Hrodziency ad śvitanku vystrojvajucca ŭ čerhi, kab nabyć novyja kvatery ad dziaržzabudoŭščyka. U čym pryčyna?
Žychary Hrodna nazirajuć cikavuju karcinu: pierad pačatkam pracoŭnaha dnia, pierad dźviaryma pradpryjemstva «Hrodnažyłbud» źbirajucca čerhi ź dziasiatkaŭ hramadzian.
17.08.2023 / 08:24
Ilustracyjny zdymak. Fota: «Naša Niva»
Plusy ad rostu kursaŭ valut
Cikavaść da kupli hatovych kvater ad zabudoŭščyka pavysiłasia bližej da siaredziny žniŭnia. Akurat u hety čas nazirałasia zaŭvažnaje asłableńnia kursa biełaruskaha rubla adnosna dalara i jeŭra. Pakul kursy valut stavili hadavy rekord, ludzi, jakija trymali źbieražeńni ŭ dalarach abo jeŭra, śpiašalisia zaniać čarhu, kab nabyć «patańniełyja» kvatery. I reč tut nie ŭ niejkich źnižkach ad zabudoŭščyka.
U valutnym vymiareńni cana na hatovyja kvatery ŭ novabudoŭlach źnižajecca paralelna z rostam kursaŭ. Tolki z 1 pa 15 žniŭnia biełaruski rubiel abiasceniŭsia adnosna dalara na 7% — z 3,0344 da 3,2651 rubla za dalar ZŠA pa kursie NBRB. Roŭna nastolki źnizilisia i ceny na kvatery (kali hladzieć u valucie).
Ekanomija ŭ tysiačy dalaraŭ
Naprykład, trochpakajovaja kvatera na 79 m² u 18-paviarchovym domie pa vulicy Staramałyščynskaj kaštuje 126 400 rubloŭ (pa 1600 rubloŭ za mietr). Pa stanie na 1 žniŭnia heta było kala $41 655. A ŭsiaho praz 15 dzion — užo $38 712.
Fota: skrynšot z sajta ghb.by
Usiaho za pałovu miesiaca kvatera «patańnieła» amal na 3 tysiačy dalaraŭ.
Adznačym, što ahučanyja ceny aktualnyja tolki pry apłacie ŭsioj sumy na praciahu 60 kalandarnych dzion ad momantu zaklučeńnia damovy.
U vypadku z kvaterami ŭ domie pa vulicy Voinaŭ-Internacyjanalistaŭ roźnica jašče bolš zaŭvažnaja, bo tam «kvadrat» kaštuje 1950 rubloŭ. U domie zastalisia volnyja tolki 3-, 4– i 5-pakajovyja kvatery. Samaja małaja ź ich maje płošču 80 m². Heta 156 tysiač rubloŭ, što na pačatku miesiaca raŭniałasia 51 410 dalaram. Praz 15 dzion takaja kvatera kaštavała ŭžo $47 778. Jak vynik — minus 3632 dalary za dva tydni.
Fota: skrynšot z sajta ghb.by
U adroźnieńni ad kvater u novabudoŭlach, rynak druhasnaj nieruchomaści nie praduhledžvaje takich «padarunkaŭ», bo, jak praviła, usie ceny na nieruchomaść u Biełarusi zafiksavanyja ŭ dalarach ZŠA. I navat kali ceny na druhasnym rynku i źnižajucca, to nie tak istotna. Na prykładzie Hrodna možna ŭbačyć, što za kvartał źnižeńnie siaredniaj cany na kvatery pa danych realnych ździełak skłała ŭsiaho 1,7% suprać minus 7,7% za dva tydni ŭ vypadku z kvaterami ŭ novabudoŭlach.
Fota: skrynšot z sajta realt.by
Padobny ažyjataž i čerhi nazirajucca nie ŭpieršyniu, jak i sam fakt abiasceńvańnia biełaruskaj valuty.
Heta źviazana z tym, što biełarusy tradycyjna ŭ bolšaści svajoj zachoŭvajuć źbieražeńni ŭ valucie. Aproč heta siarod inšych važnych faktaraŭ možna vyłučyć toje, što šmat hrodziencaŭ pracujuć u Jeŭropie. U pryvatnaści, kiroŭcami fur. Zarpłaty ŭ ich vysokija i vypłačvajucca ŭ jeŭra. Tamu mnohija śpiašajucca skarystacca «dyskontam» ad Nacbanka.
Napłyŭ turystaŭ — kvatery ŭ centry Hrodna zdajuć i pa 100 dalaraŭ za sutki. «Z takimi cenami kvateru možna adbić za niekalki hadoŭ»