U Radzie biaśpieki patłumačyli, čamu ich nie pałochajuć vučeńni Armienii i NATA, i prapanavali Polščy pravieści takija ž ź Biełaruśsiu
Pieršy namieśnik dziaržsakratara Rady biaśpieki Pavieł Muraviejka na STB patłumačyŭ, čamu vojski ADKB nie suprać sumiesnych vajskovych vučeńniaŭ z krainami NATA.
18.09.2023 / 08:51
Z 20 da 26 vieraśnia projduć maštabnyja vajskovyja vučeńni. Fota: Minabarony
Muraviejka raspavioŭ, što jon spakojna adnosicca da taho, što armianskija vajskoŭcy nie ŭdzielničali ŭ vučeńniach ADKB.
Pavodle Muraviejki, vidać, dla hetaha byli niejkija peŭnyja pryčyny. «Heta, skažam tak, nie krytyčna», — havoryć jon.
Vučeńni Armienii z NATA, pavodle jaho, «byli namiečany abo ŭźnikli nie ŭčora». «Nie z buchty-barachty. Jany byli spłanavany zahadzia, musić, hady dva tamu abo sama mieniej paŭtara. I prosta armianskija kalehi vykonvajuć uziatyja na siabie zabaviazańni, uličvajučy, što sapraŭdy takoje vučeńnie było spłanavana. My ŭ arhanizacyi spakojna hladzim na hetyja rečy.
Jak maha lepš vyvučyć supiernika — tolki dzieści ź im datknuŭšysia. Tamu armianam heta vypała, skažam tak, sioleta», — skazaŭ jon.
Z hetaje pryčyny jon nie suprać vučeńniaŭ z Polščaj.
«Ci možam my pravieści vučeńni z Polščaj? Kali palaki hatovy z nami pravieści vučeńni, my z zadavalnieńniem vystupim z takoj inicyjatyvaj i razhledzim, jakija pytańni my možam adpracavać sumiesna. Chacia jany, u pryncypie, lažać na pavierchni. Heta i pytańni supraćpavietranaj abarony ŭ ramkach achovy našaj sumiesnaj miažy, i pytańni pamiežnaj biaśpieki, jakija možna adpracavać. Heta i ŭ tym liku transhraničnyja pahrozy, źviazanyja ź bijałahičnaj i niejkimi nadzvyčajnymi situacyjami, uličvajučy, što reki ciakuć nie tolki pa terytoryi Respubliki Biełaruś, ale ŭ nas jość sumiesnyja vodnyja rubiažy, dzie takija pytańni možna adpracoŭvać. Tamu budzie prapanova — zjavicca i naša reakcyja ŭ adkaz, i našy dziejańni», — skazaŭ jon.
Pavodle Muraviejki, U Biełarusi z 20 da 26 vieraśnia projduć maštabnyja vajskovyja vučeńni. «U ich biaruć udzieł, jak praviła, usie elemienty vajskovaj arhanizacyi dziaržavy, pryciahvajecca terytaryjalnaja abarona. Na apošnija vučeńni budzie pryciahvacca ŭ tym liku i narodnaje apałčeńnie», — paviedamiŭ Muraviejka.
Dzie mienavita projduć vučeńni — jon nie ŭdakładniŭ.
Čytajcie taksama:
«Heta vielmi ŭraźlivaja madel». Pašynian zajaviŭ, što Armienija bolš nie moža spadziavacca na Rasiju