«Uładzimir Uładzimiravič, vielizarnaja prośba: prašu pryzvać mianie na SVA». Tyktok-vajar z Dobruša prosicca na front
Žychar Dobruša Uładzimir Siemiancoŭ — adzin z tych, chto ŭ sacsietkach aktyŭna padtrymlivaje rasijskuju vajennuju ahresiju suprać Ukrainy i prapahanduje PVK «Vahnier». Mužčyna piša pra siabie, što choć jon «iz Biełoruśsii, no dušoj — russkij» i śćviardžaje, što «zaŭsiody budzie z ruskimi bok pry boku». Sajt «Fłahštok» vyvučyŭ staronki rehijanalnaha prychilnika «ruskaha śvietu» i skłaŭ jahony partret.
22.11.2023 / 22:44
Uładzimir Siemiancoŭ (sprava). Fota: jaho staronka ŭ sacsietcy
U svaim profili ŭ sacsietcy «VKontaktie» mužčyna paznačyŭ, što jon supracoŭnik Dobrušskaha farforavaha zavoda, ale, miarkujučy pa raźmieščanaj na staroncy infarmacyi, pracuje zvarščykam i zajmajecca kavańniem mietaličnych vyrabaŭ. Jamu 30 hadoŭ, maje žonku i dzicia.
U «VK» žychar Dobruša vykładvaje, u asnoŭnym, svaje fota z aholenym torsam i spravazdačy ź piknikoŭ dy zastollaŭ, a taksama pajezdak u Rasiju.
Zusim u inšym vobrazie Siemiancoŭ paŭstaje na svaich staronkach u tyktoku: tut jon raz-poraz publikuje videa sa ściaham PVK «Vahnier», jaki, miarkujučy pa ŭsim, visić u majsterni, dzie mužčyna zajmajecca kavańniem.
Siemiancoŭ ličyć siabie śpievakom, paziruje na videa ŭ kamuflažy, bałakłavie i z dubinaj pad pieśniu sa słovami «My odna strana, my jediny, my niepobiedimy, my — Rośsija, my — siła».
Uładzimir Siemiancoŭ. Fota: jahonyja staronki ŭ sacsietcy
U podpisach da videa Siemiancoŭ nazyvaje bajevikoŭ PVK «Vahnier» svaimi «kumirami», vykazvaje žadańnie adpravicca na vajnu suprać Ukrainy, źviartajecca da Pucina:
«Uładzimir Uładzimiravič, vielizarnaja prośba: prašu pryzvać mianie na SVA (…) Jość žadańnie smažyć parasiat».
U kamientarach žychara Dobruša niaredka trolać:
«Tyktok-vajar, pi*j u vajenkamat, biez Pucina biaruć z radaściu»;
«Słava dvuchsotym!»;
«Kali na front, Vavan?»
Uładzimir Siemiancoŭ. Skrynšot jaho staronki ŭ tyktoku
Choć niekatoryja videa Siemiancova nabirajuć dziasiatki tysiač prahladaŭ, u asnoŭnym jahonyja roliki nie majuć papularnaści.
Čytajcie taksama: