Usio narmalna, mama? Piać faktaŭ pra Łarysu Hrybalovu
Siońnia pravaabaroncy paviedamlali pra zatrymańnie Łarysy Hrybalovaj. Paźniej uviečary artystka napisała, što ciapier doma i ŭ paradku. Hrybalova — adna z samych jarkich biełaruskich śpiavačak i viadučych. Zhadvajem, jak jana takoj stała i čym zajmajecca pa-za scenaj.
01.11.2023 / 21:58
Fota: instahram Łarysy Hrybalovaj
Finbierh paklikaŭ na pracu ŭ Minsk, a baćki nie vieryli
Naradziłasia Łarysa ŭ siamji vajskoŭca i buchhałtarki. Jana ź dziacinstva zajmałasia tvorčaściu, chadziła śpiavać u roznyja hurtki. Ale nastaŭniki joj nie davali saliravać.
Mabyć, tamu dziaŭčyna pajšła atrymlivać «ziamnuju prafiesiju» — jana vučyłasia na nastaŭnicu pačatkovych kłasaŭ u Viciebskim piedahahičnym instytucie. Ale jašče studentkaj dała dva solnyja kancerty ŭ Błahavieščansku i Viciebsku.
Maci Łarysy nie padtrymlivała chobi dački. Navat kali ŭ 1994 hodzie Łarysa pieramahła ŭ konkursie maładych vykanaŭcaŭ fiestyvalu biełaruskaj pieśni i paezii «Maładziečna-94» i ad Michaiła Finbierha atrymała zaprašeńnie pierajechać u stalicu pracavać u Nacyjanalnym kancertnym arkiestry Respubliki Biełaruś, to pačuła tolki: «Praz hod vierniešsia. Ničoha ŭ ciabie nie atrymajecca!».
Potym sama Łarysa ŭ intervju kazała: «Prosta ŭ mianie była mara i dzikaje žadańnie jaje ažyćciavić…»
Była zorkaj TB: «Usio narmalna, mama!» i «U łožku z Łarysaj Hrybalovaj»
U 1994 hodzie pačałasia i televizijnaja karjera Hrybalovaj. Na proby jaje zaprasiŭ viadomy televiadučy i pradziusar Jahor Chrustaloŭ — u vyniku maładaja artystka stała niaźmiennaj viadučaj papularnaj štotydniovaj zabaŭlalnaj prahramy «Usio narmalna, mama!» na biełaruskim telebačańni.
Charyzma Łarysy vyłučała jaje siarod dziasiatkaŭ inšych viadučych. Jana ŭmieła ŭlublać u siabie hledačoŭ.
U pačatku nulavych Hrybalova była zorkaj prahram «U łožku z Łarysaj Hrybalovaj» (8 kanał) i «Dobraj ranicy, Biełaruś!» (BT). A jašče jana razam ź Juryjem Nikałajevym viała prahramu «Ranišniaja pošta» na telekanale RTR-Biełaruś.
Zapisała niekalki chitoŭ
U 2009 hodzie Hrybalova abjaviła ab tym, što bolš nie pracuje ŭ kalektyvie Finbierha i pačynaje solnuju karjeru. U tym ža hodzie śpiavačka zapisała pieśniu «Vsie budiet chorošo», jakuju dla jaje napisała śpiavačka Bjanka.
Fota: instahram Łarysy Hrybalovaj
U 2013 hodzie ŭ Łarysy Hrybalovaj vyjšaŭ albom pad nazvaj «Nie kryŭdzi mianie». U albom uvajšło trynaccać piesień, u tym liku znakamityja «Do zavtra», «Nauhad», «Hadzinički», «S toboj».
Sama Łarysa ŭ 2019 hodzie žartavała, što, choć jana i robić novyja pieśni, jaje zvyčajna prosiać śpiavać chity minułaha.
Źbirała hrošy dla ciažkachvorych dziaciej
Značnaje miesca ŭ žyćci Łarysy zajmaje dabračynnaść. Kala piaci hadoŭ praisnavaŭ jaje prajekt «Załatoje serca», u ramkach jakoha źbirali hrošy dla ciažkachvorych dziaciej. Navat paśla taho, jak prajekt skončyŭsia, Łarysa nie zastavałasia abyjakavaj da čužoj biady: jana časta publikavała ŭ svaich sacyjalnych sietkach infarmacyju ab zborach na lačeńnie dziaciej. Śpiavačka taksama ładziła dabračynnyja kancerty dla dziaciej ź dziciačych damoŭ.
U 2019-m Hrybalova zaniałasia padtrymkaj junych vakalistaŭ z rehijonaŭ — tady ŭ Homieli prajšoŭ pieršy kancert jaje prajekta «Zornaja kraina».
«Ja jak artystka abjeździła ŭsiu Biełaruś z solnymi kancertami, i pierad čarhovym siezonam my abdumali takuju ideju: zaraz našym dzieciam dy i maładym vykanaŭcam vielmi nie chapaje placovak, dzie možna pakazvać svaje talenty, — kazała ŭ adnym ź intervju Łarysa.
— Niejak pierastali rabić muzyčnyja prajekty na telebačańni — para pieradač na kanał, «Navahodni ahieńčyk» dy «Pieśnia hoda». I mnie padumałasia: čamu nie dać dzieciam mahčymaść vystupić sa mnoj na adnoj scenie? Za 25 hadoŭ majoj tvorčaści nazapasiłasia mnostva piesień, materyjału, jaki jany mahli b pasprabavać praśpiavać. Talenavityja dzieci i kalektyvy jość u kožnym horadzie!»
Vychoŭvaje traich dziaciej
Niahledziačy na toje, što naradzić pieršynca Łarysa navažyłasia tolki ŭ tryccać hadoŭ, jana stała šmatdzietnaj mamaj — u jaje troje dziaciej, małodšaj dačce siem hadoŭ (ciažka pavieryć, što samoj artystcy 50).
Łarysa sa starejšymi dziećmi. Skrynšot ź instahrama Łarysy Hrybalovaj
Kab pakazać žančynam, što dzieci nie zaminajuć karjery, artystka niekalki hadoŭ zapar pravodziła konkurs «Supier mama». Udzieł u im prymali šmatdzietnyja maci, jakija pabudavali paśpiachovuju karjeru.
«Raniej u Biełarusi tradycyjna byli vialikija siemji. Siońnia žančyny nie navažvajucca i na adnaho, ličačy, što dzicia pieraškadžaje rabić karjeru, zarablać hrošy. Da taho ž šmatdzietnyja siemji ŭ hramadstvie niaredka pradstaŭlajuć jak prablemnyja.
Tamu my vyrašyli pakazać šmatdzietnych mam − paśpiachovych, aktyŭnych, pryhožych, — cytavali Hrybalovu «Minsk-Naviny». — Majučy traich i bolš dziaciej, jany ŭsio paśpiavajuć. Dzieci, naadvarot, natchniajuć. My, viadoma, nie pierakanajem tych, chto maje pryncypova inšuju pazicyju, ale niekatorych žančyn padtrymajem, raźviejem ich sumnievy, kab jany nie bajalisia naradžać dziaciej».
Maje ivent-ahienctva
Łarysa Hrybalova dasiahnuła pośpiechaŭ nie tolki na scenie — jana taksama maje vialiki dośvied u biznesie. Jašče ŭ 2004 hodzie žančyna zasnavała adno ź pieršych ivent-ahienctvaŭ u Biełarusi. Spačatku jano nazyvałasia «Śviatočnaje Biuro Łarysy Hrybalovaj», a paśla reniejminhu — Gribaleva Event Management.
Fota: instahram Łarysy Hrybalovaj
U adnym ź intervju Łarysa ščyra kazała: kali b jana abrała tolki adnu śfieru — mastactva, maciarynstva ci biznes, — to dasiahnuła b bolšych pośpiechaŭ.
«Tym nie mienš, tak užo skłałasia majo žyćcio, što mnie ŭsio ŭ im padabajecca. Prosta starajusia da kanca, da pieramohi davieści lubuju raspačatuju spravu, maksimalna sumlenna i dobrasumlenna vykonvać luby sa svaich abaviazkaŭ».
Čytajcie taksama:
Łarysa Hrybalova paviedamiła, što jana doma. HUBAZiK źmianiŭ svoj dopis