Švedar pryncesy Dyjany z čornaj aviečkaj pradali za miljon dalaraŭ
Arhanizatary aŭkcyjonu pieršapačatkova acanili histaryčny švedar u 50-80 tysiač dalaraŭ.
15.09.2023 / 08:06
Fota: Alexi Rosenfeld / Getty Images
Švedar pamierłaj pryncesy Dyjany z adnoj čornaj aviečkaj siarod mnostva biełych pradali na aŭkcyjonie Sotheby's u Ńju-Jorku za 1,14 młn dalaraŭ, piša Bi-bi-si.
Arhanizatary aŭkcyjonu pieršapačatkova acanili histaryčny švedar u 50-80 tysiač dalaraŭ. Zavočnyja tarhi za švedar byli adkryty jašče 31 žniŭnia, i da samych apošnich chvilin aŭkcyjonu samaj vialikaj była prapanova ŭ 200 tysiač dalaraŭ.
Ale ŭ vyniku samy ščodry apošni pakupnik — Sotheby's nie raskryvaje jaho asoby — prapanavaŭ sumu ŭ piać z pałovaj razoŭ bolšuju.
Hety čyrvony švedar z šerahami biełych aviečak i adnoj čornaj siarod ich Dyjana Śpiensier — tady jašče nie pryncesa, a tolki niaviesta prynca Čarlza — apranała ŭ 1981 hodzie.
Sioleta, u sakaviku, jak piša Sotheby's, jaho znajšli na haryščy i vyrašyli pradać. U vyniku jon prynios bolš hrošaj, čym lubaja z rečaŭ Dyjany, što vystaŭlalisia na aŭkcyjon.
Jaje aŭtamabil Ford Escort letaś byŭ pradadzieny za 806 tys. dalaraŭ.
Jaje «kryž Atały» z amietystami i dyjamientami ŭ pačatku hetaha hoda kupiła Kim Kardašjan za 203 tysiač dalaraŭ.
Prychilniki Dyjany, uspaminajučy hety švedar, časta kazali, što jana nasiła hetuju čornuju aviečku siarod biełych jak simvał jaje stanovišča ŭ karaleŭskaj siamji. Ale historyki mody miarkujuć, što heta ramantyčnaje pierabolšańnie: jana vyjšła ŭ im u śviet za miesiac da viasiella z pryncam Čarlzam.
U tuju epochu, kali jašče nie było ni sacsietak, ni navat internetu, fatahrafii Dyjany ŭ hetym švedry ŭ hazietach zrabili fantastyčnuju rekłamu firmy Warm and Wonderful («ciopła i cudoŭna»), jakaja prydumała hety dyzajn.
Nieŭzabavie paśla viasiella Bukinhiemski pałac napisaŭ u Warm and Wonderful, što švedar pradziraviŭsia, i jaho dobra b zamianić. Firma dasłała novy taki ž, i Dyjana nadziavała jaho ŭ 1983 hodzie.
Sotheby's prykłali da łota hety list Bukinhiemskaha pałaca, a taksama piśmovuju padziaku za zamienu. Dziračka ž na švedry pasłužyła dokazam taho, što jon — toj samy, pieršy.
Čytajcie taksama:
Źnikłuju bas-hitaru Poła Mak-Kartni buduć šukać pa ŭsim śviecie. Jana źnikła ŭ 1969 hodzie
Na aŭkcyjonie možna nabyć karcinu Jazepa Drazdoviča. Ale cana kusajecca