«Kamień-bumieranh». Upieršyniu na našaj płaniecie byŭ znojdzieny mietearyt ziamnoha pachodžańnia
«Jon vylecieŭ ź Ziamli i viarnuŭsia nazad praź dziasiatki tysiač hadoŭ».
15.07.2023 / 17:54
Ilustracyjnaja vyjava: pixabay
Francuzskija navukoŭcy zmahli dakazać ziamnoje pachodžańnie adnaho ź mietearytaŭ, jaki byŭ znojdzieny jašče ŭ 2018 hodzie. Pra heta 14 lipienia napisała vydańnie Science Alert.
Pa infarmacyi daśledčykaŭ, 646-hramovy kaśmičny kamień pad nazvaj NWA-13188, znojdzieny ŭ Maroka, dziasiatki tysiač hadoŭ tamu byŭ vykinuty ź Ziamli i bolšuju častku času drejfavaŭ u kosmasie, pakul «niešta» nie viarnuła jaho nazad.
U mietearycie byli vyjaŭleny parody i minierały, jakija zvyčajna sustrakajucca pry vyviaržeńni vułkanaŭ kala miescaŭ sudakranańnia ziamnych akijaničnych plit.
«Heta pieršy viadomy nam mietearyt, jaki ździejśniŭ takoje dziŭnaje padarožža tudy i nazad praciahłaściu ŭ dziasiatki tysiač hadoŭ. Chimičny analiz abjekta pakazaŭ najaŭnaść mnostva ziamnych vułkaničnych minierałaŭ i parod, tamu my miarkujem, što jon byŭ zapuščany ŭ kosmas z pryčyny mahutnaha vyviaržeńnia z-za sutyknieńnia ź vialikim asteroidam. Ale my dakładna nie viedajem, jak jon znoŭ apynuŭsia doma», — paviedamiŭ Džerom Hatačeka, hieafizik z Nacyjanalnaha centra navukovych daśledavańniaŭ Francyi.
Adnak daloka nie ŭsia navukovaja supolnaść pahadziłasia z vysnovami francuzskich daśledčykaŭ. Na dumku niekatorych, padobnyja «niezvyčajnyja» hipotezy patrabujuć takich ža «niezvyčajnych» dokazaŭ, tamu niekatoryja navukoŭcy zastalisia nie pierakananyja.
Nahadajem, što raniej my pisali pra dziŭnuju ŭspyšku ŭ niebie, jakuju jašče ŭ krasaviku mahli nazirać mnohija biełarusy. Tady Mižnarodnaja mieteornaja arhanizacyja dała kančatkovaje tłumačeńnie hetaj źjavie.
Čytajcie taksama:
Vučonyja razhadali zahadku paŭdniovaha paŭšarja
Pahladzicie na piakielnuju «pryładu dezaryjentacyi», z dapamohaj jakoj rychtujuć astranaŭtaŭ NASA