Zaviaršajecca historyja Biełaruskaj patryjatyčnaj partyi
Ministerstva justycyi źviarnułasia ŭ Viarchoŭny sud z pazovam ab likvidacyi Biełaruskaj patryjatyčnaj partyi. Jon budzie razhledžany 24 lipienia. Adpaviednaja infarmacyja źjaviłasia ŭ raskładzie pasiadžeńniaŭ suda, piša Reform.by.
19.07.2023 / 22:52
Biełaruskaja patryjatyčnaja partyja była ŭtvoranaja ŭ dalokim 1996 hodzie, na samym pačatku kiravańnia Łukašenki, akurat u toj čas, jak jon zmahaŭsia ź Viarchoŭnym Savietam za kancentracyju ŭsioj ułady ŭ svaich rukach.
Jak i inšyja padobnyja arhanizacyi, sapraŭdnaj partyjaj BPP nikoli nie była i nie imknułasia joj być, funkcyja jaje była čysta butaforskaja. Navat kali ad partyi prachodzili niekudy deputaty, to heta zaŭsiody było ich faktyčnaje pryznačeńnie pa kvotach, a nie vynik realnaj papularnaści.
Spačatku staršynioj partyi byŭ adstaŭny hienierał Anatol Barankievič, a paśla jahonaj śmierci kiravać joj staŭ «kazacki ataman» Mikałaj Ułachovič, jaki staŭ viadomy tym, što hraŭ rolu adnaho sa sparynh-partnioraŭ Łukašenki na prezidenckich vybarach 2015 hoda.
Nijakaj niełajalnaści da ŭładaŭ ni Ułachovič, ni jahonaja partyja nie prajaŭlali: vidać, BPP prosta nie ŭpisałasia ŭ kolkasnuju kvotu, vyznačanuju dla kišennych partyj źvierchu.
Na hety momant viadoma, što Miniust pa vynikach pierarehistracyi źbirajecca likvidavać Biełaruskuju partyju «Zialonyja» i Kansiervatyŭna-chryścijanskuju partyju BNF. Abjadnanaj hramadzianskaj partyi było prapanavana samalikvidavacca. Taksama admovu ŭ pierarehistracyi atrymała Biełaruskaja sacyjalna-demakratyčnaja partyja (Hramada).
Viasnoj Miniust zarehistravaŭ Biełaruskuju partyju «Biełaja Ruś», a taksama pierarehistravaŭ Kamunistyčnuju partyju Biełarusi, Respublikanskuju partyju pracy i spraviadlivaści, Libieralna-demakratyčnuju partyju Biełarusi.
Akramia taho, jašče nie vyznačany dalejšy los zarehistravanych Biełaruskaj partyi levych «Spraviadlivy śviet», Biełaruskaj ahrarnaj partyi, Biełaruskaj sacyjał-demakratyčnaj hramady, Sacyjał-demakratyčnaj partyi narodnaj zhody, Partyi BNF, Biełaruskaj sacyjalna-spartyŭnaj partyi i Respublikanskaj partyi.
Čytajcie taksama: