U Biełarusi stvarajuć miedyjny futbolny kłub
Z kanca 2010-ch u Rasii nabiraje moc miedyjafutboł. Hulcy, jakija ŭžo nie imknucca da trafiejaŭ vialikaha futboła, abjadnoŭvajucca ŭ kamandy z błohierami i miedyjnymi zorkami, źbirajuć stadyjony i miljony prahladaŭ u sacsietkach. Zaraz u rasijskim miedyjafutbole moža źjavicca biełaruskaja kamanda — praŭda, jašče pytańnie, kolki biełaruskaha ŭ joj budzie.
23.07.2023 / 14:03
Alaksandr Hleb
Pra toje, što biełaruski kłub moža zajavicca ŭ rasijskuju Miedyjalihu, upieršyniu zahavaryli ŭviesnu. Kamandu nazvali DMedia, i, kali zbuducca płany jaje stvaralnikaŭ, kłub vystupić u novym siezonie turniru, jaki płanujecca ŭžo ŭ siaredzinie žniŭnia. Inicyjataram prajekta nazyvajuć Płatona Dźmitryjeva — byłoha mieniedžara BATE (vy mahli jaho bačyć u rolikach u kłubnym jutub-kanale).
Biełaruskija tvary ŭ Miedyjalizie — heta nie navina. Tam hulaje kamanda GOATS, i vosieńniu 2022-ha za jaje zajavilisia try biełarusy: Ihar Šytaŭ, Vital Bułyha i Viačasłaŭ Hleb (brat Alaksandra Hleba). Tam ža vystupaŭ Ihar Stasievič, niekali kapitan biełaruskaj zbornaj i BATE.
Hetym razam da miedyjafutboła moža dałučycca bolš viadomy z bratoŭ Hlebaŭ — Alaksandr, adzin z najiarčejšych biełaruskich futbalistaŭ apošnich dziesiacihodździaŭ, byłaja zorka łondanskaha «Arsienała» i pieramožca Lihi čempijonaŭ u składzie «Barsiełony». U adpaviednym kamientary Hleb nie abvierh takoj mahčymaści: «Kali ŭsio budzie dobra, zorki supaduć, to ŭsio budzie dobra».
Praŭda, prezident Miedyjalihi Mikałaj Osipaŭ kaža, što Hleb vystupić u kłubie «Minsk», a DMedia, nakolki viadoma, nie źbirajecca źmianiać nazvu. Što heta za błytanina? Chajp na zorcy z boku arhanizataraŭ?
Užo dakładna ŭ DMedia (kali kamanda vyjdzie na pole) budzie Stanisłaŭ Drahun, jašče adzin topavy futbolny biełarus. Eks-zorka BATE i były kapitan naczbornaj, Drahun trapiŭ u sumnaviadomy čorny śpis futbalistaŭ, jakim za hramadzianskuju pazicyju paśla žniŭnia-2020 zakryli šlach u nacyjanalny čempijanat. Niejki čas Drahun žyŭ biez futboła, a kali stała jasna, što jamu tak i nie daduć praciahnuć vystupy za ŭžo rodny BATE, skončyŭ karjeru.
Paru tydniaŭ tamu Drahun niepryjemna ździviŭ svaich zaŭziataraŭ pres-kanfierencyjaj, jakaja nahadvała sumnaviadomyja videa zatrymanych siłavikami ludziej. Adznačym tolki adzin ź jaho tezisaŭ: «Kožny pavinien zajmacca svajoj spravaj, spartoŭcy — sportam, a palityki — palitykaj. Ja palez nie tudy, kudy treba».
U toj ža dzień, kali vyjšli ŭ śviet praŭładnyja vykazvańni Drahuna, DMedia vypuściła rolik ź im. U roliku futbalist abviaściŭ, što dałučajecca da pieršaj biełaruskaj miedyjnaj kamandy.
Paśla Hleba i Drahuna pryjšoŭ čas ułasna miedyjščykaŭ. Na hetuju rolu ŭ kłubie dla pačatku vybrali Arkadzia Łohvina, błohiera i viadučaha mierapryjemstvaŭ, jaki rodam z Babrujska. Łohvin viadzie jutub-kanał «Pjanaje Zyba», dzie na siońnia krychu bolš za 1400 padpisčykaŭ. Tam jon vykładvaje videa z tusovačnych łakacyj (havorka zbolšaha pra minskuju Zybickuju), dzie zadaje sustrečnym pytańni nakštałt «Ci byŭ u vas seks utraich?».
Nastupny miedyjščyk u komandie — heta Badabumčyk (Uład Muzaloŭ), topavy biełaruski tyktokier z 2,4 miljona padpisčykaŭ. Pra što jon robić kantent? Voś, naprykład, videa Badabumčyka, jakoje za dva miesiacy nabrała 7,3 miljona prahladaŭ.
Raniej Muzaloŭ užo sprabavaŭ vyjści za miežy dvarovaha futboła. U červieni 2022-ha jon trapiŭ na prahlad da kłuba «Maksłajn» — ambicyjnaha prajekta z Rahačova, jaki ciapier mieścicca ŭ Viciebsku i hulaje ŭ pieršaj lizie. U składzie na hety siezon Badabumčyka niama, ale ž čas na toje, kab zavitać na stadyjon da «Maksłajna», jon znachodzić.
Taksama ŭ DMedia źbirajecca Raze (Andrej Biełavusaŭ), uładalnik akaŭnta ŭ tyktoku na dva miljony padpisčykaŭ. Biełavusavu sport taksama nie čužy, jon zajmaŭsia im amal što prafiesijna. Ale havorka išła nie pra futboł, a pra chakiej na travie, dzie Rejz navat uvachodziŭ u skład moładzievaj zbornaj, ale skončyŭ karjeru praz prablemy z sercam.
Biełavusaŭ zdymaje videa pra žyćciovyja situacyi i «antypikap» — naŭmysna niaŭdałyja sproby flirtu, a taksama abyhryvaje roznyja internet-trendy. Vy mahli čuć pra jaho brata Uładzisłava Biełavusava, hulca zbornaj pa chakiei na travie i taksama papularnaha ŭ svoj čas tyktokiera. Na akaŭnt Uładzisłava padpisanyja 2,3 miljona čałaviek.
U kastryčniku 2022-ha abodvuch bratoŭ zatrymali — Uładzisłaŭ trapiŭ za kraty 4 kastryčnika, a Andrej — 12-ha. U pakajannym videa Uładzisłaŭ staić na kaleniach z tvaram, utknutym u dyvanovaje pakryćcio, rolik vykłali prosta ŭ tyktok chłopca. 20 kastryčnika braty vyjšli na volu.
Što da treniera DMedia, to pierš za ŭsio na hetuju pasadu chacieli ŭziać Ihara Kryvušenku, byłoha koŭča biełaruskaj nacyjanałki. Hety varyjant adkinuli: Kryvušenka nibyta nie pasavaŭ da Miedyjalihi. Imia treniera, jaki ŭznačalić DMedia, pakul nie raskryvajuć, ale pa apisańni jon «jarki, emacyjny, impulsiŭny» — toje, što treba dla lihi, zatočanaj pad miedyjnaść i prahlady ŭ siecivie.
U pošukach takoha koŭča stvaralniki DMedia razhladali varyjant Vitala Žukoŭskaha — byłoha treniera «Isłačy» i BATE, jaki ciapier pracuje ŭ kazachstanskim «Atyrau». Žukoŭski ŭmieje ładzić jarkija pres-kanfierencyi, i jaho duža chacieli bačyć u miedyjakłubie, ale ž pakul trenier zaniaty.
Kali DMedia ŭsio ž taki zdoleje zajavicca ŭ Miedyjalihu, biełarusaŭ, mahčyma, čakaje kubkavaje spabornictva z chatnimi i vyjaznymi hulniami. Dakładny farmat lihi pakul što nieviadomy. Ale možna peŭna skazać, što, kali biełaruskaja kamanda budzie brać u joj udzieł, miescy na chatnim stadyjonie pustavać nie buduć.
Reč u tym, što miedyjafutboł užo nieadnojčy pryjazdžaŭ u Minsk i zaŭždy z pośpiecham. U 2019-m miedyjakłub «Amkał» zhulaŭ na stadyjonie FK «Minsk» sa zbornaj zaŭziataraŭ minskaha «Dynama» i sarvaŭ niebyvały anšłah — rehistracyja na matč skončyłasia niedzie za 15 chvilin paśla adkryćcia.
U sakaviku hetaha hoda «Amkał» znoŭ pryjechaŭ u Minsk, hetym razam na stadyjon «Dynama-Juni», i zhulaŭ z dynamaŭskimi vieteranami. Trybuny znoŭ byli poŭnyja. Miedyjafutboł našmat lepš umieje pryciahvać hledačoŭ, čym biełaruskaja vyšejšaja liha, daść jon rady i hetym razam.
Kazły, rep i narkaman: jak zorki biełaruskaha futboła hulajuć u amatarskaj kamandzie ŭ Rasii
Ad Šviejcaryi da Novaj Ziełandyi. Piać krutych futbalistak z žanočaha čempijanatu śvietu
Ścipły hienij ź ispanskaj vioski. Chto taki Karłas Alkaras — małady pieramožca Uimbłdana