Аўчарку Байдэна выселілі з Белага дома. Яна адзінаццаць разоў укусіла агентаў Сакрэтнай службы
Наогул 46-му прэзідэнту ЗША не шанцуе на сабак. Папярэдні сабака таксама кусаў агентаў.
05.10.2023 / 15:19
Байдэна Камандэр не кусаў. Фота: Adam Schultz / AP
Нямецкую аўчарку Джо Байдэна па мянушцы Камандэр выселілі з тэрыторыі Белага дома з-за яе агрэсіўных паводзін і шматлікіх выпадкаў нападаў на людзей, паведамляе tvrain.tv.
«Прэзідэнт і першая лэдзі глыбока клапоцяцца пра бяспеку тых, хто працуе ў Белым доме, і тых, хто абараняе іх кожны дзень. Яны па-ранейшаму ўдзячныя за цярпенне і падтрымку Сакрэтнай службе ЗША і ўсім зацікаўленым асобам, якія працягваюць працаваць над развязаннем праблемы», — патлумачыла дырэктар па камунікацыях першай лэдзі ЗША Джыл Байдэн Элізабэт Александэр.
У мінулым месяцы Камандэр пакусаў агента Сакрэтнай службы на тэрыторыі Белага дома. Пры гэтым Александэр удакладніла, што сабака «проста гуляў» і ўкус не пакінуў слядоў.
Гэта ўжо адзінаццаты выпадак нападу сабакі на супрацоўнікаў Белага дома і Сакрэтнай службы — ён кусаў людзей з кастрычніка 2022 года. CNN таксама паведамляе, што былі і іншыя выпадкі ўкусаў, пра якія публічна не паведамлялася.
Ва ўнутранай перапісцы Сакрэтнай службы, пра якую пісала газета New York Post, гаварылася, што 3 лістапада 2022 года аднаго з супрацоўнікаў шпіталізавалі з укусамі ў сцягно і руку пасля нападу аўчаркі.
Папярэдні сабака Байдэнаў, Мэйджэр, таксама быў агрэсіўны. Яго выселілі з Белага дома і адправілі да сяброў сям'і.