kampanija była zarehistravanaja ŭ Nievadzie jašče ŭ krasaviku, ale aficyjna prystupiła da pracy tolki ciapier.
13.07.2023 / 14:42
Iłan Mask. Fota: Nathan Laine/Bloomberg via Getty Images
Ch.Al stanie trecim hulcom na rynku ŠI naroŭni z kampanijaj Open AI, jakaja stvaryła pieršy čat-bot ChatGPT, i Google, jakaja zapuściła ŭ sakaviku svoj anałah pad nazvaj Bard, jak piša Bi-bi-si.
U zajavie X.Al havorycca, što jaje meta — spaznać sapraŭdnuju pryrodu Suśvietu. Choć raniej Mask nazyvaŭ štučny intelekt ekzistencyjalnaj pahrozaj, a daśledavańni, što chutka prahresujuć u hetaj halinie, — niebiaśpiečnymi.
U sakaviku jon padpisaŭ adkryty list, u jakim mnohija važnyja fihury ŭ halinie technałohij zaklikali kaleh zrabić paŭzu ŭ raźvićci ŠI. Adnak užo ŭ krasaviku stała viadoma, što Mask zarehistravaŭ kampaniju x.AI Corp., nazva jakoj krasamoŭna pakazvaje na kirunak jaje dziejnaści.
Ekskluziŭnaja kamanda
Paviedamlajecca, što Ch.Al budzie kiravacca asobna i niezaležna ad inšych kampanij impieryi Maska, kudy ŭvachodziać Tesla, SpaceX, Twitter, Neuralink i Boring Co.
Na prezientavanym u sieradu sajcie Ch.Al havorycca, što asnovu kampanii składajuć 12 śpiecyjalistaŭ u halinie kampjutarnych raspracovak, uklučajučy ŠI, niekatoryja ź ich u minułym pracavali ŭ Google, Microsoft i roznych univiersitetach, u pryvatnaści va ŭniviersitecie Taronta.
Uznačaliŭ kamandu sam Iłan Mask, jaki ŭ minułym braŭ udzieł u stvareńni pieršaha čat-bota ChatGPT, ale ŭ 2018 hodzie pakinuŭ radu dyrektaraŭ Open AI i z tych časoŭ skieptyčna vykazvaŭsia z nahody raspracovak ŠI-technałohij.
Pra pamier inviestycyj u novy prajekt Maska pakul nie paviedamlajecca, ale možna mierkavać, što havorka idzie pra miljardy dalaraŭ. Dla paraŭnańnia: raspracoŭki Open AI abyšlisia inviestaram u 13 młrd dalaraŭ.
U krasaviku Financial Times paviedamlała sa spasyłkaj na svaje krynicy, što Mask vioŭ pieramovy ź inviestarami inšych svaich kampanij — Tesla i SpaceX — na pradmiet ich finansavaj padtrymki novaha prajekta, ale vyniki kansultacyj nieviadomyja.
Niepryhožy manieŭr?
Efiektnaje źjaŭleńnie Maska na rynku ŠI-technałohij pryciahnuła pavyšanuju ŭvahu kankurentaŭ i śpiecyjalistaŭ chajteku.
«Iłan — adzin z najvialikšych pradprymalnikaŭ našaha času», — skazaŭ Ryd Chofman, suzasnavalnik LinkedIn i startapu Inflection AI.
Pavodle jaho słoŭ, u Maska jość usie padstavy i mahčymaści zaniać svajo miesca ŭ halinie stvareńnia štučnaha intelektu.
Pry hetym jon krytyčna adhuknuŭsia pra sakavicki zaklik Maska da industryi ab uviadzieńni paŭhadavoha maratoryja na raspracoŭki.
«Ja kosa hladžu na manieŭr, pry jakim ty zaklikaješ usich spynicca na šeść miesiacaŭ, a sam u hety čas padvojvaješ ułasnyja namahańni», — skazaŭ Chofman.
Jon taksama skazaŭ, što halinie nieabchodna imknucca da inkluziŭnaści, u adkaz na kamientar žurnalistaŭ pra toje, što novaja kampanija Maska amal całkam składajecca z mužčyn.