«Paznajomiła dziaciej sa śvietam armiejskaha sportu». Dzie ciapier lehiendarnaja viaślarka Kaciaryna Karsten
Šmathadovaja ikona biełaruskaha sportu, pieršaja dvuchrazovaja alimpijskaja čempijonka niezaležnaj Biełarusi, šaścikratnaja čempijonka śvietu — usio heta pra Kaciarynu Karsten. Čym ciapier žyvie słavutaja viaślarka?
14.12.2023 / 10:51
Fota: Naomi Baker / Getty Images
Uradženka vioski Asiečana Krupskaha rajona na Minščynie, Kaciaryna (tady jašče Chadatovič) pačała brać miedali jašče pry SSSR. U 1990-m Kacia stała čempijonkaj śvietu siarod junijorak, a ŭ 1991-m uziała pieršy miedal na darosłym čempijanacie śvietu — bronzu ŭ dvojcy.
Viaślarka ŭdzielničała ŭ siami Alimpijadach (z 1992 pa 2016 hady) i pryviezła adtul dva zołaty, adno srebra i dźvie bronzy. U jaje 16 miedaloŭ z čempijanataŭ śvietu, čatyry miedali z čempijanataŭ Jeŭropy, hramata ad rasijskaha prezidenta i piać dziaržaŭnych biełaruskich uznaharodaŭ. A jašče — mianuška «Kaciaryna Vialikaja», što ŭvabrała ŭ siabie i dasiahnieńni biełaruski, i jaje ŭparty charaktar.
U 2019-m, kali Karsten było 47, jana zaviaršyła spartovuju karjeru — paŭpłyvaŭ pierałom rebraŭ. Spartsmienka tak i nie zdoleła trapić na svaju vośmuju Alimpijadu, paśla jakoj płanavała adyści na spačynak.
Na toj čas Kaciaryna žyła i treniravałasia ŭ Hiermanii, kudy pierajechała jašče ŭ 1997-m. Tam u 1998-m jana vyjšła zamuž za niemca Vilfryda, u ich naradziłasia dačka Alaksandra. Ale paśla zakančeńnia karjery Karsten vyrašyła, što čas viartacca na Radzimu.
Tady, u 2019-m, Vilfryd nie rašyŭsia jechać za joj u Biełaruś — jak tłumačyła Kaciaryna ŭ intervju, musiŭ sačyć za zdaroŭjem, a heta jamu było bolš zvykła rabić u Hiermanii. Dačka Alaksandra taksama znajšła siabie na Zachadzie — na radzimie baćki jana atrymlivała adukacyju i pracavała ŭ miedyjadyzajnie, u tym liku pasupracoŭničała z futbolnym kłubam «Bajer» ź Levierkuziena.
Što da samoj viaślarki, paśla zakančeńnia karjery jana adčuvała siabie razhublena. Karsten tryvožyłasia, što jaje čakaje dalej: «Stolki addać sportu, nie viedajučy, što tam napieradzie biez sportu. Bojazna. I ja nie razumieła, što možna rabić biez sportu. Chočacca sieści i tuju ž adzinočku paviesłavać».
Sistema dziaržaŭnaha sportu, adnak, padchapiła Kaciarynu. U kastryčniku 2020-ha žančyna ŭvajšła ŭ radu fiederacyi viesłavańnia. Raniej Karsten pryznavałasia, što nie bačyć siabie trenieram — maŭlaŭ, charaktar nie toj, ale ŭ vieraśni 2021-ha pajšła pracavać ź dziećmi 13-14 hadoŭ. Akramia hetaha, čempijonka kuryruje pracu sa spartovym reziervam i ŭvachodzić u kamisiju spartsmienaŭ biełaruskaha NAK.
Vosieńniu 2020-ha pra Karsten zahavaryli znoŭ, ale nie sa spartovych pryčyn. Lehiendarnaja viaślarka adnoj ź pieršych padpisała adkryty zvarot praŭładnych spartsmienaŭ. Były trenier zbornaj pa viesłavańni Valeryj Hajduk tłumačyŭ žurnalistam, što naŭrad ci Kaciaryna zrabiła heta śviadoma: «Joj skazali padpisać, jana i padpisała. Jana takaja. Joj skažy «Idzi!», jana i pojdzie. Niekanfliktnaja žančyna. Joj tak zručna. Jana tak i zrabiła».
Fota: championat.com
Ale ž hety list — daloka nie pieršy vypadak, kali Karsten prajaŭlaje blizkaść da ŭłady. Naprykład, jašče ŭ červieni 2020-ha žančyna raskazvała, što ŭ Biełarusi «vielmi šmat robicca i dla žyćcia, i dla sportu»: «Tak, jość momanty, jakija varta było b vypravić i palepšyć. Ale ŭsio złamać i sprabavać pabudavać nanava — šlach u nikudy».
A heta ŭžo 2022 hod, jubilej Kaciaryny. Biełaruska z uśmieškaj atrymlivaje hanarovuju hramatu z ruk kiraŭnika NAK Viktara Łukašenki:
Fota: mlyn.by
Jana i dahetul prychodzić na praŭładnyja imprezy — naprykład, 6 maja 2023 Karsten razam ź inšymi alimpijcami, u tym liku viadomymi praŭładnymi spartsmienami Maksimam Niedasiekavym i Nastaśsiaj Mirončyk-Ivanovaj, udzielničała va ŭskładańni kvietak da steły «Minsk — horad-hieroj». A niekalki dzion tamu na sustrečy ŭ Minsku Kaciaryna «paznajomiła dziaciej z sacyjalnych ustanoŭ sa śvietam armiejskaha sportu» — praviała raźminku i adkazała na pytańni. Praŭładnyja miedyja časam kličuć da siabie słavutuju biełarusku, ale vykazvacca pra palityku jana nie śpiašajecca, abo ŭ jaje pra heta nie pytajucca.
Najlepšy futbalist Biełarusi — viciabčuk z afrykanskimi karaniami. Chto taki Maks Ebonh
U BATE — najhoršyja vyniki za historyju. Top-5 pryčyn pravału